| ཚིག་སྡུད་ཅེས་པ་ནི་བརྗོད་དོན་གྱི་དགོས་མཁོ་དང་ཚིག་དོན་གོང་འོག་གི་གནས་སྐབས་ཀྱི་དབང་གིས། མིང་དང་ཚིག་གི་ཆ་ཤས་དང་། ཚིག་ཕྲད་སོགས་ཉུང་ངུར་བསྡུས་ཀྱང་དོན་གྱི་སྤྱི་ལྡོག་ནས་སྔར་གྱི་སོ་ན་གནས་པའི་བརྡ་སྤྲོད་ཀྱི་ཐབས་ལམ་ལ་བྱ་བས། སྡུད་མཁན་གྱིས་རང་སྣང་གང་འདོད་དུ་བསྡུ་ཆོག་པ་ཞིག་གཏན་ནས་མ་ཡིན་པར། སྐད་ཆའི་གོམས་སྲོལ་དང་བརྡ་ཡི་སྦྱོར་ལུགས་དང་མི་འགལ་བའི་ཁར། བསྟན་དོན་མི་འགྱུར་བ་དང་གོལ་ས་མི་འབྱུང་བ་བརྟེན་གཞིར་གྲུབ་ཅིང་། རྗོད་བྱེད་སྒྲའི་སྡེབ་ལུགས་དང་བརྗོད་བྱ་དོན་གྱི་གཏན་ཚིག་དང་ངེས་པར་བསྟུན་དགོས་མོད། འོན་ཀྱང་དེང་སྐབས་ཀྱི་དགེ་སློབ་འགའ་ལ་བརྡ་སྤྲོད་པའི་ལུགས་ལ་བྱང་ཆ་ཅུང་ཙམ་ཡང་མེད་པས་ཚིག་སྡུས་ཀྱི་དགོས་པ་དང་བསྡུས་མ་ཤེས་པའི་སྐྱོན་སོགས་འབྱུང་བ་ལ་གཞིགས་ནས། ཕྲན་གྱིས་ཚིག་སྡུད་བྱེད་སྐབས་ཚད་གཞི་གང་འདྲ་ཞིག་དགོས་པའི་ཐོག་ནས་ཅུང་ཙམ་བཤད་པར་བྱ་བ་ལ།
བརྡ་སྤྲོད་པའི་ལུགས་དང་མི་འགལ་བ། སྤྱིར་བརྡ་སྤྲོད་ཅེས་པའི་བོད་ཀྱི་ཐ་སྙད་འདི་ལ་སྐབས་དོན་གྱི་གོ་བ་མི་འདྲ་བ་རེ་ཡོད་མོད། འདིར་འཆད་མཁན་དང་ཉན་མཁན་ཕན་ཚུན་བར་གོ་བརྡ་སྤྲོད་པ་ལ་སྔར་ས་གཏན་ཆཊ་སུ་སོང་བའི་སྐད་ཆའི་སྦྱོར་ལུགས་དང་སྒྲིག་སྲོལ་ཞིག་ཡོད་པ་དེར་གོ་དགོས་ཤིང་། སྒྲིག་སྲོལ་དེ་དང་མཐུན་པ་ལ་བརྡ་སྤྲོད་པའི་ལུགས་དང་མཐུན་ཞེས་ལ། སྐད་ཆའི་སྒྲིག་སྲོལ་དེ་གཞུང་ལུགས་ཀྱི་སྒོ་ནས་གཏན་ལ་ཕབ་ལ་བརྡ་སྤྲོད་རིག་པ་ཟེར། བོད་ཀྱི་སྐད་ཆ་འདི་ནི་ཚིག་ཕྲད་མང་ཞིང་སྦྱོར་ཚུལ་གཏན་ཆགས་པའི་སྐད་ཆ་ཞིག་ཡིན་པས། བོད་ཀྱི་བརྡ་སྤྲོད་ཀྱི་གནད་གཙོ་བོ་ཡི་གེའི་རྟགས་ཀྱི་དབྱེ་བ་དང་། མིང་དང་ཚིག་གི་རྣམ་བཞག་རྣམ་དབྱེ་དང་ཚིག་ཕྲད་སྦྱོར་ལུགས་གསུམ་དུ་འདུ་ཞིང་། ཚིག་སྡུད་ཀྱིས་སྐབས་འདིར་གཙོ་བོ་ཕྱི་མ་གཉིས་ནས་གནད་ཆེ་བས། བསྡུ་བྱའི་མིང་དང་ཚིག་གི་བརྗོད་རིམ་དང་། ཚིག་ཕྲད་ཀྱི་བྱེད་པ་དེ་བསྡུས་ཟིན་པའི་མིང་དང་ཚིག་གི་སྐབས་སུའང་དངོས་དང་དོན་ཐོབ་ཅི་རིགས་ཀྱིས་ཐོན་དགོས་ཤིང་། གལ་ཏེ་བསྡུས་ན་བརྡ་སྤྲོད་དང་མི་མཐུན་ཞིང་དོན་འཛོལ་བར་འགྱུར་བ་ནི་བསྡུ་མི་རུང་སྟེ། མཛེས་པའི་རི་མོ་ལ་མཛེས་རིས་དང་། དགེ་བའི་བཤེས་གཉེན་ལ་དགེ་བཤེས་ཅེས་པར་བསྡུ་རུང་ཡང་། གྲོགས་པོའི་ཇ་ཕོར། ཁྱིམ་དུ་ཕེབས་ལྟ་བུ་བསྡུ་མི་རུང་བས། གང་ཞིག་བསྡུས་ན་བསྟན་དོན་མི་འགྱུར་ཞིང་བརྡ་སྤྲོད་དང་མཐུན་པ་རྣམས་ནི་བསྡུ་ལ། དེ་ལས་ལྡོག་པ་རྣམས་བསྡུ་མི་རུང་ངོ་། །བརྡ་སྤྲོད་མཐུན་པ་ནི་སྐད་ཆའི་གོམས་སྲོལ་དང་མཐུན་པ་ཡིན་ལ། སྐད་ཆའི་གོམས་སྲོལ་དང་མཐུན་པ་ནི་སྦྱོར་ཚུལ་ཡང་དག་ཡིན་པས། ཚིག་སྡུད་བྱེད་རུང་མིན་ནི་བརྡ་སྤྲོད་དང་འགལ་མིན་ལ་བལྟ་དགོས་སོ། །
དོན་ལ་གོལ་ས་མི་འབྱུང་བ། ཚིག་སྡུད་བྱེད་པའི་དགོས་པ་ནི་སྒྲ་ཟོར་ཡང་ཞིང་བརྗོད་བདེ་བར་བྱེད་པ་ཡིན་མོད། དོན་གྱི་གོལ་ས་ལ་མི་ལྟ་བར་སྒྲའི་ཆ་ཤས་གང་འདོད་དུ་བསྡུ་བ་ནི་སྐྱོན་ཆེན་པོ་ཞིག་ཡིན་ཏེ། ད་ལྟའི་བརྩམས་དེབ་འགར་ཀྲུང་གོའི་དངུལ་ཁང་ཞེས་པ་ལ་ཀྲུང་གོ་དངུལ་ཁང་། བོད་ཀྱི་སྐད་ཡིག་ཅེས་པར་“བོད་སྐད་ཡིག”རང་རེའི་མི་རིགས་ཅེས་པ་ལ“རང་མི་རིགས”སོགས་སུ་བསྡུས་ཏེ་འཁོལ་གྱིན་གདའ་བས། བོད་སྐད་ཡིག་ཅེས་པ་བོད་ཀྱི་སྐད་ཡིག་ཟེར་བ་ཡིན་པས། རྟ་ནོར་ལུགས་གསུམ་ལྟར་བསྟན་བྱ་དོ་མཉམ་པའི་མིང་གསུམ་མཉམ་དུ་བསྟར་བ་ཡིན། བོད་ཅེས་པ་མི་རིགས་ཤིག་གི་མིང་ཡིན་པས་སྐད་ཡིག་དང་མཉམ་དུ་བསྡུ་ག་ལ་རུང་སྟེ། མིང་དུ་མ་མཉམ་དུ་བསྡུ་བ་ལ་མིང་དེ་དག་གི་ངོ་བོ་མཐུན་ཞིང་བསྟན་བྱ་ལ་གཙོ་ཕལ་གྱི་ཁྱད་པར་མེད་པའི་ཕྱིར་དང་། མིང་གི་ཚོགས་པ་བར་གྱི་འབྲེལ་སྒྲ་བསྡུ་བའི་ཚེ། ནས་ཀྱི་མྱུ་གུ་ལྟ་བུ་རྒྱུ་འབྲས་ཀྱི་འབྲེལ་བ་དང་། གསེར་གྱི་བུམ་པ་ལྟ་བུ་བདག་ཉིད་གཅིག་པའི་འབྲེལ་བ་སོགས་མ་གཏོགས་འབྲེལ་སྒྲ་ཡོད་ཚད་བསྡུ་མི་རུང་བའི་ཕྱིར་གྱིས། སྐབས་འདིའི་བོད་ཅེས་པ་ནི་སྐད་ཡིག་དེའི་བདག་པོ་དང་། སྐད་ཡིག་དེ་གཞན་གྱི་མ་ཡིན་པ་སེལ་བྱེད་ཀྱི་སྒྲ་ཡིན་པས། དེ་ལས་འབྲེལ་སྒྲ་ངེས་པར་སྦྱོར་བ་ནི་དོན་གྱི་དབང་གིས་ཡིན་ལ། སྡེབ་ཁྱད་སྙོམས་པའི་ཕྱིར་ཡང་ཡིན་ཏེ། བོད་སྐད་ལ་ཚིག་རྒྱན་གྱི་དགོས་མཁོ་མེད་ན་སྤྱིར་བཏང་དུ་མིང་གི་ཆ་ཤས་སྔ་མ་རུ་སྡེབ་པའི་ཕྱིར་རོ། །དེ་བཞིན་དུ་ཀྲུང་གོའི་དངུལ་ཁང་ཞེས་པའི་འབྲེལ་སྒྲ་བསྡུས་ཚེ། དངུལ་ཁང་དེ་ཀྲུང་གོ་ལ་གཏོགས་པ་མི་སྟོན་པར། ཀྲུང་གོ་ཞེས་པ་དངུལ་ཁང་རང་ཡིན་པ་སྟོན་པས། རྒྱལ་ཁབ་ཅིག་དངུལ་ཁང་དུ་གོ་དགོས་པའི་སྐྱོན་དེ་ལས་ཆེ་བ་གང་ན་ཡོད། དཔེ་ཆར་ལྟ་དང་དཔེ་ཆ་ལྟ། གཟུགས་སུ་མཐོང་དང་གཟུགས་མཐོང་། ཆོས་སུ་འདོན་དང་ཆོས་འདོན་ལྟ་བུའི་ཕྱི་མ་སྟོན་རྣམས་ནི་སྔ་མ་དག་གི་ལ་དོན་བསྡུས་པ་མིན་ཏེ། དེ་དག་ལ་དོན་གྱི་ཕྲད་སྦྱར་མ་སྦྱར་གྱི་དོན་གཏན་ནས་མི་འདྲ་བའི་ཕྱིར་རོ། །
རྩོམ་པ་པོ་ནི་རྩེ་ཁོག་རྫོང་ཉིན་ཤུག་ལོ་དགུའི་ལམ་ལུགས་བཅའ་སྡོད་སློབ་གྲྭའི་དགེ་རྒན་ཡིན་། |
