གནས་ཡུལ། མདུན་ངོས། སུམ་རྟགས་དག་གསུམ།
 
 
༄༅།། བརྡ་དག་ཕྱེ་མ་ལེབ།
སྤེལ་དུས།2015-04-15   ཡོང་ཁུངས་།བོད་ལྗོངས་རིག་གནས་དྲ་བ།   རྩོམ་པ་པོ། དཔྱི་ས་དཀོན་མཆོག་བློ་གྲོས་རྒྱ་མཚོ།

༄༅།། སྒྲ་རིག་ནམ་འཕང་གཅོད་བྱེད་བརྡ་དག་ཕྱེ་མ་ལེབ་ཀྱི་གཤོག་རླབས་ཞེས་བྱ་བ་བཞུགས་སོ། །

       ན་མོ་གུ་རུ་མཉྫུ་གྷོ་ཥཱ་ཡ། གངས་ལྗོངས་ཞིང་གི་རྨོངས་པའི་སྨག །མཐར་བྱེད་ཀ་ཕྲེང་སྣང་བའི་གཏེར། ། འདྲེན་མཛད་འཇམ་མགོན་ཐོན་མི་ལ། ། བཀའ་དྲིན་དྲན་པས་ཕྱག་བྱས་ཏེ། ། སྒྲ་འགྲོས་ཕྱོགས་ཙམ་མཐུན་པའི་རྒྱུས། ། འབྲི་ཀློག་དོན་གསུམ་བལ་བ་ཛའི། ། ཟླ་བོར་འཛིངས་བྱས་རྩྭ་མཆོག་རྩེ། ། ཇི་བཞིན་འབྱེད་ལ་ཡིད་རབ་དང༌། ། གང་ཞིག་མགྲིན་བཟང་གྲལ་དབུ་ལ། ། ཡི་ག་ལོག་སྟེ་དཔྱོད་ལྡན་ཁྲིར། ། འཛེག་འདོད་བློ་གསལ་འགའ་མཆིས་ན། ། འཁྲུལ་སེལ་འབབ་སྟེགས་འདི་བསྟེན་རིགས། །

༼ཀ༽

       ཀ་དང་ཀྭ་དང་བཀའ་རྣམས་ནི། ། ཀ་དག་ཀྭ་ཡེ་རྒྱལ་བའི་བཀའ། ། ཀི་དང་ཀུ་དང་བཀུ་རྣམས་ནི། ། ཀི་ཀང་ཀུ་ཤ་སྨན་བཀུ་བ། ། དཀར་དང་སྐར་དང་བཀར་རྣམས་ནི། ། མདོག་དཀར་རྒྱུ་སྐར་ལོགས་སུ་བཀར། ། སྐ་དང་རྐ་དང་དཀའ་རྣམས་ནི། ། སྐ་ཅོག་ཆུ་རྐ་ཚེགས་ཆེའི་དཀའ། ། སྐུ་དང་རྐུ་དང་དཀུ་རྣམས་ནི། ། ལྷ་སྐུ་ནོར་རྐུ་སྟ་ཟུར་དཀུ། ། དཀན་དང་རྐན་དང་སྐན་རྣམས་ནི། ། དཀན་གཟར་ཡ་རྐན་ནུས་རེ་སྐན། ། སྐོན་དང་རྐོན་དང་དཀོན་རྣམས་ནི། ། གོས་སྐོན་རྐོན་པ་རྙེད་དཀའི་དཀོན། ། བརྐམ་དང་བསྐམ་དང་སྐམ་རྣམས་ནི། ། བརྐམ་ཆགས་རླན་བསྐམ་སྐམ་པས་འཛིན། ། སྐད་དང་སྐལ་དང་བསྐལ་རྣམས་ནི། ། སྐད་ངག་ཐོབ་སྐལ་སྒྲོན་བསྐལ་དུས། ། རྐོང་དང་སྐོང་དང་སྐུང་རྣམས་ནི། ། ཟ་རྐོང་རེ་སྐོང་སྦ་བའི་སྐུང༌། ། དཀྲོང་དང་བཀྲོངས་དང་ཀྲུང་རྣམས་ནི། ། དཀྲོང་བསྐྱེད་བསད་བཀྲོངས་སྐྱིལ་མོ་ཀྲུང༌། ། ཀྲོལ་དང་བཀྲོལ་དང་དཀྲོལ་རྣམས་ནི། ། ཕུང་ཀྲོལ་བཅིངས་བཀྲོལ་དྲིལ་བུ་དཀྲོལ། ། བཀྲས་དང་བཀྲེས་དང་བཀྲོས་རྣམས་ནི། ། བཀྲས་རྔབ་བཀྲེས་སྐོམ་གདམ་པའི་བཀྲོས། ། བཀྲུས་དང་བསྐྲུས་དང་དཀྲིས་རྣམས་ནི། ། གདོང་བཀྲུས་ཟས་བསྐྲུས་སྲད་པུས་དཀྲིས། ། ཀྱལ་དང་རྐྱལ་དང་བསྐྱལ་རྣམས་ནི། ། ངག་ཀྱལ་ཆུར་རྐྱལ་གནས་སུ་བསྐྱལ། ། སྐྱེས་དང་སྐྱས་དང་བསྐྱས་རྣམས་ནི། ། ཤིང་སྐྱེས་སྐྱས་འདེགས་ཀ་ཅ་བསྐྱས། ། སྐྱེད་དང་སྐྱེལ་དང་བསྐྱེད་རྣམས་ནི། ། སྐྱེ་ཁེ་བསུ་སྐྱེལ་འབྲས་བུ་བསྐྱེད། ། སྐྱེངས་དང་བསྐྱངས་དང་རྐྱང་རྣམས་ནི། ། ཁ་སྐྱེངས་བུ་བསྐྱངས་རི་དྭགས་རྐྱང༌། ། སྐྱེགས་དང་སྐྱེག་དང་སྐྱག་རྣམས་ནི། ། རྒྱ་སྐྱེགས་རྩིས་སྐྱེག་ཕྱི་སའི་སྐྱག །སྐྱི་དང་སྐྱུ་དང་དཀྱུ་རྣམས་ནི། ། སྐྱི་གཡའ་སྐྱུ་རུ་ཁ་ལོ་དཀྱུ། ། བཀྱོན་དང་སྐྱོན་དང་བསྐྱོན་རྣམས་ནི། ། བཀའ་བཀྱོན་སྐྱོན་མཚང་རྟ་ལ་བསྐྱོན། ། སྐྱུག་དང་སྐྱིགས་དང་བཀྱིགས་རྣམས་ནི། ། ཟས་སྐྱུག་སྐྱིགས་བུ་ཐ་གུས་བཀྱིགས། ། སྐྱིད་དང་བསྐྱིལ་དང་བསྐྱུད་རྣམས་ནི། ། བདེ་སྐྱིད་ཆུ་བསྐྱིལ་བརྗེད་པའི་བསྐྱུད། ། དཀོར་དང་སྐོར་དང་ཀོར་རྣམས་ནི། ། དཀོར་རྫས་མགོ་སྐོར་ཐོད་ལེ་ཀོར། ། སྐུམ་དང་བཀུམས་དང་ཀིམ་རྣམས་ནི། ། རྐྱོང་སྐུམ་སྲོག་བཀུམས་ཀིམ་པའི་འབྲས། ། ཀེང་དང་རྐང་དང་བསྐངས་རྣམས་ནི། ། ཀེང་རུས་རྐང་མར་མ་ཚང་བསྐངས༌། ། བཀྱེད་དཀྱེལ་ཕྱིར་བཀྱེད་དཀྱེལ་ཆེ་བ། ། བཀོད་བཀོལ་བཤམས་བཀོད་ཟུར་དུ་བཀོལ། ། ཀན་བཀན་བད་ཀན་ལག་པ་བཀན། ། བཀག་ཀེག་ལམ་བཀག་བར་ཆད་ཀེག །བཀོང་ཀོང་སྤ་བཀོང་མར་མེའི་ཀོང༌། ། བཀད་བཀལ་བཀད་ས་ཁལ་སོགས་བཀལ། ། བཀོག་ཀོག་རྡོ་བཀོག་ཀོག་གིས་ལངས། ། ལྐོག་སྐོགས་ལྐོག་གྱུར་ཐུམ་གྱི་སྐོགས། ། དཀོས་སྐས་དཀོས་ཐག་ཐེམ་པའི་སྐས། ། བརྐོས་བསྐོས་ས་བརྐོས་ལས་བྱེད་བསྐོས། ། བསྐྱུངས་སྐྱུང་གཅོམ་བསྐྱུངས་བྱ་སྐྱུང་ཀ །སྐྱོང་རྐྱོང་ཆོས་སྐྱོང་ལག་པ་རྐྱོང༌། ། བསྐུས་བརྐུས་སྣུམ་བསྐུས་ལྐོག་ནས་བརྐུས། ། སྐུགས་ལྐུགས་རྒྱལ་སྐུགས་ཁ་ལྕེ་ལྐུགས། ། སྐུད་སྐུལ་ཚོན་སྐུད་ཆོས་ལ་སྐུལ། ། དཀྲིགས་དཀྲུགས་སྤྲིན་དཀྲིགས་གོ་རིམ་དཀྲུགས། ། རྐུན་སྐུན་རྐུན་མ་སྐུན་བུ་སྣོད། ། བཀྲལ་ཀྲད་དགོངས་བཀྲལ་ལྷམ་ཀྲད་གྱོན། ། བཀྲི་བཀྲུ་ལམ་བཀྲི་དྲི་མ་བཀྲུ། ། དཀྱུས་བསྐྱིས་དཀྱུས་མ་གྲོ་ནས་བསྐྱིས། ། རྐྱེན་སྐྱེན་རྒྱུ་རྐྱེན་མྱུར་བའི་སྐྱེན། ། བསྐྱོད་སྐྱོལ་རླུང་བསྐྱོད་སྐུད་པ་སྐྱོལ། ། སྐྱར་བསྐྱར་ཆུ་སྐྱར་བལྡབས་ཏེ་བསྐྱར། ། སྐྱུར་བསྐྱུར་རོ་སྐྱུར་ཤུལ་དུ་བསྐྱུར། ། བརྐྱང་སྐྱང་སྲ་བརྐྱང་སྐྱང་ནུལ་བྱེད། ། སྐེག་སྐག་རི་སྐེག་སྐར་མ་སྐག །དཀྲོགས་སྐྲོག་ཞོ་དཀྲོགས་ཌ་རུ་སྐྲོག །དཀྱོག་སྐྱོགས་སྐེ་དཀྱོག་གཟར་བུའི་སྐྱོགས། ། ཀླུང་ཀློང་ཆུ་ཀླུང་རྒྱ་མཚོའི་ཀློང༌། ། ཀླག་བཀླགས་ཀླག་ཅོར་གསུང་རབ་བཀླགས། །

༼ཁ༽

       ཁུང་ཁུངས་ཁོང་ཁོངས་ཁུང་བུ་དང༌། ། འབྱུང་ཁུངས་ཁོང་ཁྲོ་ཁོངས་སུ་གཏོགས། ། ཁྲི་ཁྲུ་འཁྲི་འཁྲུ་གདན་ཁྲི་དང༌། ། ལག་ཁྲུ་འཁྲི་ཤིང་སྦྱོངས་པའི་འཁྲུ། ། འཁྲུད་འཁྲུལ་འཁྲིད་འཁྲིལ་དྲི་འཁྲུད་དང༌། ། ནོར་འཁྲུལ་ལམ་འཁྲིད་ལུས་ལ་འཁྲིལ། ། ཁད་ཁལ་མཁལ་འཁལ་རིམ་ཁད་དང༌། ། མཛོ་ཁལ་མཁལ་མ་སྐུད་པ་འཁལ། ། ཁོད་ཁོལ་འཁོལ་འཁོད་ཁོད་སྙོམས་དང༌། ། ཇ་ཁོལ་གཡོག་འཁོལ་གྲལ་ལ་འཁོད། ། ཁྱུད་དང་འཁྱིལ་དང་འཁྱུད་རྣམས་ནི། ། མུ་ཁྱུད་མཚོ་འཁྱིལ་ཡུམ་ལ་འཁྱུད། ། མཁས་དང་མཁོས་དང་འཁོས་རྣམས་ནི། ། མཁས་པ་མཁོས་ཕབ་འཁོས་ཀ་ཆུང༌། ། ཁུར་དང་འཁུར་དང་མཁུར་རྣམས་ནི། ། ཁུར་བོ་སྣུམ་འཁུར་མཁུར་ཚོས་དམར། ། ཁང་དང་ཁེངས་དང་འཁངས་རྣམས་ནི། ། ཁང་བཟང་ཁེངས་དྲེགས་འཁངས་ར་བྱེད། ། ཁྲུས་དང་མཁྲིས་དང་འཁྲིས་རྣམས་ནི། ། སྐུ་ཁྲུས་མཁྲིས་པ་ཤིང་ལ་འཁྲིས། ། ཁམ་དང་ཁམས་དང་འཁམས་རྣམས་ནི། ། ཁམ་ཟས་འབྱུང་ཁམས་བརྒྱལ་བའི་འཁམས། ། མཁྲིག་དང་ཁྲིག་དང་འཁྲིག་རྣམས་ནི། ། མཁྲིག་མ་ཁྲག་ཁྲིག་གཡེམ་པའི་འཁྲིག །འཁྲིགས་དང་འཁྲུགས་དང་འཁྲུག་རྣམས་ནི། ། སྤྲིན་འཁྲིགས་སེམས་འཁྲུགས་འཐབ་པའི་འཁྲུག །ཁྱུང་དང་འཁྱོངས་དང་ཁྱོངས་རྣམས་ནི། ། བྱ་ཁྱུང་ཐུབ་འཁྱོངས་ཚོན་དྲུ་ཁྱོངས། ། ཁུལ་དང་འཁུལ་དང་ཁུད་རྣམས་ནི། ། ཡིན་ཁུལ་སེམས་འཁུལ་སྐྱེས་ཀྱི་ཁུད། ། མཁའ་དང་ཁ་དང་ཁྭ་རྣམས་ནི། ། ནམ་མཁའ་ཁ་ལྕེ་བྱ་རོག་ཁྭ། ། ཁྲོད་དང་ཁྲོལ་དང་འཁྲོལ་རྣམས་ནི། ། དུར་ཁྲོད་ནང་ཁྲོལ་རོལ་མོ་འཁྲོལ། ། ཁྱོགས་དང་འཁྱོག་དང་ཁྱོག་རྣམས་ནི། ། འཁུར་ཁྱོགས་ཤིང་འཁྱོག་མནན་པ་ཁྱོག །ཁྲེས་དང་འཁྲས་དང་ཁྲོས་རྣམས་ནི། ། ཁྲེས་པོ་ཞེན་འཁྲས་ཁོང་ནས་ཁྲོས། ། མཁྱིད་མཁྱུད་མཁྱིད་གང་སྦས་པའི་མཁྱུད། ། མཁར་འཁར་མཁར་རྫོང་འཁར་བའི་རྔ། ། ཁོག་འཁོགས་བྱང་ཁོག་རྒས་ནས་འཁོགས། ། འཁོབ་འཁོབས་མཐའ་འཁོབ་ཁྱབ་པའི་འཁོབས། ། ཁོ་མཁོ་ཁོ་བོ་མཁོ་ཆས་འཚོལ། ། ཁས་ཁོས་ཁས་ཞན་མགོ་བོ་ཁོས། ། ཁན་མཁན་ཁན་འཇོག་མཁན་པོ་བྱས། ། ཁྱམས་འཁྱམས་བར་ཁྱམས་ཕྱོགས་སུ་འཁྱམས། ། ཁྱོར་འཁྱོར་ཁྱོར་བ་གོམ་འགྲོས་འཁྱོར། ། ཁུག་ཁུགས་དགྲ་ཁུག་སྟན་གྱི་ཁུགས། ། ཁག་ཁེགས་ཁག་ཐེག་རིགས་པས་ཁེགས། ། ཁྲིམས་ཁྲུམས་ཚུལ་ཁྲིམས་ཁྲུམས་སྟོད་སྨད། ཁྲེམ་ཁྲེམས་ཁྲེམ་གཉེར་ཆུ་ཁྲེམས་ཤིག །འཁུམ་འཁུམས་རྐང་འཁུམ་ཤེས་པའི་འཁུམས། ། ཁྲིད་ཁྲུད་འོད་ཁྲིད་ཁྲུད་ཁུ་འབོ། ། ཁྲག་མཁྲེགས་ཤ་ཁྲག་སྲ་ཞིང་མཁྲེགས། ། འཁྲུངས་ཁྲུང་སྐུ་འཁྲུངས་བྱ་ཁྲུང་ཁྲུང༌། ། ཁྱི་ཁྱུ་ཁྱི་ཕག་ར་ལུག་ཁྱུ། ། ཁྱུར་འཁྱུར་ཁྱུར་མིད་ཤུལ་དུ་འཁྱུར། ། འཁྱལ་ཁྱད་ངག་འཁྱལ་ཁྱད་དུ་བསད། ། ཁྲ་འཁྲ་ཁྲ་བོ་ཞེན་པའི་འཁྲ། ། ཁྲབ་འཁྲབ་གོ་ཁྲབ་གྲོ་ནས་འཁྲབ། ། འཁྱུག་འཁྱིག་གློག་འཁྱུག་ཐ་གུས་འཁྱིག །ཁྱོད་འཁྱོལ་ཁྱོད་རང་ཚེ་མཐར་འཁྱོལ། ། ཁོར་འཁོར་ཁོར་ཡུག་ཆོས་འཁོར་བསྐོར། །

༼ག༽

       དགེ་དགེས་བགོས་དགོས་དགེ་བ་དང༌། ། དགེས་དགྱེས་སྐལ་བགོས་དགོས་དོན་གྲུབ། ། བསྒོས་སྒོས་རྒས་དགས་བཀའ་བསྒོས་དང༌། ། སྤྱི་སྒོས་རྒས་འཁོགས་དུམ་བུར་དགས། ། རྒད་སྒལ་དགལ་བརྒལ་རྒད་པོ་དང༌། ། སྒལ་ཚིགས་ཁལ་དགལ་ཆུ་ལ་བརྒལ། ། དགང་ལྒང་སྒང་བསྒང་སྣོད་དགང་དང༌། ། ལྒང་ཕུག་རི་སྒང་བྱ་བའི་བསྒང༌། ། བགོ་སྒོ་བསྒོ་དགོ་བགོ་བཤའ་དང༌། ། སྒོ་གླེགས་བཀའ་བསྒོ་རི་དྭགས་དགོ །བརྒྱུད་རྒྱུད་སྒྱིད་བགྱིད་བླ་བརྒྱུད་དང༌། ། ཕྲེང་རྒྱུད་སྒྱིད་ལུག་བྱེད་པའི་བགྱིད། ། ག་དང་འགའ་དང་གྭ་རྣམས་ནི། ། ག་ཤེད་འགའ་ཞིག་རྟ་གྭ་བ། ། དགུ་དང་སྒུ་དང་རྒུ་རྣམས་ནི། ། དགུ་ཕྲུགས་སྒུ་དོ་མཁོ་རྒུ་ཚང༌། ། རྒོད་དང་རྒོལ་དང་བགོད་རྣམས་ནི། ། བྱ་རྒོད་ཕྱི་རྒོལ་རྙེད་པ་བགོད། ། འགོལ་དང་འགོད་དང་དགོད་རྣམས་ནི། ། འགོལ་ས་བདེར་འགོད་རང་གནས་དགོད། ། དགའ་དང་རྒ་དང་སྒ་རྣམས་ནི། ། སེམས་དགའ་རྒ་ཤི་ཁལ་རྟའི་སྒ། ། དགག་དང་བགེགས་དང་བགགས་རྣམས་ནི། ། དགག་སྒྲུབ་གདོན་བགེགས་འགྲོ་ལམ་བགགས། ། བརྒྱད་དང་རྒྱལ་དང་བརྒྱལ་རྣམས་ནི། ། གྲངས་བརྒྱད་རྒྱལ་ཕམ་དྲན་མེད་བརྒྱལ། ། བསྒྲིལ་དང་འགྲུལ་དང་འགྲིལ་རྣམས་ནི། ། སྐྱ་བསྒྲིལ་འགྲིམ་འགྲུལ་ཐུམ་གྱིས་འགྲིལ། ། རྒྱུས་དང་བརྒྱུས་དང་བགྱིས་རྣམས་ནི། ། ལོ་རྒྱུས་སྟར་བརྒྱུས་བྱས་པའི་བགྱིས། ། སྒྱེད་དང་དགྱེད་དང་བསྒྱེལ་རྣམས་ནི། ། སྒྱེད་པུ་ཕྱིར་དགྱེད་རྩིག་པ་བསྒྱེལ། ། རྒོངས་དང་དགུང་དང་དགོངས་རྣམས་ནི། ། རྒོངས་ཀ་མཚན་དགུང་ཐུགས་དགོངས་གསལ། ། སྒྱུ་དང་རྒྱུ་དང་བགྱི་རྣམས་ནི། ། གཡོ་སྒྱུ་རྒྱུ་ལོང་བྱ་བའི་བགྱི། ། དགྲོལ་དང་བགྲོད་དང་སྒྲོལ་རྣམས་ནི། ། དགོངས་དགྲོལ་ལམ་བགྲོད་ཆུ་ལས་སྒྲོལ། ། གྲིམས་དང་གྲུམ་དང་འགྲིམ་རྣམས་ནི། ། བློ་གྲིམས་གྲུམ་བུ་རྒྱལ་ཁམས་འགྲིམས། ། སྒར་དང་དགར་དང་བསྒར་རྣམས་ནི། ། གུར་སྒར་ལུག་དགར་བུ་རམ་བསྒར། ། གླེགས་དང་གླག་དང་གླགས་རྣམས་ནི། ། གླེགས་བུ་བྱ་གླག་གླགས་ཚོལ་ངེས། ། གླང་དང་གླེང་དང་གླིང་རྣམས་ནི། ། གླང་ཆེན་གླེང་གཞི་སྐམ་སའི་གླིང༌། ། བརྒྱངས་དང་རྒྱངས་དང་རྒྱང་རྣམས་ནི། ། གད་བརྒྱངས་རྒྱངས་བུ་རྒྱང་འཕེན་པ། ། གང་གངས་གང་ཞིག་ཁ་བའི་གངས། ། འགེངས་འགངས་སྣོད་འགེངས་གཤིས་ཀྱི་འགངས། ། གྲིབ་གྲུབ་བཙོག་གྲིབ་རྒྱུ་ལས་གྲུབ། ། འགྲུབ་འགྲིབས་དོན་འགྲུབ་ཉམས་པའི་འགྲིབས། ། འགོམས་འགོམ་ཐལ་འགོམས་རྐང་བས་འགོམ། ། གལ་གད་གལ་ཆེ་སེར་ག་གད། ། གས་གོས་གས་ཆག་ཕྱིང་སྣམ་གོས། ། གུལ་གུད་གུ་གུལ་གུད་ན་མཆིས། ། གུང་གོང་ཉིན་གུང་གོང་དུ་ཕུད། ། གོམས་གོམ་གོམས་འདྲིས་གོམ་པའི་འགྲོས། ། འགེལ་འགེད་ཁལ་འགེལ་བགོད་རྫས་འགེད། ། བགམ་སྒམ་ཚོད་བགམ་ཟབ་པའི་སྒམ། ། གོལ་གོད་ལམ་གོལ་གོད་ཁས་བརླགས། ། རྒུད་སྒུལ་དར་རྒུད་སྒུལ་ཞིང་སྐྱོད། ། མགལ་འགལ་མགལ་དུམ་མི་མཐུན་འགལ། ། བརྒྱགས་རྒྱགས་ལམ་བརྒྱགས་ཁེངས་པའི་རྒྱགས། ། གི་གུ་ཕ་གི་ཐ་གུ་སྒྲིལ། ། སྒོང་བསྒོངས་བྱ་སྒོང་མེ་ཤིང་བསྒོངས། ། འགུལ་མགུལ་གཡོ་འགུལ་མགྲིན་པའི་མགུལ། ། སྒོམ་བགོམས་སྒོམ་ཆེན་གོམ་པ་བགོམས། ། མགོ་འགོ་ལུས་མགོ་བྱ་བའི་འགོ །རྒན་བརྒན་རྒན་པོ་ལེ་བརྒན་དར། ། དགུན་རྒུན་དགུན་དུས་རྒུན་འབྲུམ་ཟ། ། སྒེག་བསྒགས་འཇོ་སྒེག་མནའ་བསྒགས་པ། ། དགྲ་སྒྲ་དགྲ་བོ་སྐད་སྒྲ་ཉམས། ། སྒྲོག་སྒྲོགས་ལྕགས་སྒྲོག་སྒྲ་ཆེན་སྒྲོགས། ། གྲུང་སྒྲུང་སྤྱང་གྲུང་གེ་སར་སྒྲུང༌། ། སྒྲོ་བགྲོ་བྱ་སྒྲོ་བགྲོ་གླེང་བྱེད། ། གག་གེགས་བྱ་གག་བར་ཆད་གེགས། ། གྲོང་གྲོངས་གྲོང་ཁྱེར་ཤི་བའི་གྲོངས། ། བགྲོངས་བགྲུངས་སྐུ་བགྲོངས་རྙོག་མ་བགྲུངས། ། སྒྲུབ་སྒྲིབ་སྲིད་སྒྲུབ་ཤེས་ཉོན་སྒྲིབ། ། གྲེ་གྲོས་གྲེ་བ་གྲོས་ཀྱིས་བསལ། ། གྱོས་གྱེས་གྱོས་སྒྱུག་སོ་སོར་གྱེས། ། མགྲོན་འགྲོན་བོས་མགྲོན་ལམ་གྱི་འགྲོན། ། རྒྱུག་རྒྱུགས་འདུར་རྒྱུག་ཁེ་ཚོང་རྒྱུགས། ། གྲངས་གྲང་རྩིས་གྲངས་འཁྱགས་པའི་གྲང༌། ། གྲོག་གྲོགས་ཁ་གྲོག་མཛའ་བའི་གྲོགས། ། འགྱངས་འགྱིང་དུས་འགྱངས་ཁེངས་པའི་འགྱིང༌། ། འགྱེད་འགྱེལ་ཕོགས་འགྱེད་རྩིག་པ་འགྱེལ། ། གྲྭ་གྲ་གྲྭ་ཟུར་ཤིང་གྲ་མ། ། གྱོད་གྱོལ་དགྲ་གྱོད་གྱོལ་བོ་དང༌། ། གྱི་གྱུ་གྱི་ན་གྱ་གྱུ་ཆེ། ། གྲགས་གྲག་སྙན་གྲགས་འབྲུག་ལྟར་གྲག །འགྲམ་འགྲམས་ཆུ་འགྲམ་ཁྱབ་པའི་འགྲམས། ། གྲོད་གྲོལ་གྲོད་པ་བཅིངས་པ་གྲོལ། ། བགྲད་བསྒྲལ་མིག་བགྲད་དགྲ་བོ་བསྒྲལ། ། འགྲངས་འགྲེང་ལྟོ་འགྲངས་གྱེན་ལ་འགྲེང༌། ། བགྲོས་བགྲེས་གྲོས་བགྲོས་དགུང་ལོ་བགྲེས། ། དགྱངས་བསྒྱིངས་དུས་དགྱངས་སེང་གེ་བསྒྱིངས། ། གྱལ་གྱད་ཡ་གྱལ་མི་ཐུང་གྱད། ། འགྲས་འགྲོས་ཞེ་འགྲས་གོམས་པའི་འགྲོས། ། མགྱོགས་འགྱོག་མྱུར་མགྱོགས་འདེགས་པའི་འགྱོག །བརྒྱུངས་སྒྱོང་བརྒྱུངས་པ་ཉེས་པ་སྒྱོང༌། ། བགྲངས་བསྒྲེངས་གྲང་བགྲངས་རྒྱལ་མཚན་བསྒྲེངས། ། དགུག་སྒུག་དགུག་གཞུག་གྲོགས་ལ་སྒུག །སྒྲིན་བསྒྲུན་མཁས་སྒྲིན་འགྲན་པའི་བསྒྲུན། ། བསྒྲིགས་བསྒྲུགས་གྲལ་བསྒྲིགས་ཕྱེ་མར་བསྒྲུགས། ། སྒྱེ་དགྱེ་སྒྱེ་མོ་ལྟག་པར་དགྱེ། ། སྒྲེགས་བསྒྲགས་ཟས་སྒྲེགས་ཆོས་སྒྲ་བསྒྲགས། །

༼ང༽

       ང་དང་སྔ་དང་མངའ་རྣམས་ནི། ། རུ་ང་དུས་སྔ་ཐུགས་ན་མངའ། ། ངར་དང་མངར་དང་དངར་རྣམས་ནི། ། ངར་སྣབས་རོ་མངར་ཟིལ་དངར་ཞིམ། ། ངད་དང་ངལ་དང་མངལ་རྣམས་ནི། ། དྲི་ངད་ངལ་དུབ་གཡོན་མའི་མངལ། ། ངག་དང་མངག་དང་མངགས་རྣམས་ནི། ། སྐད་ངག་མངག་གཞུག་རྒྱང་དུ་མངགས། ། ངས་དང་ངོས་དང་ངེས་རྣམས་ནི། ། བརྗེད་ངས་ངོས་འཛིན་ཚད་མས་ངེས། ། དངོས་དང་བརྔས་དང་བརྔོས་རྣམས་ནི། ། དངོས་པོ་རྩྭ་བརྔས་ནས་སོགས་བརྔོས། ། བརྔ་དང་རྔ་དང་ལྔ་རྣམས་ནི། ། རྩྭ་བརྔ་བརྡུངས་རྔ་གྲངས་ཀྱི་ལྔ། ། ངུར་སྔུར་ངུར་བ་སྔུར་བ་འདྲེན། ། རྔུབ་བརྔུབས་དབུགས་རྔུབ་ཧུབ་ཀྱིས་བརྔུབས། ། རྔོ་དངོ་རྔོ་ནད་གྲི་ཡི་དངོ༌། ། ངོགས་རྔོག་འཇུག་ངོགས་རུས་ཀྱི་རྔོག །རྔན་བརྔན་གླ་རྔན་མཆོད་པའི་བརྔན། ། རྔུལ་དངུལ་ལུས་རྔུལ་རིན་ཆེན་དངུལ། ། མངོན་རྔོན་མངོན་གྱུར་རི་དྭགས་རྔོན། ། རྔུ་ངུ་ཟུག་རྔུ་རྟག་ཏུ་ངུ༌། ། སྔོ་བསྔོ་མདོག་སྔོ་དགེ་བ་བསྔོ། ། སྔོགས་བསྔོགས་སྐྱོ་སྔོགས་མཚང་ནས་བསྔོགས། ། རྔེའུ་སྔེའུ་རྔེའུ་ཕྲུག་མོན་སྲན་སྔེའུ། ། ངན་དངན་ངན་འགྲོ་དངན་འཐེན་པ། ། རྔོད་བརྔོད་གླ་རྔོད་བུད་མེད་བརྔོད། ། ངང་སྔངས་ངང་བ་སྐྲག་ནས་སྔངས། ། ངོམ་ངོམས་སྤྱོམས་ངོམ་ཚིམ་པའི་ངོམས། ། སྔས་སྔོས་སྔས་འབོལ་གཞན་ལ་སྔོས། ། རྔམ་རྔམས་བརྗིད་རྔམ་འཐུག་པའི་རྔམས། ། སྔགས་བསྔགས་གསང་སྔགས་བསྟོད་པའི་བསྔགས། །

༼ཅ༽

       གཅིག་གཅུགས་ལྕུག་ལྕིགས་གྲངས་གཅིག་དང༌། ། མཛའ་གཅུགས་ལྕུག་མ་བློ་ཡིས་ལྕིགས། ། ལྕུང་ལྕོང་གཅོང་གཅུང་ལྕུང་ག་དང༌། ། ལྕོང་མོ་གཅོང་རོང་ནུ་བོའི་གཅུང༌། ། ཅོག་གཅོག་ལྕོག་ལྕོགས་ཐོར་ཅོག་དང༌། ། ཤིང་གཅོག་རིའི་ལྕོག་བློ་ཡིས་ལྕོགས། ། བཅམས་གཅམ་ལྕམ་ཅམ་གྲོས་བཅམས་དང༌། ། གཅམ་ཚིག་ལྕམ་དྲལ་ཅམ་གྱིས་འཇོག །ཅུར་བཅུར་བཅིར་གཅུར་ཅུར་ནིས་དང༌། ། འཕྲང་བཅུར་རླན་བཅིར་ཕུག་ཏུ་གཅུར། ། ཅད་བཅད་ཅལ་བཅལ་ཐམས་ཅད་དང༌། ། ཤིང་བཅད་ཅལ་འདྲོག་སྲང་ལ་བཅལ། ། ཅིང་དང་བཅིང་དང་བཅིངས་རྣམས་ནི། ། གློད་ཅིང་བཅིང་བ་ལྔ་ཡིས་བཅིངས། ། གཅི་དང་གཅུ་དང་ལྕི་རྣམས་ནི། ། གཅིན་གཅི་ལུས་གཅུ་བའི་ལྕི་བ། ། ལྕག་དང་ལྕགས་དང་གཅགས་རྣམས་ནི། ། རྟ་ལྕག་མགར་ལྕགས་ཡིད་ལ་གཅགས། ། ཅག་དང་བཅག་དང་བཅགས་རྣམས་ནི། ། རང་ཅག་རྡོ་བཅག་ཞབས་ཀྱིས་བཅགས། ། ཅེས་དང་བཅོས་དང་བཅས་རྣམས་ནི། ། སྟག་ཅེས་བསྟན་བཅོས་དམ་བཅས་པ། ། ཅེ་དང་ལྕེ་དང་གཅེས་རྣམས་ནི། ། ཅེ་སྤྱང་ལྕེ་རྐན་གཅེས་འཛིན་ཆེ། ། ཅི་དང་ཅུ་དང་བཅུ་རྣམས་ནི། ། ཅི་ཞིག་སུམ་ཅུ་བཞི་བཅུ་དང༌། ། ཅེར་དང་གཅེར་དང་བཅེར་རྣམས་ནི། ། སྤྱི་ཅེར་མིག་གཅེར་བུད་ཤིང་བཅེར། ། གཅིས་གཅུས་གཅིན་གཅིས་མགྲིན་པ་གཅུས། ། ཅོ་བཅོ་ཅོ་ཏོ་བཅོ་ལྔ་སོགས། ། ཅང་བཅངས་ཅང་ཤེས་ལག་ཏུ་བཅངས། ། གཅུན་གཅིན་དྲན་གཅུན་དྲི་ཆུའི་གཅིན། ། གཅན་ཅན་གཅན་གཟན་ལྡན་པའི་ཅན། ། ལྕུམ་བཅུམས་ལྕུམ་རྩ་ནང་དུ་བཅུམས། ། ལྕང་གཅང་ལྕང་མ་ཁ་གཅང་བ། ། བཅབས་ཅབ་ཉེས་བཅབས་ཅབ་ཅོབ་ཟ། ། བཅུད་བཅིལ་སྣོད་བཅུད་བཅོམ་པའི་བཅིལ། ། བཅོམ་གཅོམ་དགྲ་བཅོམ་མདུན་གྲོས་གཅོམ། ། ལྕིབས་བཅིབས་ལག་ལྕིབས་ཆིབས་ལ་བཅིབས། ། ཅར་བཅར་མིག་ཅར་ལྟ་བྱེད་བཅར། ། ཅོལ་བཅོལ་ཅོལ་ཆུང་འཕྲིན་ལས་བཅོལ། ། ཅ་བཅའ་ཅ་ཅོ་བཅའ་བ་འཆའ། ། ཅུང་ཅོང་ཅུང་ཟད་རོལ་མོ་ཅོང༌། ། ཅོད་གཅོད་ཅོད་པན་སྡིག་རྒྱུན་གཅོད། །

༼ཆ༽

       ཆོད་འཆོལ་ཆོལ་མཆོད་མཚམས་ཆོད་དང༌། ། རིམ་འཆོལ་ཆོལ་ཟངས་དཀོན་མཆོག་མཆོད། ། ཆུང་མཆོང་མཆོངས་ཆོངས་ཆུང་ངུ་དང༌། ། གཟི་མཆོང་མཆོངས་ལྡིང་ཡིད་ལ་ཆོངས། ། ཆིག་མཆིག་ཆུག་འཆུགས་ཆིག་རྐྱང་དང༌། ། མཆིག་གུ་ཁར་ཆུག་ནོར་བའི་འཆུགས། ། ཆག་ཆགས་འཆག་འཆགས་ཆག་ཤིང་དང༌། ། འདོད་ཆགས་འགྲོ་འཆག་ཉེས་པ་འཆགས། ། མཆོག་དང་ཆོག་དང་ཆོགས་རྣམས་ནི། ། དཀོན་མཆོག་ཆོག་ཤེས་སྣམ་བུ་ཆོགས། ། ཆས་དང་ཆེས་དང་ཆོས་རྣམས་ནི། ། ཆས་ཀ་ཡིད་ཆེས་དམ་པའི་ཆོས། ། ཆང་དང་ཆངས་དང་ཆིངས་རྣམས་ནི། ། རྒུན་ཆང་ཟན་ཆངས་ཞགས་པས་ཆིངས། ། འཆང་དང་འཆིང་དང་མཆིང་རྣམས་ནི། ། སྔགས་འཆང་འཆིང་ཞགས་རྡོ་མཆིང་བུ། ། མཆི་དང་མཆུ་དང་འཆི་རྣམས་ནི། ། འགྲོ་མཆི་ཁ་མཆུ་འགུམ་པའི་འཆི། ། མཆད་དང་འཆད་དང་འཆལ་རྣམས་ནི། ། དུར་མཆད་ཆོས་འཆད་ཚུལ་ཁྲིམས་འཆལ། ། ཆབ་དང་ཆབས་དང་འཆབ་རྣམས་ནི། ། ཆབ་ཤོག་ཆབས་གཅིག་སྦེད་པའི་འཆབ། ། ཆེད་དང་མཆེད་དང་འཆེལ་རྣམས་ནི། ། དགོས་ཆེད་གྲོགས་མཆེད་བརྟེན་པའི་འཆེལ། ། ཆུམས་དང་མཆིམས་དང་འཆུམས་རྣམས་ནི། ། དགྲ་ཆུམས་རུས་མཆིམས་ཞེན་པའི་འཆུམས། ། ཆུན་དང་མཆིན་དང་འཆུན་རྣམས་ནི། ། ཆུན་པོ་མཆིན་པ་སྟོབས་ཀྱིས་འཆུན། ། ཆུད་དང་མཆིད་དང་མཆིལ་རྣམས་ནི། ། ཆུད་མཛའ་འབེལ་མཆིད་མཆིལ་བས་འདྲེན། ། མཆེ་དང་འཆེ་དང་ཆེ་རྣམས་ནི། ། མཆེ་གཙིགས་ཁས་འཆེ་བོངས་སོགས་ཆེ། ། འཆོས་འཆས་ཚུལ་འཆོས་རུས་པ་འཆས། ། ཆུ་འཆུ་ཆུ་ཀླུང་ཡི་ག་འཆུ། ། ཆད་ཆལ་སླན་ཆད་ཆལ་མར་བརྡལ། ། ཆུབ་ཆིབས་བྱང་ཆུབ་ཆིབས་པའི་རྟ། ། ཆེམ་ཆེམས་ཆེམ་སྒྲ་ཁ་ཆེམས་སྨྲ། ། ཆོ་འཆོ་ཆོ་རིགས་བཅའ་བ་འཆོ། ། འཆུས་མཆིས་ཡོ་འཆུས་ཡོད་པའི་མཆིས། ། ཆམ་འཆམས་ཆམ་ནད་གར་གྱི་འཆམས། ། ཆན་མཆན་འབྲས་ཆན་མཆན་གྱི་བུ། ། འཆོར་མཆོར་ཆུ་འཆོར་རྒྱན་གྱིས་མཆོར། ། ཆོམ་འཆོམས་རྐུན་ཆོམ་གྲོས་འཆོམས་ཤིག །ཆར་འཆར་ཆར་བབས་ཉི་མ་འཆར། །

༼ཇ༽

       རྗེ་དང་རྗེས་དང་བརྗེས་རྣམས་ནི། ། རྗེ་བོ་རྗེས་ཐོབ་ཕན་ཚུན་བརྗེས། ། མཇིང་དང་འཇིང་དང་འཇང་རྣམས་ནི། ། སྐེ་མཇིང་རྩ་འཇིང་འཁྲུ་བའི་འཇང༌། ། བརྗིད་དང་རྗུད་དང་ལྗིད་རྣམས་ནི། ། གཟི་བརྗིད་རིད་རྗུད་ལྕིད་ཀྱི་ལྗིད། ། འཇུམས་འཇིམ་ཤ་འཇུམས་འདག་པའི་འཇིམ། ། མཇུག་འཇུག་མཇུག་མ་རྗེས་འཇུག་དང༌། ། འཇིག་འཇིགས་འཇིག་རྟེན་འཇིགས་སྐྲག་ཆེ། ། འཇི་འཇུ་འཇི་བ་བཟའ་བཏུང་འཇུ། ། འཇག་འཇགས་འཇག་མ་ཡིད་ལ་འཇགས། ། འཇོང་འཇུངས་དབྱིབས་འཇོང་སེར་སྣའི་འཇུངས། ། འཇུད་འཇིལ་འཇུད་མཐུན་འཇོམས་པའི་འཇིལ། ། རྗེད་བརྗེད་རྗེད་བྱེད་སྔར་བྱས་བརྗེད། ། ཇི་ཇུ་ཇི་སྲིད་རྡོའི་ཇུ་བོ། ། འཇས་འཇོས་ཞ་འཇས་འོ་མ་འཇོས། ། འཇོལ་མཇོལ་ཁྲལ་འཇོལ་བླ་མར་མཇོལ། ། འཇལ་མཇལ་འདོམ་འཇལ་རྟེན་ལ་མཇལ། །

༼ཉ༽

       རྙིང་བརྙིངས་བརྙངས་བརྙང་གསར་རྙིང་དང༌། ། གོས་བརྙིངས་ཁ་བརྙངས་འཁྲུ་བའི་བརྙང༌། ། རྙིད་རྙིལ་གཉིད་གཉུལ་ལྕང་རྙིད་དང༌། ། སོ་རྙིལ་གཉིད་མཐུག་སོ་བཙུགས་གཉུལ། ། བསྙིལ་སྙིད་བསྙུལ་སྙིལ་ཕྱིར་བསྙིལ་དང༌། ། སྙིད་མོ་བཀྲུས་བསྙུལ་རི་སྙིལ་ཅིག །སྙུགས་བསྙུགས་སྙིགས་བསྙིགས་སྙུགས་བསྲིངས་དང༌། ། སྣུམ་བསྙུགས་དུས་སྙིགས་ལྷུང་བཟེད་བསྙིགས། ། ཉེ་མཉེ་གཉེ་གཉོས་ཉེ་བོ་དང༌། ། ར་མཉེ་གཉེ་མ་རུས་ཀྱི་གཉོས། ། ཉམ་དང་ཉམས་དང་མཉམ་རྣམས་ནི། ། ཉམ་ང་ཉམས་རྟོགས་བཟང་ངན་མཉམ། ། ཉིལ་དང་ཉུལ་དང་ཉིད་རྣམས་ནི། ། རི་ཉིལ་ནགས་ཉུལ་ཆོས་ཉིད་རྟོགས། ། ཉེས་དང་མཉེས་དང་ཉོས་རྣམས་ནི། ། ཕམ་ཉེས་ཐུགས་མཉེས་རིན་གྱིས་ཉོས། ། སྙོལ་དང་བསྙོད་དང་སྙོད་རྣམས་ནི། ། ཆང་སྙོལ་ཟས་བསྙོད་སྐུད་པ་སྙོད། ། སྙད་དང་བསྙད་དང་བསྙལ་རྣམས་ནི། ། ཐ་སྙད་གཏམ་བསྙད་བུ་ཆུང་བསྙལ། ། རྙེད་དང་སྙེད་དང་བསྙེལ་རྣམས་ནི། ། ནོར་རྙེད་ཇི་སྙེད་བརྗེད་པའི་བསྙེལ། ། གཉོག་དང་རྙོག་དང་བརྙོགས་རྣམས་ནི། ། ནོར་གཉོག་ཆུ་རྙོག་ཟས་ཀྱིས་བརྙོགས། ། གཉེར་བསྙེར་དཀོར་གཉེར་ཁྲོ་གཉེར་བསྙེར། ། གཉེན་བསྙེན་བཤེས་གཉེན་དྲུང་དུ་བསྙེན། ། ཉེན་མཉེན་ཁེ་ཉེན་རེག་བྱ་མཉེན། ། ཉན་མཉན་ཉན་རྣ་ཆུའི་མཉན་པ། ། གཉགས་གཉག་རུས་གཉགས་ཉག་པོར་གཉག །གཉུག་གཉིག་གཉུག་མ་གཅིག་གི་གཉིག །མཉེད་མཉེལ་ཀོ་མཉེད་ངལ་བའི་མཉེལ། ། ཉོད་ཉོལ་ཉོད་པ་མལ་དུ་ཉོལ། ། བརྙས་བརྙེས་བརྙས་བཅོས་བདུད་རྩི་བརྙེས། ། སྙིང་བསྙེངས་སྙིང་རྗེ་འཇིགས་པའི་བསྙེངས། ། སྙོམས་སྙོམ་བཏང་སྙོམས་སྙོམ་ལས་པ། ། བསྙུངས་སྙུང་ནོར་བསྙུངས་འབིགས་བྱེད་སྙུང༌། ། རྙོང་རྙོངས་རྙི་རྙོང་ཐུར་དུ་རྙོངས། ། སྙུན་བསྙུན་སྙུན་ནད་ནད་ཀྱིས་བསྙུན། ། བརྙན་གཉན་ཕྱག་བརྙན་རི་དྭགས་གཉན། ། ཉིང་ཉང་ཉིང་ཁུ་རུས་ཀྱི་ཉང༌། ། སྙོན་བསྙོན་སྙོན་མོངས་བསྙོན་འདིང་བ། ། ཉ་ཉྭ་གསེར་ཉ་ཉྭ་སུག་དལ། །

༼ཏ༽

       ཏིང་བཏིང་ཏང་བཏང་ཏིང་ཤགས་དང༌། ། གདན་བཏིང་ཏང་ཀུན་བཟུང་བ་བཏང༌། ། བཏེག་བཏག་བཏགས་གཏག་གྱེན་བཏེག་དང༌། ། བཏག་སོ་ཕྱེ་བཏགས་གདབ་བུས་གཏག །གཏོང་བསྟོངས་སྟོང་སྟོངས་སྦྱིན་གཏོང་དང༌། ། མི་བསྟོངས་སྟོང་ཕྲག་ཟད་ནས་སྟོངས། ། བཏུང་ལྟོང་ལྟུང་བསྟུངས་བཏུང་བ་དང༌། ། མདའ་ལྟོང་ཉེས་ལྟུང་ཐུང་ངུར་བསྟུངས། ། སྟང་སྟངས་ལྟེང་སྟེང་བསྟི་བསྟང་དང༌། ། བཞུགས་སྟངས་ལྟེང་ཀ་ཐོག་གི་སྟེང༌། ། གཏོས་བརྟས་ལྟས་ལྟོས་རིའི་གཏོས་དང༌། ། ལུས་བརྟས་མཚན་ལྟས་མིག་གིས་ལྟོས། ། ཏིལ་བཏུད་བཏུལ་གཏུད་ཏིལ་འབྲུ་དང༌། ། དྲུང་བཏུད་བདུད་བཏུལ་བདུག་སྤོས་གཏུད། ། གཏའ་ལྟ་སྟ་རྟ་གཏའ་མ་དང༌། ། ལྟ་བ་སྟ་རེ་བཞོན་པའི་རྟ། ། བསྟོད་སྟོད་གཏོལ་རྟོད་བསྟོད་བསྔགས་དང༌། ། ལུས་སྟོད་གཏོལ་མེད་རྟོད་ཐག་བསྲིངས། ། བཏོད་རྟོལ་བརྟོལ་གཏོད་སྲོལ་བཏོད་དང༌། ། ནོར་རྟོལ་ས་བརྟོལ་ལག་ཏུ་གཏོད། ། བསྟི་སྟི་གཏི་སྟུ་བསྟི་གནས་དང༌། ། བཀུར་སྟི་གཏི་མུག་བྷ་གའི་སྟུ། ། གཏད་ལྟད་བསྟད་བརྟད་གཉེར་གཏད་དང༌། ། ལྟད་མོ་སྒ་བསྟད་གློ་བུར་བརྟད། ། བརྟགས་རྟགས་རྟག་ལྟག་ཀུན་བརྟགས་དང༌། ། རྟགས་མཚན་རྟག་འཛིན་གཉའ་ལྟག་ཕྱོགས། ། སྟེགས་སྟགས་སྟག་སྟེག་སྟེགས་བུ་དང༌། ། ཡ་སྟགས་མེ་སྟག་སྒེག་ཉམས་སྟེག །གཏིགས་གཏུགས་རྟུག་སྟུག་ཆུ་གཏིགས་དང༌། ། དྲི་གཏུགས་བྲུན་རྟུག་འཐུག་པོའི་སྟུག །གཏར་ལྟར་སྟར་བསྟར་ཁྲག་གཏར་དང༌། ། ལྟར་སྣང་སྟར་བུ་བསྒྲིགས་པའི་བསྟར། ། གཏན་བརྟན་བསྟན་སྟན་སྒོ་གཏན་དང༌། ། བརྟན་བཞུགས་བསྟན་འཛིན་སྟན་ལ་འཁོད། ། བསྟབས་བལྟབས་སྟབས་བརྟབས་ཟས་བསྟབས་དང༌། ། གོས་བལྟབས་སྟབས་གཅིག་བྲེད་པའི་བརྟབས། ། ལྟོགས་དང་རྟོག་དང་རྟོགས་རྣམས་ནི། ། བཀྲེས་ལྟོགས་རྟོག་དཔྱོད་ཚང་མས་རྟོགས། ། རྟུལ་དང་བརྟུལ་དང་བསྟུད་རྣམས་ནི། ། རྟུལ་བོ་བརྟུལ་ཞུགས་སྔ་ཕྱི་བསྟུད། ། གཏང་དང་གཏིང་དང་གཏེང་རྣམས་ནི། ། གཏང་རག་གཏིང་ཟབ་གཏའ་མའི་གཏེང༌། ། རྟིང་དང་བསྟིང་དང་བསྟང་རྣམས་ནི། ། ཕྱི་རྟིང་བསྟིང་ཚིག་དགོན་གྱི་བསྟང༌། ། ཏུར་དང་གཏུར་དང་ལྟིར་རྣམས་ནི། ། ནན་ཏུར་གཏུར་བུ་ལྟིར་གྱིས་བཀང༌། ། བཏོགས་དང་གཏོགས་དང་ཏོག་རྣམས་ནི། ། སྤུ་བཏོགས་ཕྱོགས་གཏོགས་ནོར་བུའི་ཏོག །གཏམ་དང་བལྟམས་དང་གཏམས་རྣམས་ནི། ། གཏམ་སྨྲ་སྐུ་བལྟམས་བཅུད་ཀྱིས་གཏམས། ། གཏུན་དང་བསྟུན་དང་བརྟུན་རྣམས་ནི། ། གཏུན་ཤིང་གཞན་བསྟུན་བརྩོན་པའི་བརྟུན། ། གཏིབས་དང་གཏུབས་དང་བཏུབ་རྣམས་ནི། ། སྤྲིན་གཏིབས་ཤིང་གཏུབས་རུང་བའི་བཏུབ། ། རྟོན་སྟོན་ཡིད་རྟོན་དམ་ཆོས་སྟོན། ། གཏོ་ལྟོ་ཁྲོམ་གཏོ་ལྟོ་བ་ལྡིར། ། སྟེའུ་རྟེའུ་གཞོག་སྟེའུ་རྒོད་མའི་རྟེའུ། ། གཏོར་སྟོར་བསང་གཏོར་བོར་བའི་སྟོར། ། ཏིག་ཏུག་ཏིག་ཏ་ཏུག་ཆོམ་སྒྲ། ། གཏུམ་གཏུམས་གཏུམ་པོ་གཡོགས་པའི་གཏུམས། ། ཏོན་བཏོན་ཁ་ཏོན་ཉིན་བཞིན་བཏོན། ། སྟེམས་ལྟེམ་བྱད་སྟེམས་ལྟེམ་གྱིས་གང༌། ། སྟོབ་སྟོབས་ཟས་སྟོབ་རྩལ་གྱི་སྟོབས། ། ལྟེ་སྟེས་ལྟེ་བ་སྟབས་ལེགས་སྟེས། ། སྟེར་གཏེར་ཟས་སྟེར་འཛད་མེད་གཏེར། ། བསྟེན་བརྟེན་བཤེས་བསྟེན་འཁར་བར་བརྟེན། །

༼ཐ༽

       ཐིངས་མཐིང་འཐིང་མཐང་ལྷུས་ཐིངས་དང༌། ། མཐོན་མཐིང་འཐིང་སླད་སྨད་ཀྱི་མཐང༌། ། ཐི་ཐུ་མཐུ་འཐུ་ཐི་བ་དང༌། ། ཐུ་བོ་མཐུ་ཆེན་མེ་ཏོག་འཐུ། ། ཐིབ་ཐུབ་འཐིབས་འཐུབ་ཐིབ་པོ་དང༌། ། དགྲ་ཐུབ་སྤྲིན་འཐིབས་དུམ་བུར་འཐུབ། ། ཐུག་དང་ཐུགས་དང་མཐུག་རྣམས་ནི། ། ཐུག་འཕྲད་ཐུགས་རྗེ་སྟུག་པོའི་མཐུག །ཐག་དང་འཐག་དང་ཐགས་རྣམས་ནི། ། ཉམ་ཐག་ཕྱེ་འཐག་ཚེམས་ཐགས་བཟང༌། ། ཐུང་དང་ཐོངས་དང་འཐུངས་རྣམས་ནི། ། ཐུང་ངུ་ཐོངས་ཤིག་སྐོམ་སྐྱེམས་འཐུངས། ། ཐེངས་དང་འཐེང་དང་ཐང་རྣམས་ནི། ། ཐེངས་གཅིག་ཞ་འཐེང་མཉམ་བདེའི་ཐང༌། ། མཐིལ་དང་མཐུད་དང་འཐུལ་རྣམས་ནི། ། ལག་མཐིལ་ཆད་མཐུད་དྲི་བསུང་འཐུལ། ། ཐབ་དང་ཐབས་དང་འཐབ་རྣམས་ནི། ། ཐབ་ཀ་ཐབས་མཁས་དགྲ་ལ་འཐབ། ། ཐམ་དང་ཐམས་དང་འཐམས་རྣམས་ནི། ། ཐམ་ག་ཐམས་ཅད་མཛའ་མོར་འཐམས། ། ཐོས་དང་མཐོས་དང་འཐས་རྣམས་ནི། ། སྒྲ་ཐོས་མདའ་མཐོས་སྲ་ཞིང་འཐས། ། ཐོད་དང་ཐོལ་དང་མཐོལ་རྣམས་ནི། ། མགོ་ཐོད་ཐོལ་བྱུང་སྡིག་པ་མཐོལ། ། ཐེབས་དང་མཐེབ་དང་འཐེབ་རྣམས་ནི། ། བཤོལ་ཐེབས་མཐེབ་རྩལ་མལ་གོས་འཐེབ། ། ཐོག་དང་ཐོགས་དང་འཐོག་རྣམས་ནི། ། ཐོག་མདའ་ཐོགས་མེད་ཁ་སྤུ་འཐོག །ཐེ་དང་མཐེ་དང་ཐེའུ་རྣམས་ནི། ། ཐེ་གཏོགས་མཐེ་བོང་ཐེའུ་རང་བསྐྲད། ། མཐོན་དང་འཐོན་དང་ཐོན་རྣམས་ནི། ། མཐོན་ཀ་མགོ་འཐོན་འགྲུལ་བ་ཐོན། ། ཐད་དང་ཐལ་དང་འཐད་རྣམས་ནི། ། ཐད་ཀ་ཐལ་འགྱུར་བློ་ལ་འཐད། ། ཐུན་དང་འཐུན་དང་མཐུན་རྣམས་ནི། ། ཐུན་མོང་འཇུད་འཐུན་ཀུན་དང་མཐུན། ། ཐིམ་དང་ཐུམ་དང་འཐུམ་རྣམས་ནི། ། ཆུར་ཐིམ་གླེགས་ཐུམ་གོས་ཀྱིས་འཐུམ། ། ཐིག་ཐིགས་ཐིག་གདབ་ཐིགས་པ་ཟགས། ། ཐེག་ཐེགས་ཐེག་ཆེན་ལམ་ལ་ཐེགས། ། མཐོང་མཐོངས་གཟུགས་མཐོང་ནམ་མཁའི་མཐོངས། ། ཐེལ་ཐེད་ཐེལ་ཚེ་ཐེད་ལ་བོར། ། ཐ་མཐའ་ཐ་མལ་མཐའ་འཁོབ་དང༌། ། ཐུལ་ཐུད་དགྲ་ཐུལ་མར་ཆུར་ཐུད། ། ཐན་འཐན་བཙའ་ཐན་ནན་ཏན་འཐན། ། ཐུར་མཐུར་གྱེན་ཐུར་རྟ་ཡི་མཐུར། ། ཐོ་མཐོ་ཐོ་ཅོ་དཔངས་སུ་མཐོ། ། ཐོར་འཐོར་ཐོར་ཅོག་ཕྱོགས་སུ་འཐོར། ། ཐོམ་འཐོམས་ཤིང་ཐོམ་མགོ་བོ་འཐོམས། ། ཐེམ་འཐེམས་ཐེམ་སྐས་ནན་ཆག་འཐེམས། ། མཐར་ཐར་མཐར་ཐུག་ཐར་པ་ཐོབ། །

༼ད༽

       གདའ་བདའ་བརྡ་ལྡ་ཡོད་གདའ་དང༌། ། རོ་བདའ་དུང་བརྡ་ལྡ་ལྡི་བྲེས། ། བདུངས་གདོང་གདུང་གདུངས་གཞུ་བདུངས་དང༌། ། ངོ་གདོང་རུས་གདུང་ནད་ཀྱིས་གདུངས། ། དྲག་དྲགས་དྲེག་དྲེགས་དྲག་པོ་དང༌། ། ཐལ་དྲགས་དྲེག་ནད་ཁེངས་དྲེགས་ཆེ། ། ལྡིང་ལྡེང་ལྡངས་ལྡང་མཁའ་ལྡིང་དང༌། ། སེང་ལྡེང་ནེའུ་ལྡངས་དྲི་བསུང་ལྡང༌། ། རྡུང་བརྡུངས་བརྡུང་བསྡོངས་འཚོག་རྡུང་དང༌། ། ལྕགས་བརྡུངས་གྲོ་བརྡུང་གྲོགས་ལ་བསྡོངས། ། བདེ་སྡེ་ལྡེ་རྡེའུ་བདེ་སྐྱིད་དང༌། ། སྡེ་ཚན་རེ་ལྡེ་རྡོ་ཆུང་རྡེའུ། ། བསྡོགས་རྡོག་ལྡོག་བདོག་ཉེར་བསྡོགས་དང༌། ། ཕྲེང་རྡོག་སླར་ལྡོག་ཡོད་པའི་བདོག །གདུལ་བདུད་སྡུད་ལྡུད་གདུལ་བྱ་དང༌། ། བདུད་རྩི་ཚུར་སྡུད་འོ་མ་ལྡུད། ། ལྡུམ་རྡུམ་སྡུམ་བསྡུམས་རྩྭ་ལྡུམ་དང༌། ། ལག་རྡུམ་སྡུམ་པ་འཁོན་པ་བསྡུམས། ། སྡིགས་སྡུག་རྡུགས་ལྡུགས་སྡིགས་མཛུབ་དང༌། ། སྡུག་བསྔལ་ཐབས་རྡུགས་སྣོད་དུ་ལྡུགས། ། གདབ་བལྡབས་རྡབ་བརྡབས་གདབ་ལས་དང༌། ། བསྐྱར་བལྡབས་རྡབ་འཆལ་གཏོར་མ་བརྡབས། ། བདར་གདར་སྡར་བརྡར་ཕྱི་བདར་དང༌། ། གདར་རྡོ་སྡར་མ་སྤུ་གྲི་བརྡར། ། འདྲིལ་འདྲུད་འདྲིལ་འདྲུལ་སྐྲན་འདྲིལ་དང༌། ། སར་འདྲུད་བློ་འདྲིལ་རུལ་འགྱུར་འདྲུལ། ། ལྡེབས་རྡེབ་སྡེབ་བསྡེབས་གྱང་ལྡེབས་དང༌། ། ཕུར་རྡེབ་སྡེབ་སྦྱོར་ལྷན་གཅིག་བསྡེབས། ། དོང་དང་དུང་དང་དུངས་རྣམས་ནི། ། དོང་ཟབ་ཆོས་དུང་ཡུལ་ལ་དུངས། ། གདལ་དང་ལྡད་དང་བལྡད་རྣམས་ནི། ། ཁྱབ་གདལ་ལྡད་བྱེད་སོ་ཡིས་བལྡད། ། བལྡག་དང་བལྡགས་དང་ལྡེག་རྣམས་ནི། ། བལྡག་བྱ་ལྕེས་བལྡགས་གཡོ་བའི་ལྡེག །རྡལ་དང་བསྡད་དང་བརྡལ་རྣམས་ནི། ། གྲོང་རྡལ་མལ་བསྡད་ཐང་མར་བརྡལ། ། སྡོང་དང་ལྡོང་དང་ལྡོངས་རྣམས་ནི། ། ཤིང་སྡོང་ལྡོང་རོས་བློ་མིག་ལྡོངས། ། གདེག་དང་གདགས་དང་བརྡེགས་རྣམས་ནི། ། གྱེན་གདེག་གདགས་གཞི་དབྱུག་པས་བརྡེགས། ། དྲིང་དང་དྲང་དང་དྲངས་རྣམས་ནི། ། གཞན་དྲིང་དྲང་དོན་གནས་ནས་དྲངས། ། དྲེ་དང་དྲས་དང་དྲེས་རྣམས་ནི། ། མོན་དྲེ་དྲས་དྲུབ་རྩ་དྲེས་མ། ། དྭངས་དང་དེང་དང་དེངས་རྣམས་ནི། ། དྭངས་གསལ་དེང་དུས་གཞན་དུ་དེངས། ། མདུང་དང་མདོངས་དང་འདོང་རྣམས་ནི། ། མདའ་མདུང་སྒྲོ་མདོངས་འགྲོ་བའི་འདོང༌། ། མདུད་དང་འདུད་དང་འདུལ་རྣམས་ནི། ། སྲུང་མདུད་གུས་འདུད་མ་རུངས་འདུལ། ། གདམ་དང་གདམས་དང་བསྡམས་རྣམས་ནི། ། གདམ་ང་གདམས་ངག་ཉེས་པ་བསྡམས། ། བསྡུར་དང་ལྡིར་དང་ལྡུར་རྣམས་ནི། ། གྲོས་བསྡུར་འབྲུག་ལྡིར་ཐུག་པ་ལྡུར། ། འདིང་དང་འདང་དང་འདེང་རྣམས་ནི། ། སྟན་འདིང་ཕྱེས་འདང་སང་ཉིན་འདེང༌། ། གདུས་དང་བསྡུས་དང་ལྡུས་རྣམས་ནི། ། སྨན་གདུས་མདོར་བསྡུས་ལྷག་མ་ལྡུས། ། དྲུང་དང་དྲོངས་དང་དྲུངས་རྣམས་ནི། ། ཞབས་དྲུང་སྤྱན་དྲོངས་དྲུངས་ནས་ཕྱུང༌། ། སྡོམ་དང་བསྡོམས་དང་ལྡོམ་རྣམས་ནི། ། སྲིན་སྡོམ་ཁྱོན་བསྡོམས་ལྡོམ་བུ་པ། ། སྡོ་དང་བདོ་དང་རྡོ་རྣམས་ནི། ། སྲོག་སྡོ་དར་བདོ་རྡོ་བྲག་རྡོ། ། གདུགས་དང་གདུག་དང་བདུག་རྣམས་ནི། ། དབུ་གདུགས་གདུག་རྩུབ་སྤོས་ཀྱིས་བདུག །གདེང་དང་གདངས་དང་གདེངས་རྣམས་ནི། ། གདེང་ཐོབ་གདངས་སྙན་གདེངས་ཀ་བརྗིད། ། གདིང་གདང་གདིང་བ་གོས་ཀྱི་གདང༌། ། སྡང་རྡང་ཆགས་སྡང་འདོགས་ཐག་རྡང༌། ། སྡིག་བསྡིགས་སྡིག་ཅན་གཞན་ལ་བསྡིགས། ། འདྲད་འདྲལ་སེན་འདྲད་བཅས་ཁྲིམས་འདྲལ། ། མདོས་འདས་མདོས་གླུད་མྱ་ངན་འདས། ། མདང་མདངས་མཚན་མདང་ཚོན་གྱི་མདངས། ། འདད་འདལ་ཆགས་འདད་སྣག་ཚ་འདལ། ། ད་དྭ་ད་ལྟ་དྭ་ཕྲུག་མང༌། ། དོད་དོལ་ཚབ་དོད་ཉ་ཡི་དོལ། ། དྲེལ་དྲེད་རྟ་དྲེལ་གཅན་གཟན་དྲེད། ། དྲིལ་དྲུད་ཤོག་དྲིལ་ས་ལ་དྲུད། ། ལྡེར་སྡེར་ལྡེར་སྐུ་སྡེར་མོ་རྣོ། ། འདྲི་འདྲུ་གཏམ་འདྲི་ཁུང་བུ་འདྲུ། ། མདའ་འདའ་མདའ་གཞུ་མྱ་ངན་འདའ། ། འདི་འདུ་འདི་ཉིད་འདུ་ལོང་བྱེད། ། འདོ་མདོ་འདོ་མེད་ལུང་བའི་མདོ། ། མདེ་འདེ་མདེའུ་མེ་ལ་འདེ། ། གདུ་བསྡུ་སྨན་གདུ་ཡུལ་ཁྲལ་བསྡུ། ། གདོད་སྡོད་གདོད་མ་མལ་ལ་སྡོད། ། འདྲེ་འདྲེས་འདྲེ་གདོན་འོ་ཆུ་འདྲེས། ། འདབ་འདབས་པད་འདབ་གྲོང་གི་འདབས། ། མདོར་འདོར་མདོར་བསྡུས་སྙིགས་མ་འདོར། ། དྲོག་དྲོགས་ཁ་དྲོག་ཁུར་བོའི་དྲོགས། ། དག་དྭགས་རྣམ་དག་རི་དྭགས་དང༌། ། གདན་ལྡན་གདན་ཁྲི་སྐལ་ལྡན་བུ། ། འདོད་འདོལ་ཅི་འདོད་ས་གཤིན་འདོལ། ། གདོལ་རྡོལ་གདོལ་བ་ཆུ་མིག་རྡོལ། ། དྲུ་དྲི་དྲུ་གུ་སྤོས་ཀྱི་དྲི། ། མདོག་འདོགས་ཚོན་མདོག་རྟ་དྲེལ་འདོགས། ། འདོམ་འདོམས་ལག་འདོམ་གསང་ནས་འདོམས། ། རྡིབ་ལྡིབ་ཐོག་རྡིབ་ལྡབ་ལྡིབ་སྐད། ། དོག་དོགས་ཁྱོན་དོག་དོགས་ཟོན་བྱེད། ། དུས་དེས་དུས་ཚོད་རྒྱུད་འཇམ་དེས། ། རྡོབ་ལྡོབས་ཕེག་རྡོབ་ཆོས་ལྡོབས་སྐྱེན། ། ལྡོག་རྡོག་འགྲོ་ལྡོག་རྡོག་པས་བྱེད། ། གདས་གདོས་གདས་སྨྲ་གདོས་པ་འཛིན། ། བདས་བསྡོས་ཕྱུགས་བདས་སྲོག་ལ་བསྡོས། ། དུག་དུགས་དུག་ཟོས་དུགས་ཀྱིས་བཅོས། ། རྡོར་སྡོར་གྲི་རྡོར་ཐུག་སྡོར་གཏུབ། ། དིང་དང་དིང་སང་དང་བ་སྐྱེ། ། གདོན་ལྡོན་ཀློག་གདོན་དྲི་ལན་ལྡོན། །

༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005