གནས་ཡུལ། མདུན་ངོས། སུམ་རྟགས་དག་གསུམ།
 
 
༄༅།། སུམ་རྟགས་རྩ་བ།
སྤེལ་དུས།2015-04-15   ཡོང་ཁུངས་།བོད་ལྗོངས་རིན་གནས་དྲ་བ།   རྩོམ་པ་པོ། དབྱངས་ཅན་གྲུབ་པའི་རྡོ་རྗེ།

༄༅། །ལེགས་བཤད་ལྗོན་དབང་དང་དཀའ་གནད་གསལ་མེ་བཞུགས་སོ། །

དབྱངས་ཅན་གྲུབ་པའི་རྡོ་རྗེ། 

ལྗོན་དབང་དང་དཀའ་གནད་གསལ་མེའི་རྩ་བ།
ན་མོ་གུ་རུ་མཉྫུ་གྷོ་ཥཱ་ཡ།
བླ་མ་མཆོག་དང་དབྱེར་མེད་པའི། །
འཇམ་པའི་དབྱངས་ལ་གུས་བཏུད་ནས། །
ཐོན་མིའི་ལེགས་བཤད་སུམ་ཅུ་པའི། །
སྙིང་པོ་མདོར་བསྡུས་བཤད་པར་བྱ། །
དབྱངས་ཀྱི་བྱ་བ་གསལ་བོ་རུ། །
བྱེད་པ་ཨི་ཨུ་ཨེ་ཨོ་བཞི། །
གསལ་བྱེད་ཀ་སོགས་སུམ་ཅུ་ཡིན། །
ག་ང་ད་ན་བ་མ་འ། །
ར་ལ་ས་རྣམས་རྗེས་འཇུག་བཅུ། །
ད་དང་ས་གཉིས་ཡང་འཇུག་སྟེ། །
ད་ནི་ན་ར་ལ་གསུམ་དང༌། །
ས་ནི་ག་ང་བ་མར་འཐོབ། །
ག་ད་བ་མ་འ་སྔོན་འཇུག །
གོ་ངོ་དོ་ནོ་བོ་མོ་འོ། །
རོ་ལོ་སོ་ཏོ་སླར་བསྡུ་སྟེ། །
རྫོགས་ཚིག་ཟླ་སྡུད་ཅེས་ཀྱང་བྱ། །
དྲག་ཡོད་ཏོ་དང་མཐའ་མེད་འོ། །
གཞན་རྣམས་མིང་མཐའི་རྗེས་མཐུན་སྦྱར། །
སུ་ར་རུ་དུ་ན་ལ་ཏུ། །
ལ་དོན་རྣམ་པ་བདུན་ཡིན་ཏེ། །
རྣམ་དབྱེ་གཉིས་བཞི་བདུན་པ་དང༌། །
དེ་ཉིད་ཚེ་སྐབས་རྣམས་ལ་འཇུག །
ས་སུ་ག་བ་དྲག་མཐར་ཏུ། །
ང་ད་ན་མ་ར་ལ་དུ། །
འ་དང་མཐའ་མེད་ར་དང་རུ། །
གི་ཀྱི་གྱི་འི་ཡི་ལྔ་པོ། །
རྣམ་དབྱེ་དྲུག་པ་འབྲེལ་སྒྲ་དང༌། །
དེ་རྣམས་ས་མཐའ་ཅན་ལྔ་ནི། །
རྣམ་དབྱེ་གསུམ་པ་བྱེད་སྒྲ་སྟེ། །
སྦྱོར་ཚུལ་ན་མ་ར་ལ་གྱི། །
ད་བ་ས་ཀྱི་ག་ང་གི །
འ་དང་མཐའ་མེད་འི་དང་ཡི། །
ཀྱང་ཡང་འང་གསུམ་རྒྱན་སྡུད་དེ། །
ག་ད་བ་ས་དྲག་མཐར་ཀྱང༌། །
ང་ན་མ་ར་ལ་མཐར་ཡང༌། །
འ་དང་མཐའ་མེད་འང་དང་ཡང༌། །
ཏེ་དེ་སྟེ་གསུམ་ལྷག་བཅས་ཏེ། །
ན་ར་ལ་ས་དྲག་མཐར་ཏེ། །
ད་དེ་ག་ང་བ་མ་འ། །
མཐའ་མེད་རྣམས་ལ་ས་སྟེ་འཐོབ། །
གམ་ངམ་དམ་ནམ་བམ་མམ་འམ། །
རམ་ལམ་སམ་ཏམ་འབྱེད་སྡུད་དེ། །
སྦྱོར་ཚུལ་སླར་བསྡུའི་སྐབས་དང་མཚུངས། །
ར་རུ་འི་ཡི་འང་ཡང་རྣམས། །
རྐང་པ་མི་སྐོང་སྐོང་བའི་ཁྱད། །
འོ་འུ་འམ་གྱི་གོང་དུ་ཚེག །
མེད་དང་ཡོད་པའང་དེ་བཞིན་ཡིན། །
ནས་ལས་འབྱུང་ཁུངས་དགར་སྡུད་དེ། །
འབྱུང་ཁུངས་དངོས་ལ་གང་སྦྱར་འཐུས། །
རིགས་མཐུན་དགར་ནས་མི་མཐུན་ལས། །
སྡུད་ལ་ནས་སྒྲ་ཁོ་ན་འཇུག །
ཀྱེ་དང་ཀྭ་ཡེ་བོད་སྒྲ་སྟེ། །
ཕལ་ཆེར་མིང་གི་ཐོག་མར་སྦྱོར། །
ནི་ནི་དགར་དང་བརྣན་པའི་སྒྲ། །
དང་ནི་སྡུད་འབྱེད་རྒྱུ་མཚན་དང༌། །
ཚེ་སྐབས་གདམས་ངག་ལྔ་ལ་འཇུག །
མིང་གི་ཐོག་མའི་དེ་སྒྲ་ནི། །
ཐ་སྙད་འདས་མ་ཐག་པ་དང༌། །
རྣམ་གྲངས་གཞན་ཅན་གཉིས་ལ་འཇུག །
ཅི་ཇི་སུ་གང་སྤྱི་སྒྲ་སྟེ། །
ཞིག་སྟེ་སླད་འདྲ་ཕྱིར་ལ་ཅི། །
སྙེད་སྲིད་ལྟར་བཞིན་སྐད་ལ་ཇི། །
སུ་ནི་གང་ཟག་གང་ཀུན་ལའོ། །
ན་རོ་ཡོད་མེད་པ་བ་མ། །
བདག་པོའི་སྒྲ་སྟེ་ག་ད་ན། །
བ་མ་ས་དང་དྲག་མཐར་པ། །
ང་འ་ར་ལ་མཐའ་མེད་ལ། །
བདག་སྒྲ་ཡར་གྱུར་བ་དང་ནི། །
ཆ་ལ་པ་ཉིད་སྦྱོར་བ་ལེགས། །
མིང་མཐའི་པ་བའང་ཕལ་ཆེར་འདྲ། །
མ་ནི་ངེས་མེད་སྐབས་དང་སྦྱར། །
མ་མི་མེད་མིན་དགག་སྒྲ་སྟེ། །
མ་མི་ཐོག་མ་མེད་མིན་མཇུག །
མ་ནི་བར་གྱི་གསལ་བྱེད་ལའང༌། །
ཚིག་ཕྲད་ཞིང་སོགས་ང་ན་མ། །
འ་དང་ར་ལ་མཐའ་མེད་མཐར། །
ཞིང་ཞེས་ཞེ་འོ་ཞེ་ན་ཞིག །
ག་ད་བ་དང་ད་དྲག་མཐར། །
ཅིང་ཅེས་ཅེ་འོ་ཅེ་ན་ཅིག །
ས་མཐར་དམིགས་བསལ་ཞེས་མ་གཏོགས། །
ཤིང་ཤིག་ཤེ་འོ་ཤེ་ན་འཐོབ། །
འོན་ཀྱང་ཁ་ཅིག་ལྷན་ཅིག་སོགས། །
མིང་གི་ཆ་དང་མ་ནོར་གཅེས། །
རྐྱང་པ་འཕུལ་ལ་འ་མཐའ་དགོས། །
གུག་ཀྱེད་བརྩེགས་འདོགས་ཅན་ལ་སྤང༌། །
ལྷུག་པའི་དོན་མང་མིང་མཚམས་དང༌། །
དོན་འབྲིང་འབྱེད་དང་དོན་ཉུང་རྫོགས། །
ཚིགས་བཅད་ག་མཐར་ཆིག་ཤད་བྱ། །
རྫོགས་ཚིག་མཐའ་ཅན་ལྷུག་པ་དང༌། །
ཚིགས་བཅད་རྐང་མཐར་ཉིས་ཤད་འཐོབ། །
དོན་ཚན་ཆེན་མོ་རྫོགས་པ་དང༌། །
ལེའུའི་མཚམས་སུ་བཞི་ཤད་དགོས། །
ང་ཡིག་མ་གཏོགས་ཡིག་ཤད་བར། །
ཚེག་མེད་དེ་སོགས་ཞིབ་ཏུ་འབད། །
ཚིག་གི་ལོ་མས་མ་བསྒྲིབས་ཤིང༌། །
དོན་གྱི་འབྲས་བུ་གཡུར་ཟ་བའི། །
ལེགས་བཤད་ལྗོན་པའི་དབང་པོ་འདི། །
དབྱངས་ཅན་གྲུབ་པའི་རྡོ་རྗེས་སྤེལ། །
ཤུབྷཾ།། །།

རྟགས་འཇུག་གི་སྙིང་པོ་དཀའ་གནད་གསལ་མེ་བཞུགས་སོ། །
ན་མོ་མཉྫུ་ཤྲི་ཡེ།
རྒྱལ་ཀུན་མཁྱེན་པའི་ཡེ་ཤེས་དཔྱིད། །
གཞོན་ནུའི་གཟུགས་ཀྱིས་རྣམ་རོལ་བ། །
རྗེ་བཙུན་བརྟན་པའི་འཁོར་ལོ་དང༌། །
དབྱེར་མེད་བླ་མའི་ཞབས་བཏུད་ནས། །
མཁས་མཆོག་ཐོན་མིའི་ཐུགས་མཚོ་ལས། །
བྱུང་བའི་བརྡ་སྤྲོད་ཕྱི་མོ་མཆོག །
རྟགས་ཀྱི་འཇུག་པའི་སྙིང་པོའི་དོན། །
མདོར་བསྡུས་ཚིག་གིས་གསལ་བར་བྱ། །
སྤྱིར་ན་དབྱངས་མོ་གསལ་བྱེད་ཕོ། །
དེ་ཕྱིར་ཀ་ལི་སུམ་ཅུ་པོ། །
ཕོ་ཡི་ཡི་གེ་འབའ་ཞིག་ལ། །
ནང་གསེས་སྡེ་ཚན་ལྔར་དབྱེ་སྟེ། །
ཀ་ཅ་ཏ་པ་ཙ་རྣམས་ཕོ། །
ཁ་ཆ་ཐ་ཕ་ཚ་མ་ནིང༌། །
ག་ཇ་ད་བ་ཛ་ཝ་ཞ། །
ཟ་འ་ཡ་ཤ་ས་རྣམས་མོ། །
ང་ཉ་ན་མ་ཤིན་ཏུ་མོ། །
ར་ལ་ཧ་ཨ་མོ་གཤམ་སྟེ། །
ཨ་ནི་མཚན་མེད་ཅེས་ཀྱང་བྱ། །
སྔོན་འཇུག་ལྔ་ཡི་བ་ཡིག་ཕོ། །
ག་ད་མ་ནིང་འ་མོ་ཡིག །
མ་ནི་ཤིན་ཏུ་མོ་ཡིན་ནོ། །
དེ་རྣམས་གང་ལ་གང་འཇུག་ན། །
ཕོ་ཡིག་བ་ནི་ཀ་ཅ་ཏ། །
ཙ་ག་ང་ཇ་ཉ་ད་ན། །
ཛ་ཞ་ཟ་ར་ཤ་སར་འཇུག །
མ་ནིང་ག་ནི་ཅ་ཏ་ཙ། །
ཉ་ད་ན་ཞ་ཟ་ཡ་ཤ །
སར་འཇུག་མ་ནིང་ད་ཡིག་ནི། །
ཀ་པ་ག་བ་ང་མར་འཇུག །
མོ་ཡིག་འ་ནི་ག་ཇ་ད། །
བ་ཛ་ཁ་ཆ་ཐ་ཕ་ཚར། །
ཤིན་ཏུ་མོ་ཡི་མ་ཡིག་ནི། །
ཁ་ཆ་ཐ་ཚ་ག་ཇ་ད། །
ཛ་ང་ཉ་ན་རྣམས་ལ་འཇུག །
ཇི་ལྟར་འཇུག་པར་བྱེད་ཅེ་ན། །
ཕོ་ནི་སྒྲ་རྩོལ་དྲག་པར་འཇུག །
མ་ནིང་རན་པར་འཇུག་པ་ཡིན། །
མོ་ནི་ཞན་པའི་ཚུལ་གྱིས་ཏེ། །
ཤིན་ཏུ་མོ་ནི་མཉམ་པས་སོ། །
ཅི་ཕྱིར་འཇུག་པར་བྱེད་ཅེ་ན། །
ཐོག་མར་འདི་ལྟར་ཤེས་དགོས་ཏེ། །
ལས་གང་ཞིག་ལ་བྱེད་པ་པོ། །
གཞན་དང་དངོས་སུ་འབྲེལ་བ་ཡི། །
དབང་དུ་བྱས་ནས་བྱེད་པོ་དང༌། །
དེ་ཡི་བྱེད་པ་གཉིས་པོ་ནི། །
དངོས་པོ་བདག་ཡིན་བྱ་ཡུལ་དང༌། །
བྱ་བ་གཉིས་པོ་དངོས་པོ་གཞན། །
དེ་བཞིན་བྱེད་པ་པོ་གཞན་དང༌། །
དངོས་སུ་འབྲེལ་མིན་ཇི་ལྟར་ཡང༌། །
བྱ་བ་བྱས་ཟིན་འདས་པ་དང༌། །
བྱ་བ་བྱེད་འགྱུར་མ་འོངས་དང༌། །
བྱེད་བཞིན་པ་ནི་ད་ལྟ་བ། །
དེ་ཕྱིར་དུས་གསུམ་དབྱེ་བས་ནི། །
བྱེད་ལས་དང་འབྲེལ་ངག་གི་ནི། །
སྦྱོར་བ་ཀུན་ལ་ཁྱབ་པ་ཡིན། །
བདག་གཞན་དབྱེ་བས་དེ་ཙམ་དུ། །
ཁྱབ་པ་མིན་ཡང་བྱེད་པོ་དང༌། །
བྱ་ཡུལ་བསྡུ་ཕྱིར་དབྱེ་བ་དེ། །
མཛད་ནས་བདག་གཞན་དང་འབྲེལ་བའི། །
བྱ་བྱེད་རྣམས་ཀྱང་དེ་ཁོངས་བསྡུས། །
དེས་ན་དུས་གསུམ་དུ་དབྱེ་བས། །
བདག་གཞན་དབྱེ་བས་མ་ཁྱབ་པ། །
བསྡུ་བའི་དོན་དུ་ཤེས་དགོས་པར། །
གསུངས་ཀྱང་སྔོན་འཇུག་འ་ཡིག་སྐབས། །
བྱེད་ལས་ཙམ་དང་འབྲེལ་བ་ཡི། །
དངོས་པོ་བདག་ལའང་འཇུག་པ་མཐོང༌། །
དེ་ལྟར་ངེས་ནས་ཕོ་ཡིག་བ། །
བསྒྲུབས་སོ་ལྟ་བུ་འདས་པ་དང༌། །
བསྒྲུབ་བྱའི་ལྟ་དང་བསྒྲུབ་པར་བྱ། །
ཞེས་སོགས་དངོས་པོ་གཞན་ལ་འཇུག །
མ་ནིང་ག་ད་གཉིས་པོ་ནི། །
གཅོད་པ་པོ་དང་གཅོད་པར་བྱེད། །
གཅོད་པར་འགྱུར་དང་དཀྲི་བ་པོ། །
དཀྲི་བར་བྱེད་དང་དཀྲི་བར་འགྱུར། །
ཞེས་སོགས་དངོས་པོ་བདག་དོན་དང༌། །
གཅད་བྱའི་ཤིང་དང་གཅད་པར་བྱ། །
དཀྲི་བྱའི་སྣལ་མ་དཀྲི་བར་བྱ། །
ཞེས་སོགས་དངོས་པོ་གཞན་དོན་དང༌། །
གཅོད་བཞིན་པ་དང་དཀྲི་བཞིན་པ། །
ཞེས་སོགས་ད་ལྟ་བསྒྲུབ་ཆེད་འཇུག །
མོ་ཡིག་འ་ནི་འཆད་པ་པོ། །
འཆད་པར་བྱེད་དང་འཆད་པར་འགྱུར། །
ཞེས་སོགས་དངོས་པོ་བདག་དངོས་དང༌། །
འགྲོ་བ་པོ་དང་འགྲོ་བར་བྱེད། །
ཅེས་སོགས་བདག་དོན་ཕལ་བ་དང༌། །
འཁྱིལ་ལོ་ཞེས་སོགས་ད་ལྟ་དང༌། །
འཁྱིལ་བར་འགྱུར་སོགས་མ་འོངས་འཇུག །
ཤིན་ཏུ་མོ་ཡི་མ་ཡིག་ནི། །
བདག་གཞན་དུས་གསུམ་མཉམ་པར་འཇུག །
འོན་ཀྱང་བྱེད་པོ་གཞན་དངོས་དང༌། །
འབྲེལ་བའི་འདས་ལ་འའི་སྔོན་འཇུག །

༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005