ཆོས་རྗེ་དོན་གྲུབ་རིན་ཆེན་（༡༣༠༩-༡༣༨༥）ནི་མདོ་སྨད་ཡུལ་དུ་སྐུ་འཁྲུངས་ཤིང་ལོ་ན་གཞོན་པའི་དུས་ནས་དབུས་གཙང་དག་པའི་ཞིང་དུ་བྱོན་ཏེ་མཆིམས་བློ་བཟང་གྲགས་པ་སོགས་དགེ་བའི་བཤེས་གཉེན་མང་པོ་ཚུལ་བཞིན་དུ་བསྟེན་ནས་མཁས་པའི་ཕ་རོལ་ཏུ་སོན་ལ། ལྷག་པར་དུ་ཞ་ལུར་གྲྭ་སྐོར་དུ་བྱོན་ཏེ་བུ་སྟོན་ཐམས་ཅད་མཁྱེན་པ་དང་ཆོས་ཀྱི་བགྲོ་གླེང་མཛད་པ་ནས་ཤར་ཕྱོགས་པ་རིགས་པའི་དཔའ་བོ་ཞེས་མཚན་སྙན་གྲགས་ཆེས་ཆེར་རྒྱས་ནའང་། ཡིད་ཕངས་པ་ཞིག་ལ། ཁོང་གི་སློབ་མ་རྣམས་ཀྱིས་རྣམ་ཐར་ལ་དེ་འདྲའི་དང་དོད་ཅིག་མ་བྱས་པར་མངོན། རྗེས་སུ་ཁོང་གི་སྲས་ཀྱི་ཐུ་བོ་མཉམ་མེད་ཙོང་ཁ་བ་ཆེན་པོའི་མཚན་སྙན་གྲགས་བོད་ཁམས་ལ་ཁྱབ་པ་དང་མཉམ་དུ་ཆོས་རྗེ་དོན་གྲུབ་རིན་ཆེན་གྱི་རྣམ་ཐར་ལའང་མཉམ་འཇོག་བྱེད་མཁན་རེ་གཉིས་ཤིག་བྱུང་ནའང་དེ་འདྲའི་གསལ་ཐག་ཆོད་པ་ཞིག་འབྲི་མ་ཐུབ། དེའི་སྟབས་ཀྱིས་ཁོང་གི་བྱེ་བྲག་གི་འཁྲུངས་ཡུལ་ཡང་ད་ལྟའི་བར་དུ་གསལ་བོ་ཞིག་བཤད་རྒྱུ་མེད། འོན་ཀྱང་གཅན་ཚ་ཉིན་སྲིབ་ན་ཁོང་གི་ཞབས་རྗེས་དང་ཕྱག་རྗེས་ངག་རྒྱུན་ཤིན་ཏུ་མོད་པོ་ཞིག་ད་ལྟའང་མ་ཉམས་པར་ཡོད་པ་འདིས་ཀྱང་ཁོང་གི་རྣམ་ཐར་གྱི་ཆད་པ་རེ་ཁ་སྐོང་ཨེ་ཐུབ་སྙམ་པའི་ཀུན་སློང་གིས་རྩོམ་འདི་འབྲི་བ་ལ། གལ་ཏེ་ཁོ་བོའི་འདི་ལ་དོན་གྱི་སྙིང་བོ་དང་བདེན་པའི་སྟོབས་ཡོད་ན་རྗེ་རྒྱལ་བ་ཡབ་སྲས་ཀྱིས་བྱང་ཆུབ་བར་དུ་རྗེས་སུ་འཛིན་པའི་རྒྱུར་འགྱུར་བ་དང་ས་ཆའི་ཕྱོགས་རིས་དང་རང་བཟོའི་དྲི་མ་ཕྲ་མོ་ཙམ་ཡོད་ན་བོད་སྐད་ཁ་ཏོན་དུ་བྱེད་ཅིང་བོད་ཡིག་ཟས་སུ་ཟ་བའི་མཁས་པ་རྣམས་ཀྱིས་བཀའ་སློབ་ཡོད་པར་ཞུ།
ཞྭ་ལབ་ཙེ། གཅན་ཚ་རྫོང་སྟེང་སོ་ཞང་ཤིང་མཁར་སྡེ་བའི་སྟོད་ཙམ་ན་ཆེ་ཆུང་རན་ཙམ་གྱི་སྤང་རི་ཡིད་དུ་འོང་བ་ཞིག་ཡོད་པའི་རི་རྩེ་ཏག་ཏག་ན་གསོམ་སྡོང་བཅུ་ཕྲག་འགའ་ལབ་ཙེ་བསྟད་པའི་ཚུལ་དུ་སྐྱེས་ཡོད། ཡུལ་མི་རྣམས་ཀྱི་ངག་རྒྱུན་ལ། ཆོས་རྗེ་དོན་གྲུབ་རིན་ཆེན་གནས་དེར་ཕེབས་ཏེ་ས་གཞི་བྱིན་གྱིས་བརླབས། ཕྱི་ཉིན་ཕེབས་ཁར་ཁོང་གི་ཞྭ་མོ་བརྗེད་སོང་བ་ཞབས་ཕྱི་བ་ཞིག་ཕྱིར་ལེན་དུ་སོང་དུས། ཡ་མཚན་པ་ཞིག་ལ་ཞྭ་མོའི་ནང་དུ་མར་ཁུ་བཀང་འཁྱིལ་འདུག་པ་མཐོང་། དེ་བས་ཆོས་རྗེ་དོན་གྲུབ་རིན་ཆེན་གྱི་ཞྭ་མོ་ནང་རྟེན་དུ་བཞུགས་སུ་གསོལ་ཏེ་ལབ་ཙེ་ཞིག་བསྟད། དེའི་རྟེན་འབྲེལ་གྱིས་གསོམ་སྡོང་མང་པོ་སྐྱེས་ཏེ་རང་བྱོན་ལབ་ཙེ་ཞིག་ཏུ་གྱུར་བར་བཤད། ད་ལྟའང་ཞྭ་ལབ་ཙེ་ཞེས་གྲགས་ཆེ།
སྣང་རའི་གསེར་ཁང་། གཅན་ཚ་རྗོང་སྣང་ར་ཞང་ཚག་རྒྱ་སྡེ་བ་རུ་འདུ་ཁང་དང་བྱམས་ཁང་། དུས་གསུམ་སངས་རྒྱས་ལྷ་ཁང་། ཆོས་རྗེ་དོན་གྲུབ་རིན་ཆེན་གྱི་ཤངས་ཁྲག་གིས་བཞེངས་པའི་དམ་ཆེན་སྲུང་མའི་བཙན་ཁང་ཕྱི་མཁར་དང་བཅས་པའི་གྲོང་དགོན་ཡིད་དུ་འོང་བ་ཞིག་ཡོད། ཡུལ་མི་དག་གི་ངག་རྒྱུན་ལ། ཆོས་རྗེ་དོན་གྲུབ་རིན་ཆེན་གནས་དེར་ཕེབས་པའི་ཚེ་ཨ་མྱེས་དོན་གྲུབ་སེང་གེ་ཟེར་བ་ཞིག་ལ་འཕྲད་ཅིང་ཕན་ཚུན་གླེང་མོལ་མཛད་དེ་ལྷ་ཁང་ཞིག་འདེབས་པའི་ཞལ་བཀོད་གནང་། གནས་དེ་ཉིད་དུ་ས་སྡེའི་བཤད་པ་སོགས་ཀྱི་ཆོས་ཀྱང་གསུངས་པར་གྲགས། ཕྱིས་དགེ་ལྡན་བསྟན་པའི་ཆུ་མགོ་བྲག་བྱ་ཁྱུང་དགོན་པ་བཞེངས་གྲུབ་ཀྱི་སྐབས་རབ་གནས་དུས་གཅིག་ལ་འཁེལ་བར་བྱས་པས་གས་དེར་མེ་ཏོག་གི་ཆར་བབས་པ་རྟེན་སྒྲོམ་དུ་ཡོད་པར་བཤད། ད་ལྟའང་སྣང་རའི་གསེར་ཁང་ཞེས་གྲགས་ཆེ། འདིའི་ལོ་རྒྱུས་ཕྲན་བུ་ཞིག་ཨ་ལགས་ཚེ་ཏན་ཞབས་དྲུང་གི་བྱ་ཁྱུང་གདན་རབས་ཀྱི་ཤོག་ངོས་༢༩ནའང་བཀོད་འདུག
ཆོས་རྗེ་དོན་གྲུབ་རིན་ཆེན་གྱི་ན་བཟའ། གཅན་ཚ་རྫོང་ཚོ་དྲུག་ཞང་ཆོས་ཚང་མ་སྟོད་ཚང་སྡེ་བའི་ཨ་མྱེས་ཚང་ན་ཆོས་རྗེ་དོན་གྲུབ་རིན་ཆེན་གྱི་ན་བཟའ་ཞིག་ཡོད་པ་ཆུང་བའི་དུས་ནས་གོ་ཞིང་ཐེངས་འགར་ཕྱིན་ཀྱང་མཇལ་བའི་སྐལ་བ་མ་བྱུང་། གཞེས་ནིང་ལོང་མཚོ་སྔོན་བོད་ཡིག་གསར་འགྱུར་ཁང་གི་ཧཱུཾ་ཆེན་ལ་རོགས་བྱས་ཏེ་གྲོགས་པོ་རྡོ་རྗེ་རིན་ཆེན་དང་པདྨ་ཚེ་རིང་བཅས་གཅན་ཚའི་སྔགས་དགོན་རྣམས་ཀྱི་ལོ་རྒྱུས་རྒྱུ་ཆ་འཚོལ་སྡུད་དུ་ཕྱིན་སྐབས་སྟབས་ལེགས་པ་ཞིག་ལ་ཆོས་རྗེ་དོན་གྲུབ་རིན་ཆེན་གྱི་ན་བཟའ་དང་དངོས་སུ་མཇལ་བའི་སྐལ་བ་བྱུང་། བདག་གིས་བལྟས་ཚོད་ལ་ན་བཟའ་རིན་པོ་ཆེ་དེ་ནི་ཁ་དོག་ལྗང་རུལ་བ་ཞིག་ལ་གོས་སྲུབས་ལག་བཙེམས་བྱས་པ་ཅུང་ཟད་ཞིབ་ཚགས་ལྡན་པ་ཞིག་རེད། ཡིན་ནའང་དུས་ཚོད་ཡུན་རིང་འགོར་བའི་དབང་གིས་ངོས་ཐམས་ཅད་ནས་ཁུང་བུ་བརྡོལ་ཏེ་ཚགས་ཚེ་མིག་ལ་སོང་བས་ཐོ་ཐོ་བྱས་ཏེ་རྩམ་ཤིང་ཞིག་གི་ནང་བཞག་འདུགང་ཚོས་མཐར་བཅད་ནས་འདྲ་པར་ཞིག་བསྐྱོན་པ་ཧཱུཾ་ཆེན་གྱི་ལག་ཏུ་ཡོད། ད་དུང་ཆོས་རྗེ་དོན་གྲུབ་རིན་ཆེན་གྱི་སྦ་དབྱུག་ཅིག་ཡོད་མོད་དུས་ངན་གྱིས་ཁྱུར་མིད་བྱས་སོང་ཟེར་།
ཆོས་རྗེ་དོན་གྲུབ་རིན་ཆེན་གྱི་ལྷུང་བཟེད། གཅན་ཚ་རྫོང་སྐྱ་རྒྱ་ཞང་གསང་སྒྲོག་དགོན་པ་ན་ཆོས་རྗེ་དོན་གྲུབ་རིན་ཆེན་གྱི་ལྷུང་བཟེད་ཅིག་ཡོད་པ་ད་ལྟའི་བར་དུ་འབྱུང་བ་ལ་ཐིམ་པར་འགྲོ་བའི་རྟེན་སྐལ་དུ་ལུས་པ་ལོ་འགའི་ཡར་སྔོན་ལ་ཨ་ལགས་གསང་སྒྲོག་སྐུ་ཕྲེང་ལྔ་བ་བློ་བཟང་ལུང་རྟོགས་བསྟན་པའི་རྒྱལ་མཚན་མཆོག་གི་རྗེ་བཙུན་བྱམས་པ་མགོན་པོ་ཆེན་མོ་གསར་དུ་བཞེངས་པའི་གཟུངས་གཞུག་ཏུ་ཕུལ་བ་སྐྱ་རྒྱ་བ་དག་གིས་དངོས་སུ་མཇལ་མྱོང་།
མཁས་རྒྱའི་དགོན་རྟགས། གཅན་ཚ་རྫོང་དོ་རྒྱ་ཞང་མཁས་རྒྱ་སྡེ་བའི་ཀླད་ན་དགོན་རྟགས་ཟེར་བའི་གནས་སུ་གྱང་ཆག་ཅིག་མཐོང་རྒྱུ་ཡོད། ཡུལ་མི་རྣམས་ཀྱི་ངག་རྒྱུན་དུ། ཆོས་རྗེ་དོན་གྲུབ་རིན་ཆེན་གྱིས་བྲག་བྱ་ཁྱུང་དགོན་པ་མ་བཏབ་ཡར་སྔོན་ལ། ཐོག་མར་གནས་འདི་ནས་དགོན་པ་ཞིག་བཏབ་སྟེ་ཡུན་རིང་བཞུགས་པར་བཤད། ད་ལྟ་གྱང་ཆག་གི་སྲིད་ལ་གོམ་པ་༧༦དང་ཞེང་ལ་༣༥ཡོད་པ་ཁོ་བོའི་ཕ་ཡུལ་ཡིན་པས་ཆུང་བའི་དུས་ནས་དངོས་སུ་མཇལ་མྱོང་། དེ་ཡང་དགོན་པ་ཆགས་ཤིང་འཇིག་པའི་ཤལ་ཡིན་པས་ན་དགོན་རྟགས་ཟེར། དེའི་ཕྱོགས་ཀྱི་ལོ་རྒྱུས་ཕྲན་བུ་ཞིག་ཇུ་ནང་ངག་དབང་སྙན་གྲགས་ཀྱི་བྱ་ཁྱུང་གདན་རབས་སུ་བཀོད་པ་ཨ་ལགས་ཚེ་ཏན་ཞབས་དྲུང་གི་བྱ་ཁྱུང་གདན་རབས་ཀྱི་ཤོག་ངོས་༣༡ནས་༣༢བར་ན་ལུང་དྲངས་འདུག
མཁས་རྒྱའི་རི། གཅན་ཚ་རྫོང་དོ་རྒྱ་ཞང་མཁས་རྒྱ་སྡེ་བའི་སྟོད་ཕྱོགས་ན་སྤང་རི་ཚར་དུ་དངར་བའི་ཁྲོད་ན་གཅན་ཚའི་ཡུལ་གྱི་ཆེས་ཆེ་བའི་སྤང་རི་མིང་ལ་མཁས་རྒྱའི་རྩེ་རི་ཞེས་འབོད་པ་ཞིག་ཡོད། ཡུལ་མི་རྣམས་ཀྱི་ངག་རྒྱུན་ལ། མཁས་རྒྱའི་རྩེ་རི་དེ་ནི་ཚོང་ཁའི་སྐྱེས་རི་དང་ཕན་ཚུན་འགྲན་པའི་ཚུལ་དུ་སྐྱེས་པའི་གཏམ་རྒྱུད་མཚར་པོ་ཞིག་བཤད་རྒྱུ་ཡོད་པ་མ་ཟད། མཁས་རྒྱའི་རྩེ་རི་ལ་གནས་པའི་གཞི་བདག་ཨ་མྱེས་རྩེ་རི（ཁ་སྐད་དུ་ཨ་མྱེས་རྩེ་རྡེའུ་ཟེར་）ནི་ཆོས་རྗེ་དོན་གྲུབ་རིན་ཆེན་གྱི་བཀས་གཉན་པར་བཤད་ལ། ཡུལ་མིའི་སྔགས་འཆང་རྣམས་ཀྱི་བསང་དཔེའི་ནང་ནའང་།།
ཧུཾ། སྔོན་ཚེ་ཆོས་ཀྱི་རྒྱལ་བོ་ཙོང་ཁ་བའི།།
ཡོངས་འཛིན་ཆོས་རྗེ་དོན་གྲུབ་རིན་ཆེན་གྱིས།
བཀའ་གཉན་རྩེ་རི་ཞེས་གྲགས་དམ་ཚིག་ཅན།།
གཞི་བདག་ཆེན་པོ་འཁོར་བཅས་གནས་འདིར་གཤེགས།
དངོས་བཤམས་ཡིད་ཀྱིས་སྤྲུལ་བ་ལས་བྱུང་བའི།།
ཕྱི་ནང་གསང་གསུམ་མཆོད་གཏོར་སྤྱན་གཟིགས་དང་།།
དྲི་ཞིམ་སྤོས་སྣ་བསྲེགས་པའི་བསང་མཆོད་འདི།།
གཞི་བདག་ཆེན་པོ་འཁོར་དང་བཅས་ལ་འབུལ།།
དགྱེས་བཞིན་བཞེས་ལ་བདག་ཅག་འཁོར་བཅས་ཀྱི།
ཕྱི་ནང་བར་ཆད་ཉེར་འཚེ་ཀུན་ཞི་ཞིང་།།
ཚེ་དཔལ་བསོད་ནམས་དཔལ་འབྱོར་རྒྱས་པ་དང་།།
ཁམས་གསུམ་ནི་ནོར་ཟས་གསུམ་དབང་བསྡུས་ལ།།
བཅོལ་བའི་འཕྲིན་ལས་མ་ལུས་འགྲུབ་གྱུར་ནས།
ཕུན་ཚོགས་དཔལ་ལ་རོལ་བའི་བཀྲ་ཤིས་ཤོག།
ཅེས་བཀོད་དེ་ད་ལྟའི་བར་དུ་བསང་འབོད་བྱེད་བཞིན་ཡོད་དོ།།
མཁས་འབའ་ཚང་གི་མཁའ་འགྲོ་མ། གཅན་ཚ་རྫོང་དོ་རྒྱ་ཞང་མཁས་རྒྱ་སྡེ་བ་རུ་ཆོས་རྗེ་དོན་གྲུབ་རིན་ཆེན་གྱི་ཞབས་ཀྱིས་ཡུན་རིང་བཅགས་ཤིང་བྱིན་གྱིས་བརླབས་པའི་སྐབས་དེར་། སྡེ་བ་དེའི་མཁས་འབའ་ཚང་ཟེར་བའི་ཚོ་བ་ཞིག་ན་མཚན་ལྡན་གྱི་མཁའ་འགྲོ་མ་ཞིག་ཡོད་པ་ཁོང་གིས་ཕྱག་རྒྱ་མར་འོས་པར་མཁྱེན་ཏེ་བདག་པོར་བསླངས་ཤིང་རིན་ལ་སྡེ་བ་དེའི་གླེས་གཞི་ལུང་བ་ནས་རང་འཐག་འཁོར་ཆུ་ཞིག་ཕུད་དེ་ཆུའི་དཀའ་ངལ་སེལ་བའི་ཞལ་བཞེས་གནང་ནའང་ཡུལ་བ་རྣམས་ཀྱིས་མ་བྱིན་པར་བཤད། གཏམ་འདི་ཐོས་པ་ཙམ་གྱིས་ཁ་ཅིག་དེ་འདྲ་ག་ལ་སྲིད་ཆོས་རྗེ་དོན་གྲུབ་རིན་ཆེན་ནི་ཚུལ་ཁྲིམས་ལྡན་པའི་དགེ་སློང་ཞིག་ཡིན་པས་ཟེར་ནའང་ཐང་མོད། འོན་ཀྱང་གསང་བསྔགས་ཀྱི་ཤེས་བྱ་ཕྲན་ཙམ་ཡོད་པའམ་ཡང་ན་རྗེ་བླ་མའི་ཡན་གྱི་ཆོས་ཀྱི་ལོ་རྒྱུས་ཤེས་མཁན་རྣམས་ཀྱིས་ཝ་ལེར་མཁྱེན་ངེས་སོ།།
བོད་བྱ་ཚང་གི་ཉེ་ཚན། གཅན་ཚ་རྫོང་བྲག་ཁང་སྣ་ཁ་ཞང་བོད་བྱ་ཚང་སྡེ་བ་ལ་ཕེབས་པའི་ཚེ་ཆོས་རྗེ་དོན་གྲུབ་རིན་ཆེན་ཁོང་རང་གི་ཉེ་ཚན་ཨ་ཡེ་རྒན་མོ་ཞིག་གི་ཁྱིམ་ནས་བཞུགས་པར་བཤད། སྐབས་དེར་དབྱར་ཟླ་ར་བ་ལ་འཕྲད་པས་ཉེ་ཚན་ཨ་ཡེ་རྒན་མོ་ཡུར་ལས་ཀྱིས་མནར་བ་ཐུགས་ཀྱིས་མ་བཟོད་ནས་ཡུར་མནན་གྱི་མཆོད་རྟེན་ཞིག་བརྩིགས། དེ་ནས་བཟུང་ཨ་ཡེ་རྒན་མོའི་ཞིང་ལ་ཡུར་མ་ཡུར་མི་དགོས་པར་བཤད། ད་ལྟ་མཆོད་རྟེན་གྱི་ཤུལ་ས་འབུར་རམ་རྡེའུ་འབུམ་ཞིག་ཏུ་གྱུར་ཡོད་ཟེར། སྐབས་དེའི་བཞུགས་སྟན་ཟར་རྩྭ་དང་ར་ཕྱར་བྱས་པ་ཕྱིས་སུ་བྱ་ཁྱུང་གསེར་གདུང་གི་ནང་རྟེན་དུ་ཕུལ་ཟེར། འདིའི་སྐབས་ཀྱི་ལོ་རྒྱུས་ཕྲན་བུ་ཞིག་ཨ་ལགས་ཚེ་ཏན་ཞབས་དྲུང་གི་བྱ་ཁྱུང་གདན་རབས་ཀྱི་ཤོག་ངོས་༣༠ན་གསལ།
ཁྱི་རྒན་ལ། དཔལ་ལུང་རྫོང་མཚེར་ཕུག་ཞང་མཚམས་རིང་སྡེ་བ་ན་ཁྱི་རྒན་ལ་ཟེར་བའི་ལ་རིང་ཞིག་ཡོད། དེ་ཡང་ཆོས་རྗེ་དོན་གྲུབ་རིན་ཆེན་གྱི་རྗེས་སུ་འབྲངས་པའི་ཁྱི་རྒན་ཞིག་ཡོད་པ་ལ་མ་ཆོད་པར་ལྔ་ལམ་དུ་སོང་བས་དེ་ལྟར་གྲགས། ཕྱིས་སུ་ཁྱི་རྒན་ཤི་ས་ན་རྡེའུ་འབུམ་ཞིག་ཀྱང་ཡོད་ཟེར་མོད་ཁོ་བོ་སོང་མྱོང་།
བྲག་བྱ་ཁྱུང་དགོན་པ། དཔལ་ལུང་རྫོང་མཚེར་ཕུག་ཞང་གི་བྲག་བྱ་ཁྱུང་དགོན་པ་ནི་སྤྱི་ལོ་༡༢༤༩ལོར་ཆོས་རྗེ་དོན་གྲུབ་རིན་ཆེན་གྱིས་ཕྱག་བཏབ་ཅིང་རྒྱལ་བ་གཉིས་པ་བློ་བཟང་གྲགས་པ་དགུང་ལོ་བཅུ་དྲུག་གི་བར་དུ་བཀའ་དྲིན་གྱིས་བསྐྱངས་པའི་ཞིང་མཆོག་དང་། དགེ་ལྡན་བསྟན་པའི་ཆུ་མགོ་ཁམས་གསུམ་འགྲོ་བའི་རྟེན་གཅིག་པུར་གྱུར་ཏེ་ཆོས་རྗེ་དོན་གྲུབ་རིན་ཆེན་སྐུ་ཕྲེང་རིན་བྱོན་སྐུ་ཕྱོགས་ཆུ་བཟང་ཚང་གི་བཀའ་དྲིན་གྱིས་བསྐྱངས་བཞིན་པ་ཀུན་ལ་གསལ་བ་འདི་ལགས་སོ།།
གཅན་ཚའི་མ་ཎྀ། དཔལ་ལུང་རྫོང་ནང་སྟོད་ཞང་ན་བྱིན་རླབས་ཀྱི་ཚན་ཁ་འབར་བའི་མ་ནྀ་ཆུ་འཁོར་ཞིག་ཡོད་པ་ལ་གཅན་ཚའི་མ་ནྀ་ཞེས་ཀུན་ལ་གྲགས་ཆེ། དེ་ཡང་ཆོས་རྗེ་དོན་གྲུབ་རིན་ཆེན་གྱི་མ་ནྀ་ཕྱག་འཁོར་ནང་རྟེན་དུ་བཞུགས་པའི་མ་ཎི་ཆུ་འཁོར་ཡིན་པ་ཀུན་ལ་རླུང་ལྟར་གྲགས།
འཁྲུངས་ཡུལ་གྱི་ཁུངས་ཞར་བྱུང་དུ་བཀོད་པ།
༡.མཁས་གྲུབ་རྗེས་མདོ་ཁམས་སྨད་ཡིན་པར་གསུངས།
༢.ཆུ་བཟང་ངག་དབང་ཐུབ་བསྟན་དབང་ཕྱུག་གིས་འཁྲུངས་ཡུལ་དང་རིགས་རུས་ནི་ས་སྐྱ་ཡིན་ཞེས་དང་། ས་སྐྱ་ནས་ཆད་པའི་རེབ་གོང་གི་ཡུལ་ཡིན་ཟེར།
༣.ཇུ་ནང་ངག་དབང་སྙན་གྲགས་ཀྱིས་སྣང་ར་ཡིན་པར་འདོད།
༤.རྐ་ཕུག་རིན་པོ་ཆེས་སྣང་ར་ཡིན་པར་འདོད།
༥.མི་ཉག་རིན་པོ་ཆེས་སྣང་ར་ཡིན་ཞེས་གསུང་ས།།
༦.ཀོའུ་སྡེའི་བཛྲ་བི་ཛ་ཡ་མིང་ཅན་གྱིས་རིགས་རུས་ས་སྐྱ་དང་འཁྲུངས་ཡུལ་རེབ་གོང་དུ་ངོས་བཟུང་ཡོད་ཚོད་རེད།
༧.རྩ་བ་ངག་དབང་དགེ་ལེགས་ཀྱིས་མཁས་རློམ་འགས་（གོང་གི་ཀོའུ་སྡེའི་ཞེས་པ་འདི་བསྟན་）རིགས་རུས་ས་སྐྱ་དང་འཁྲུངས་ཡུལ་དང་། ཡབ་ཡུམ་གྱི་མིང་སོགས་ངོས་བཟུང་བ་དང་། ལྷོ་ཁམས་བརྒྱུད་དེ་ཕེབས་པའི་གཏམ་རྒྱུད་བཤད་པ་རྣམས་ནི་རྒྱུད་ནེའི་གྲུབ་ཆེན་སྟག་དཀར་བས་མཛད་པའི་རྣམ་ཐར་དང་མི་མཐུན་པས་ཁོ་བོས་དོར་ཞེས་འབྱུང་།
༨.རྒྱུད་ནེའི་གྲུབ་ཆེན་སྟག་དཀར་བས་གང་ལྟར་གོང་གི་འདི་ལ་དཔགས་ན་རིགས་རུས་ས་སྐྱ་དང་འཁྲུངས་ཡུལ་རེབ་གོང་དུ་ངོས་བཟུང་མེད་ཚོས་རེད།
༩.ཨ་ལགས་ཚེ་ཏན་ཞབས་དྲུང་གིས་ཀོའུ་སྡེའི་བཛྲ་བི་ཛ་ཡ་མིང་ཅན་གྱིས་བྲིས་པའི་རྗེ་དོན་རིན་པའི་རྣམ་ཐར་ཐོས་སྒྲོགས་རིན་ཆེན་ཕྲེང་བ་ཞེས་ཁུངས་མེད་རྫུན་གཏམ་ཕྲེང་དུ་བསྟར་བ་དེ་ག་ཡིན་ཞིང་། དཔེ་དེ་བདག་གིས་ཀྱང་མཐོང་མོད། དེར་ཡབ་རྗེ་སྐལ་ལྡན་རྒྱ་མཚོའི་གསུང་འདྲེན་པ་དང་། རྩ་བ་ངག་དབང་དགེ་ལེགས་ཀྱིས་གཟིགས་པ་ལ་དཔགས་ན་རྩོམ་དུས་རགས་ཙམ་ངེས་ནུས་ལ། དེར་རེ་རེ་གཉིས་གཉིས་ཙམ་མ་གཏོགས་གང་བཤད་ཁུངས་མེད་སྤྱི་བརྟོལ་གྱི་གྲོང་ཚིག་འབའ་ཞིག་ཏུ་སྣང་བས་འདིར་བཤད་ཡམས་བཀོད་པས་དགོས་པ་མི་ཆེ་ཞིང་ལྷད་འདོན་བྱས་པས་སྣག་ཤོག་གྲོན་པའི་རྒྱུ་རུ་ཟད་དོ་ཞེས་པ་དང་། ཡང་བོད་བྱ་ཚང་དུ་ཁོང་བར་ཉེ་ཚན་ཞིག་ཡོད་པ་དག་གིས་ཀྱང་འཁྲུངས་ཡུལ་ལ་ངེས་པ་སྟེར་རྒྱུ་ཡོད་དོ་ཞེས་བཀོད་འདུག།
དཔྱག་གཞིའི་ཡིག་ཆ།
༡ཨ་ལགས་ཚེ་ཏན་ཞབས་དྲུང་གིས་བརྩམས་པའི་《བྱ་ཁྱུང་གདན་རབས་ཡིད་འཕྲོག་གཏམ་གྱི་ཉིང་ཁུ》༡༩༨༤ཟླ་༤པར་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན། ༢དོན་རྡོར་དང་བསྟན་འཛིན་ཆོས་གྲགས་ཀྱིས་བསྡུ་སྒྲིག་བྱས་པའི། 《གངས་ལྗོངས་ལོ་རྒྱུས་ཐོག་གི་གྲགས་ཅན་མི་སྣ》༡༩༩༣ལོའི་ཟླ་༣པར་བོད་ལྗོངས་མི་དམངས་དཔེ་སྐྲུན་ཁང་ནས་བསྐྲུན།
༣ དམངས་ཁྲོད་སྔགས་འཆང་གི་བསང་དཔེ། སྣ་ཐུང་ལག་བྲིས་མ།
འབྲུག་མོས་ཞུ་དག་བྱས།
