西藏文化网

༡༢.གསང་སྔགས་ཀྱི་རྒྱུད་གསུང་བ།

སྤེལ་དུས།2008-08-27　　 ཡོང་ཁུངས་།　　 རྩོམ་པ་པོ།

༼ཡིག་གཟུགས་ཀྱི་ཆེ་ཆུང་། ཆེ། འབྲིང་། ཆུང་། ༽

    དེ་ནས་གསང་སྔགས་ཀྱི་རྒྱུད་གསུང་བ་ནི། བསྟོད་པ་ལས། ལྷོ་ཕྱོགས་དཔལ་ལྡན་འབྲས་སྤུངས་མཆོད་རྟེན་དང་། །ནུབ་ཕྱོགས་ཨོོཊྚི་ཡཱ་ནའི་གླིང་སོགས་སུ། །འབྲས་བུ་གསང་སྔགས་རྡོ་རྗེ་ཐེག་པ་ཡི། །རྒྱུད་ཆེན་རྣམ་བཞི་གསུང་ལ་ཕྱག་འཚལ་ལོ། །ཞེས་སྨྲས་སོ།།
    དེ་ཡང་འགྲེལ་ཆེན་དྲི་མེད་འོད་ལས། ས་ག་ཟླ་བའི་ཚེས་བཅོ་ལྔའི་ཉིན་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་སྐོར་ཞིང་ཐེག་པ་གསུམ་སྟོན་པར་མཛད་དེ། བཅུ་གཉིས་པ་ནག་པའི་ཉ་ལ་ཤྲཱི་ངྷཱ་ནྱཱ་ཀ་ཊ་ཀར་ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་གསུངས་སོ། །ཞེས་པ་ལྟར། སྔོན་སངས་རྒྱས་གསེར་ཐུབ་ཀྱི་བསྟན་པ་ལ་དྲང་སྲོང་གྲུབ་པ་ཐོབ་པའི་རྣལ་འབྱོར་པ་ཞིག་གིས་ཉིན་ལམ་བཅུ་གཉིས་ཀྱི་སར་འབྲས་སོ་བའི་ཆར་པ་བང་རིམ་གསུམ་ཙམ་ཕབ་པས། དེའི་ཕུད་ལྟ་བུར་རྫུ་འཕྲུལ་ཐོབ་པ་རྣམས་ཀྱིས་རྫུ་འཕྲུལ་གྱིས་བཞེངས་པའི་འབྲས་དཀར་སྤུངས་པའི་མཆོད་རྟེན་གྱི་བུམ་པའི་ནང་དུ་རྨང་རིམ་པ་གཉིས་ཡོད་པས་འོག་མར་ཆོས་དབྱིངས་གསུངས་གི་དབང་ཕྱུག་དང་། སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་ཏེ། དཔལ་དུས་ཀྱི་འཁོར་ལོའི་དཀྱིལ་འཁོར་ཡོངས་སུ་རྫོགས་པར་བཞུགས་པའི་བུམ་པའི་ཕྱོགས་བཞིའི་ལོགས་ལ་ཁྱབ་འཇུག་གིས་ཕུལ་པའི་བེེཌཱུརཡའི་བུམ་པ་སྟོང་དང་བརྒྱད་བརྒྱ། རྨང་གོང་མའི་འགྲམ་ལ་གཙང་རིས་ཀྱི་དཔལ་མགོན་བདུན་ཅུ་རྩ་ལྔས་བཞེངས་པའི་གྲ་མ་ཤཱིརྵའི་རྡོ་ལས་གྲུབ་པའི་མཆོད་རྟེན་ཉི་ཤུ་རྩ་བརྒྱད། དེ་དག་གི་བར་དུ་རྒྱུ་སྐར་ཉི་ཤུ་རྩ་བརྒྱད་ཀྱིས་བཟོས་ཤིང་བཙུགས་པའི་ཀ་བ་ཉི་ཤུ་རྩ་བརྒྱད། ཀ་བ་དེ་རྣམས་ཀྱིས་རྒྱུ་སྐར་གྱི་དཀྱིལ་འཁོར་མཚོན་པར་ཡང་གསུངས། རྨང་གི་འོག་མ་རྒྱལ་ཆེན་རིགས་བཞིའི་ལྷས་ཕུལ་པའི་རིན་པནོ་ཆེའི་ཕྲ་སོ་བདུན་གྱིས་བརྒྱན་པ། མཆོད་རྟེན་གྱི་ངོ་བོ་ད་ལྟ་སྣང་དུས་ས་ཡང་མ་ཡིན་རྡོ་ཡང་མ་ཡིན། ཆུ་ལ་སོགས་པས་མི་ཚུགས་ཤིང་འཕང་དུ་དཔག་ཚད་དྲུག་དང་རྒྱང་གྲགས་གཅིག་ཡོད་པ། རྒྱང་ཙམ་ནས་བལྟས་ན་བྱ་འདབ་ཀྱི་འོག་ཏུ་ཤམ་བུ་དྲ་བ་དྲ་ཕྱེད་སོགས་ཀྱི་རི་མོ་མཐོང་བར་གསུངས། དེའི་ཕྱི་རོལ་ཏུ་རྒྱ་མཚོ་ན་གནས་པའི་ཀླུ་རྣམས་ཀྱིས་ཕུལ་པའི་མན་ཤེས་ལས་གྲུབ་པའི་མཎྜལ་པདྨ་འདབ་བརྒྱད་ཀྱི་རྣམ་པ་ཅན། རྒྱར་འདོམ་ལྔ་ཅུ་རེ་ཡོད་པ་སུམ་ཅུ་རྩ་བདུན་ཡོད་ཅིང་། མཆོད་རྟེན་གྱི་ཁོར་ཡུག་གི་ཕྱི་རོལ་ཏུ་རྒྱང་གྲགས་བཞི་དང་ལྕགས་རིའི་རྒྱ་ལ་དཔག་ཚད་བརྒྱ་ཡོད་པར་བཤད། དེའི་ཕྱི་རོལ་ཏུ་བསྟན་པ་འདིར་རྒྱལ་པོ་པཱ་ལ་མི་ཏྲས་བཞེངས་པའི་ལྕགས་རིའི་རྒྱར་ཉིན་ལམ་བཅུ་གཉིས་ཡོད་པའི་སྟེང་མཆོད་རྟེན་དཀར་པོ་མཐོ་ཚད་ཁྲུ་བརྒྱད་ཙམ་གྱིས་བསྐོར་པ། དེའི་ཕྱིར་རོལ་ཏུ་མཆོད་རྟེན་བརྒྱ་རྩས་བསྐོར་པ་ལ་རིམ་པ་གསུམ་དང་སྒོ་བཞི་དང་ལྡན་པ། ཤར་སྒོ་ན་མགོན་པོའི་སྐུ་དང་། ལྷོ་ནུབ་ཀྱི་ལྷ་ཁང་ན་སྤྱན་རས་གཟིགས་ཀྱི་རྡོ་སྐུ་དཀར་པོ་སོགས་དང་། ལྕགས་རིའི་ནང་དུ་ཛོ་ཀིའི་ཁྱིམ་དང་སྐྱེད་ཚལ་གྲོང་ལ་སོགས་པ་དང་། སྒོའི་བར་ཁྱམས་རྣམས་སུ་གྲོང་ཁྱེར་དཔལ་ཡོན་ཅན་སོགས་ཡོད་པར་བཤད། དེ་ལྟར་རྒྱང་ནས་བལྟས་ན་ཆུ་ནང་དུ་ཕྱེད་ནུབ་ཅིང་ཕྱེད་འཕགས་པ་ལྟ་བུའི་ཤྲཱི་ངྷ་ནྱ་ཀ་ཊ་ཀ་ཞེས་གྲགས་པའི་དཔལ་ལྡན་འབྲས་སྤུངས་མཆོད་རྟེན་དུ་དཔའ་བོ་ཞེས་པ་ལྕགས་ཕོ་འབྲུག་གི་ལོ་ལ་བཅོམ་ལྡན་འདས་དེར་བྱོན་ཏེ། རྡོ་རྗེ་སེང་གེའི་ཁྲི་ལ་ཞལ་ཤར་དུ་མངོན་པར་ཕྱོགས་ནས་བཞུགས་སོ། །དེ་ནས་ཀེེ་ལ་ཤ་ཞེས་གྲགས་པར་ལྷས་བཀོད་པའི་གྲོང་ཁྱེར་ཀ་ལ་བའི་ཕོ་བྲང་དཔག་ཚད་བཅུ་གཉིས་པ་ན། བགེགས་མཐར་བྱེད་ཀྱི་སྤྲུལ་བ་རྒྱལ་པོ་ཉི་མའི་འོད་ཀྱི་བཙུན་མོ་རྣམ་པར་རྒྱལ་མའི་སྲས་ཕྱག་ན་རྡོ་རྗེ་ཟླ་བ་དྲི་མ་མེད་པའི་འོད་དང་ལྡན་པས། རྒྱལ་པོ་ཟླ་བ་བཟང་པོ་ཞེས་བྱ་བ་སེང་གེའི་ཁྲི་ལ་བཞུགས་ཏེ། རྒྱལ་སྲིད་བསྐྱངས་ནས་ལོ་དགུ་བཅུ་རྩ་དགུ་ལོན་པ་ན། ཆོས་ཀྱི་འཁོར་ལོས་སྒྱུར་བའི་རྒྱལ་པོ་དེ་ཉིད་ནོར་བུ་རིན་པོ་ཆེའི་ཅོད་པན་བཅིངས་པའི་སྤྲུལ་བའི་རྒྱལ་ཕྲན་དགུ་བཅུ་རྩ་དྲུག་གིས་སྐོར་ཞིང་། ལྷ་དང་ལྷ་མ་ཡིན་དང་མཁའ་འགྲོ་དང་མཁའ་འགྲོ་མ་ལ་སོགས་པའི་འཁོར་དཔག་ཏུ་མེད་པ་དང་བཅས་པ་རྫུ་འཕྲུལ་གྱིས་ཕེབས་ཏེ། བཅོམ་ལྡན་འདས་ལ་སྐོར་བ་དང་མཎྜལ་སྔོན་དུ་འགྲོ་བས་ཞབས་ཀྱི་པདྨོ་ཟུང་ལ་རིན་པོ་ཆེའི་མེ་ཏོག་གིས་མཆོད་ཅིང་ཡང་དང་ཡང་དུ་ཕྱག་འཚལ་ནས། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བསྒྲུབ་པའི་དོན་དུ་རྡོ་རྗེའི་ཐེག་པ་བསྟན་དུ་གསོལ་ཞེས་གསོལ་བ་བཏབ་བོ། །དེ་ནས་སྲིད་གསུམ་རྣམ་པར་རྒྱལ་བའི་དུས་སུ་འོག་ཏུ་ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་བདེན་དོན་རྣམ་པ་བཅུ་གཉིས་དང་། དེའི་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་དེ་ཉིད་རྣམ་པར་བཅུ་དྲུག་གི་བདག་ཉིད་སྤྲོས་ཏེ། བདེ་བ་ཆེན་པོའི་གནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར། སངས་རྒྱས་དང་། བྱང་ཆུབ་སེམས་དཔའ་དང་། མཁའ་འགྲོ་དང་མཁའ་འགྲོ་མ་ཞིང་གི་རྡུལ་དང་མཉམ་པ་རྣམས་ལ། འཇིག་རྟེན་དང་འཇིག་རྟེན་ལས་འདས་པའི་དབང་བསྐུར་ཏེ། འཁོར་རྣམས་སངས་རྒྱས་ཉིད་དུ་ལུང་བསྟན་པ་ན། རྒྱལ་པོ་ཟླ་བ་བཟང་པོས་ཕྱག་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་དཔྲལ་བར་ཐལ་མོ་སྦྱར་ནས། རྒྱུད་ཐམས་ཅད་ཀྱི་རྡོ་རྗེའི་ཚིག་མ་ལུས་པར་གསལ་བ་སངས་རྒྱས་རིན་པོ་ཆེའི་ཟ་མ་ཏོག་ཁ་འབྱེད་པ་བསྟན་དུ་གསོལ་ཅེས་གསོལ་བ་བཏབ་པས། ཤམྦྷ་ལའི་གདུལ་བྱ་རྣམས་ཀྱི་སེམས་རྣམ་པར་དག་ཅིང་སྐལ་བ་དང་ལྡན་པར་གཟིགས་ནས། རྡོ་རྗེའི་ཚིག་ཁ་མ་ཕྱེ་བ་མེད་པས་རབ་ཏུ་གསལ་བར་བྱེད་པ་རྩ་བའི་རྒྱུད་མཆོག་གི་དང་པོའི་སངས་རྒྱས་སྟོང་ཕྲག་བཅུ་གཉིས་པ་ཡང་དག་པར་བསྟན་ཏོ།།
རྒྱུད་ཐམས་ཅད་ཀྱི་རྒྱལ་པོ་དཔལ་གསང་བ་འདུས་པའི་རྒྱུད་ནི། སློབ་དཔོན་ཀུན་དགའ་སྙིང་པོས། ཁྱབ་འཇུག་སོགས་རྒྱུད་ལ་དད་ཅིང་ཡུལ་ཡོངས་སུ་མི་སྤོང་བ་རྣམས་ཀྱི་དོན་དུ་གཞན་འཕྲུལ་དབང་བྱེད་ཀྱི་གནས་སུ་གསུངས་པར་བཞེད། པཎྚི་ཏ་ཨ་ལང་ཀ་ཤས། དགའ་ལྡན་གྱི་གནས་སུ་བཅོམ་ལྡན་འདས་ཉིད་ཀྱི་སྐུའི་འབྱུང་བ་བཞི་ལས་གཞལ་ཡས་ཁང་དུ་སྤྲུལ། ཕུང་ཁམས་སྐྱེ་མཆེད་རྣམས་ལས་དཀྱིལ་འཁོར་ཀྱི་ལྷ་ཚོགས་སྤྲུལ་ཏེ། སྐུའི་དཀྱིལ་འཁོར་དུ་གསང་བ་འདུས་པའི་རྒྱུད་གསུངས་པར་བཞེད། མི་ཡུལ་དུ་གསུངས་ཚུལ་ནི། ཨོོཊྚི་ཡཱ་ན་ཞེས་པ་མཁའ་འགྲོ་དང་འཕུར་འགྲོ་སོགས་ལ་འཇུག་པས་མཁའ་འགྲོའི་གླིང་མཚོན་པར་བྱས་པ་དེ་ཟུར་ཆག་པ་ཨོ་རྒྱན་ཞེས་གྲགས་པའི་ཡུལ་གྱི་རྒྱལ་པོ་ཨིམྡྲ་བྷུ་ཏིས་དགེ་འདུན་མང་པོ་སྔ་དྲོ་ཤར་ནས་ནུབ་དང་། ཕྱི་དྲོ་ནུབ་ནས་ཤར་དུ་འགྲོ་བ་གཟིགས་ནས། བློན་པོ་སོགས་ལ་འདི་རྣམས་ཅི་ཡིན་ཞེས་དྲིས་པས། སངས་རྒྱས་ཤཱཀྱ་ཐུབ་པའི་ཉན་ཐོས་ཡིན་ཟེར། དེ་ཐོས་པ་ཙམ་གྱིས་དད་པ་མཆོག་ཏུ་སྐྱེས་ཏེ་མཆོད་པ་རྒྱ་ཆེན་པོ་བཤམས་ནས། བཅོམ་ལྡན་འདས་འཁོར་དང་བཅས་པ་འདིར་གཤེགས་སུ་གསོལ་ཅེས་གསོལ་བ་བཏབ་པས། དུས་ལ་བབ་པ་མཁྱེན་ཏེ། བཅོམ་ལྡན་འདས་འཁོར་དང་བཅས་པ་དེར་བྱོན་པ་ལ། རྒྱལ་པོས། མཆོད་པ་དང་བསྙེན་བཀུར་གྱིས་མཉེས་པར་བྱས་ནས། བདག་ཅག་འཁོར་དང་བཅས་པ་ཐམས་ཅད་མཁྱེན་པའི་ལམ་ལ་འགོད་པར་ཞུ་ཞེས་ཞུས་པ་ན། ཐོག་མར་བཅོམ་ལྡན་འདས་ཀྱིས། ཁྱིམ་ནས་ཁྱིམ་མེད་པར་རབ་ཏུ་བྱུང་ལ། བསླབ་པ་གསུམ་ལ་སློབས་ཤིག་ཅེས་གསུངས་སོ། །རྒྱལ་པོས། བདག་གིས་རྒྱལ་སྲིད་སྐྱོང་དགོས་པས་དེ་མི་ནུས། བདག་འདོད་ཡོན་ལ་ལོངས་སྤྱོད་བཞིན་དུ་འཚང་རྒྱ་བའི་ཆོས་ཤིག་གསུངས་པར་འཚལ་ལོ་ཞེས་ཞུས་པས། བཅོམ་ལྡན་འདས་ཀྱིས་ཆགས་བྲལ་གྱི་སྤྲུལ་བའི་སྐུའི་རྣམ་པ་བསྡུས་ནས། འཁོར་ལོས་སྒྱུར་བའི་ཆ་ལུགས་སུ་སྤྲུལ་ཏེ། རྒྱལ་པོ་ཨིནྡྲ་བྷུ་ཏི་འཁོར་བཅས་དཔལ་གསང་བ་འདུས་པའི་དཀྱིལ་འཁོར་དུ་བཅུག་་ནས་དབང་བསྐུར། རྒྱུད་གསུངས་ནས་ཕྱག་ན་རྡོ་རྗེ་ལ་གཏད། དེས་རྒྱལ་པོ་འཁོར་དང་བཅས་པ་ལ་གསང་བ་འདུས་པའི་རྒྱུད་བསྟན་ཅིང་དེ་རྣམས་ཀྱིས་ཉམས་སུ་བླངས་པས་མཆོག་གི་དངོས་གྲུབ་ཐོབ་བོ།། རྒྱལ་པོ་ཨིནྡྲ་བྷུ་ཏི་སྔ་ཕྱི་གཉིས་ཡོད་པས་འདི་སྔོན་མ་ཡིན་པར་བཤད། དེ་ལྟར་ཨོ་རྒྱན་ཡུལ་གྱི་མི་ཕལ་ཆེར་རིག་པ་འཛིན་པར་གྱུར་པས་གྲོང་ཁྱེར་དེ་སྟོང་བར་གྱུར་ནས། དེའི་ཤུལ་དུ་ཆུས་གང་བས་མཚོ་ཞིག་ཏུ་གྱུར། དེ་ནས་ཡང་ཕྱག་ན་རྡོ་རྗེས་མཚོ་དེ་ན་གནས་པའི་ཀླུ་རྣམས་ཀྱང་སྐལ་བ་ལྡན་པར་གཟིགས་ནས། དེ་རྣམས་ལ་རྒྱུད་དང་གདམས་པ་བསྟན་པས་ཀླུ་དེ་རྣམས་ལས་ཕལ་ཆེར་གྱིས་དངོས་གྲུབ་ཐོབ་ཅིང་། གྲུབ་པའི་སྐལ་བ་མེད་པ་རྣམས་གནས་གཞན་དུ་དེངས་པས་མཚོ་ཡང་སྐམས་པར་གྱུར། དེའི་ཤུལ་ཏུ་ཧེ་རུ་ཀ་རང་བྱུང་གི་ལྷ་ཁང་བཞེངས་སོ། །ཀླུ་ལས་གྱུར་པའི་རྣལ་འབྱོར་མ་ཞིག་གིས་ཀྱང་རྒྱལ་པོ་ཨིནྡྲ་བྷུ་ཏི་ལ་གསན་ནས་རྒྱུད་དང་གདམས་པ་ཐམས་ཅད་བསྟན་པར་གསུངས། རྒྱ་གར་ཤར་ཕྱོགས་ཨོ་དེ་ཤ་ན་རྒྱལ་པོ་བི་སུ་ཀཝ་ཞེས་བྱ་བ་མཚན་ཉིད་ཀྱི་ཐེག་པ་ལ་མཁས་པ་ཞིག་ཡོད་པ་དེའི་རྨི་ལམ་དུ་མཁའ་འགྲོ་མས་ལུང་བསྟན་པ་བཞིན་ཨོ་རྒྱན་གྱི་ཡུལ་དུ་ཕེབས་ཏེ། ཧེ་རུ་ཀ་རང་བྱུང་གི་ལྷ་ཁང་གི་སྒོ་བཞི་ནས་རིམ་པ་བཞིན་ཕྱག་འཚལ་བའི་ཚེ། ཤར་སྒོ་ནས་བུད་མེད་ཅིག་འོངས་ནས་ལྷ་ཁང་གི་ནང་དུ་ཁྲིད། གསང་བ་འདུས་པའི་དཀྱིལ་འཁོར་དུ་བཅུག་ཅིང་དབང་བསྐུར་ཏེ། གདམས་པ་མཐའ་དག་གནང་། རྒྱུད་དོན་ཉམས་ཆུ་བླངས་པས་མཆོག་གི་དངོས་གྲུབ་བརྙེས། དེ་ལ་བྲི་ཀ་མ་ལ་ཤི་ལའི་མཁན་པོ་སྒྲ་གཅན་འཛིན་བཟང་པོས་གསན། འདི་བ་སྒྲ་གཅན་འཛིན་བཟང་པོ་ལས་རབ་ཏུ་བྱུང་བས་མཁན་པོའི་མཚན་ཁོང་ལ་བཏགས་པར་གསུངས། ཕྱིས་སྤྱོད་པ་ལ་གཤེགས་པའི་ཚེ་མདའ་འཕེན་པའི་སྤྱོད་པ་མཛད་དེ། མདའ་ལེགས་པར་བསྲིངས་ནས་འཕངས་ན་གནད་དུ་ཕོག་པ་བཞིན་དུ། སེམས་ཉིད་གནས་ལུགས་ཀྱི་སྟེང་དུ་སོང་ན་གྲོལ་བར་རྟོགས་ནས་མདའ་འཕངས་པས་མཚན་ལ་མདའ་བསྣུན་ཏེ་ས་ར་ཧ་ཞེས་གྲགས་སོ། །འཇམ་དཔལ་ཞལ་ལུང་ལས། འདི་དོན་རྣ་བར་འཕོ་བྱེད་པ། །གང་གི་དུས་སུ་གནས་པ་དེར། །སངས་རྒྱས་བསྟན་པ་རིན་ཆེན་ཀྱང་། །གནས་པར་རབ་ཏུ་བཤད་པ་ཡིན། །ཞེས་གསུངས་སོ། །ལེགས་སྦྱར་གྱི་སྐད་དུ་ཀྲི་ཡ་སྟེ་བྱ་བའི་རྒྱུད་ནི། ལྷ་གནས་གཞན་འཕྲུལ་དབང་བྱེད་སོགས་སུ་གསུངས་པར་བཤད་ལ། བྱ་རྒྱུད་དེ་བཞིན་གཤེགས་པའི་རིགས་ཐུབ་པ་དམ་ཚིག་གསུམ་བཀོད་པའི་རྒྱུད་ནི། གཙང་མའི་གནས་ཀྱི་འོག་མིན་དུ་གསུངས་སོ། །སྤྱོད་པའི་རྒྱུད་ནི། འཕྲུལ་དགའ་སོགས་སུ་གསུངས་པར་བཤད་ཅིང་། རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ནི། སྟོན་པ་བཅོམ་ལྡན་འདས་དང་པོར་མངོན་པར་སངས་རྒྱས་པའི་ལོངས་སྐུ་རྣམ་སྣང་གངས་ཅན་མཚོས། གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་སྟེང་གི་འོག་མིན་དུ་གསུངས་པར་གསུངས་སོ། །ངེས་ཚིག་གི་ཡོ་ཀ་སྟེ་རྣལ་འབྱོར་རྒྱུད་ལས། རྩ་རྒྱུད་དེ་ཉིད་བསྡུས་པ་ན། རི་རབ་ཀྱི་རྩེ་མོར་གསུངས་ལ། འདི་ལ་སློབ་དཔོན་ཤཱཀྱ་བཤེས་གཉེན་གྱིས་རྒྱ་ཆེར་འགྲེལ་བ་ཀོ་ས་ལའི་རྒྱན་དང་། སློབ་དཔོན་ཀུན་དགའ་སྙིང་པོས་རྒྱ་ཆེར་འགྲེལ་བ་དེ་ཁོ་ན་ཉིད་སྣང་བར་བྱེད་པ་དང་། སློབ་དཔོན་སངས་རྒྱས་གསང་བས་འགྲེལ་བ་ཨ་བ་ཏ་ར་སྟེ་རྒྱུད་དོན་ལ་འཇུག་པ་ཞེས་བྱ་བ་མཛད་དོ། །ངན་སོང་སྦྱོང་རྒྱུད་ནི། སྟོན་པ་བཅོམ་ལྡན་འདས་ཀྱིས་རྣམ་པར་སྣང་མཛད་ཀྱི་སྐུར་བཞེངས་ནས་གསུངས་པར་བཤད་ལ། གནས་ནི། འདོད་ཁམས་ཀྱི་བྱེ་བྲག་སུམ་ཅུ་རྩ་གསུམ་གྱི་རྣམ་པར་རྒྱལ་བའི་ཁང་བཟང་གི་བྱང་ཕྱོགས་དགའ་བའི་ཚལ་དུ་གསུངས་སོ། །འཁོར་ནི། བྱང་ཆུབ་སེམས་དཔའ་བློ་གྲོས་ཚད་མེད་པ་ལ་སོགས་པའི་བྱང་ཆུབ་སེམས་དཔའ་རབ་ཏུ་མང་པོ་དང་། ཚངས་པ་དང་བརྒྱ་བྱིན་ལ་སོགས་པའི་ལྷ་རྣམས་དང་། གནོད་སྦྱིན་དང་དྲི་ཟ་དང་ཀླུ་ལ་སོགས་པའི་འཁོར་མང་པོ་ལ་གསུངས་སོ། །ཏིང་ངེ་འཛིན་ནི། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཉིད་ཀྱི་དཔྲལ་བའི་མཛོད་སྤྲུ་ནས་འོད་ཟེར་བཀྱེས་པས། དེས་ཕོག་པའི་ངན་སོངས་གི་སེམས་ཅན་ཉོན་མོངས་པའི་འཆིང་བ་ལས་གྲོལ་ནས། བདེ་བ་སོ་སོར་ཐོབ་སྟེ། སླར་དགའ་བའི་ཚལ་ཐམས་ཅད་སྣང་བར་བྱས་ནས། བཅོམ་ལྡན་འདས་ལ་མཆོད་ཅིང་ལན་བརྒྱ་ཕྲག་སྟོང་དུ་སྐོར་བ་བྱས། ལན་བརྒྱ་ཕྲག་སྟོང་དུ་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་ནོར་བུ་དྲི་མ་མེད་པའི་ཚལ་གྱི་སྟེང་དུ་འཁོར་དེ། ཀྱེ་མ་སངས་རྒྱས་ཀྱེ་སངས་རྒྱས། ཨེ་མའོ་སངས་རྒྱས་མཛད་པ་ལེགས། །གང་ཕྱིར་ངན་སོང་བདག་ཅག་སྦྱངས། །བྱང་ཆུབ་སྤྱོད་པ་ཉིད་ལ་བཀོད། །ཅེས་ཆེད་དུ་བརྗོད་པས། བརྒྱ་བྱིན་ངོ་མཚར་དུ་གྱུར་ནས། བཅོམ་ལྡན་འདས་ཀྱི་འོད་ཟེར་གྱི་སྣང་བས་སེམས་ཅན་ངན་སོང་ལས་གྲོལ་པ་ནི་ངོ་མཚར་ཆེའོ་ཞེས་གསོལ་པ་ལ། བཅོམ་ལྡན་འདས་ཀྱིས་བཀའ་བསྩལ་པ། ལྷའི་དབང་པོ། འདི་ནི་ངོ་མཚར་མི་ཆེ་སྟེ། སངས་རྒྱས་བཅོམ་ལྡན་འདས་རྣམས་ནི། ཚད་མེད་པའི་བསོད་ནམས་ཀྱི་ཚོགས་བསགས་པའོ། །གང་དེ་བཞིན་གཤེགས་པ་རྣམས་ཀྱིས་འདུལ་བར་མི་འགྱུར་བ་ནི་གནས་མ་ཡིན་ནོ། །ཞེས་བཀའ་བསྩལ་ཏོ།།
   དེ་ནས་བརྒྱ་བྱིན་གྱིས་བཅོམ་ལྡན་འདས་ལ་མཆོད་པ་ཆེན་པོས་མཆོད་དེ། འདི་སྐད་ཅེས་གསོལ་ཏོ། །བཅོམ་ལྡན་འདས། སུམ་ཅུ་རྩ་གསུམ་པའི་ལྷའི་རིས་འདི་ཉིད་ན། ལྷའི་བུ་ནོར་བུ་དྲི་མ་མེད་པའི་འོད་ཅེས་བགྱི་བ་ཞིག་ཤི་འཕོས་ནས་དགུང་བདུན་ལགས་ན། དེ་གང་དུ་སྐྱེས་ཞེས་སོགས་ཞུས་པས། བཅོམ་ལྡན་འདས་ཀྱིས་བཀའ་བསྩལ་པ། ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་ནི། འདི་ནས་ཤི་འཕོས་ཏེ་མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་སོ། །དེར་ལོ་སྟོང་ཕྲག་བཅུ་གཉིས་ཀྱི་བར་དུ་སྡུག་བསྔལ་མི་བཟད་པ་མྱོང་ཞིང་། དམྱལ་བ་ཆུང་ངུ་རྣམས་སུ་ཡང་ལོ་སྟོང་ཕྲག་བརྒྱར་སྡུག་བསྔལ་མྱོང་བར་འགྱུར་རོ། །ཞེས་སོགས་བཀའ་བསྩལ་པས། བརྒྱ་བྱིན་ལ་སོགས་པའི་ལྷ་རྣམས་ཤིན་ཏུ་སྐྲག་སྟེ། བཅོམ་ལྡན་འདས། ཅི་ནས་ཀྱང་སྡུག་བསྔལ་གྱི་ཕུང་པོ་འདི་ལས་བསྐྱབ་ཏུ་གསོལ་ཅེས་ཞུས་སོ། །དེ་ནས་བཅོམ་ལྡནའདས་ཀྱིས་ངན་སོངས་རྣམ་པར་སྦྱོང་བའི་རྒྱུད་མ་ལུས་པ་གསུངས་སོ་ཞེས་བཤད་དོ།།

༼རྩོམ་སྒྲིག་འགན་ཁུར་བ། ༽

འབྲེལ་ཡོད་ནང་དོན།