| བོད་མིས་སྒོ་དང་སྒེ་ཁུང་ལ་ཤམ་བུ་རྒྱག་རྒྱུར་དྭངས་ཞེན་ཆེན་པོ་བྱེད་སྲོལ་ཡོད། ལྷག་པར་དུ་ལོ་གསར་གྱི་སྔ་ནུབ་དུ་སྒོ་སྒེ་ཁུང་གི་ཤམ་བུ་ཚང་མ་གསར་པ་བརྗེ་ལ། གཉེན་སྒྲིག་སོགས་ཀྱི་མཛད་སྒོ་ཚུགས་སྐབས་ཀྱང་ཤམ་བུ་གསར་པ་རྒྱག་སྲོལ་ཡོད། སྒོ་དང་སྒེ་ཁུང་ལ་ཤམ་བུ་རྒྱག་དགོས་དོན་གང་ཡིན་ཟེར་ན། དེའི་ཐད་ཀྱི་ཁ་གསལ་ཡིག་རིགས་སོགས་མཇལ་མ་བྱུང་ཡང་། རྒན་རབས་ལ་བཅར་འདྲི་ཞུས་པ་ལྟར་ན། ཤམ་བུ་རྒྱག་པའི་སྲོལ་ནི་བཀྲ་ཤིས་རྟེན་འབྲེལ་གྱི་མཚོན་རྟགས་ཤིག་ཡིན་ཏེ། ལོ་གསར་དང་རྟེན་འབྲེལ་གྱི་མཛད་སྒོ་ཚུགས་སྐབས་ཤམ་བུ་གསར་པ་རྒྱག་སྲོལ་ཡོད་པ་དང་། མི་འདས་གྲོང་སོགས་བཀྲ་མི་ཤིས་པའི་བྱ་བ་བྱུང་སྐབས་མྱ་ངན་མཚོན་ཆེད་དུ་ཤམ་བུ་ཕབ་སྲོལ་ཡོད་པ་བཅས་ཀྱི་ཐོག་ནས་ཤམ་བུ་རྒྱག་པའི་སྲོལ་དེ་རྟེན་འབྲེལ་མཚོན་བྱེད་ཡིན་པ་དང་གཅིག སྒོ་དང་སྒེ་ཁུང་ལ་ཤམ་བུ་རྒྱག་པ་དེ་ཁང་པའི་མཛེས་ཆའི་ཆེད་དུ་ཡིན་པ་ནི་གཏན་འཁེལ་བཤད་ཆོག་པ་ཞིག་ཡིན། མི་སོ་སོའི་འབྱོར་པར་གཞིགས་ཏེ་འབྱོར་པ་ཅན་གྱིས་གྲུ་རྩེའི་ཤམ་བུ་རྒྱག་གིན་ཡོད་ལ་དེ་མིན་གྱིས་རས་ཀྱི་ཤམ་བུ་རྒྱག་གི་ཡོད་པ་དང་གཉིས། བོད་མིའི་ཁང་པའི་སྒོ་དང་སྒེ་ཁུང་ལ་མཛེས་སྡུག་ལྡན་པའི་ཚོན་རྩི་གཏོང་སྲོལ་ཡོད་པས་ཤམ་བུ་རྒྱག་པ་དེས་མཛེས་རྒྱན་དང་རྟེན་འབྲེལ་མཚོན་བྱེད་ཁོ་ན་མིན་པར་སྒོ་སྒེ་ཁུང་གི་ཚོན་རྩེར་སྲུང་སྐྱོབ་ཀྱི་ནུས་པའང་ཐོན་ཐུབ་ཀྱི་ཡོད་པ་དང་གསུམ་བཅས་སོ། གཞན་ཡང་གཙང་ཁུལ་ལྟ་བུར་ཆ་བཞག་ན་དེར་ཆར་ཡོལ་ཞེས་འབོད་སྲོལ་ཡོད་པས། དེ་ལས་ཀྱང་གང་གི་དོན་བྱེད་ནུས་པ་མདོ་ཙམ་རྟོགས་ཐུབ། |
