གནས་ཡུལ། མདུན་ངོས། སྡོད་ཁང་།
 
 
༄༅།། ཨར་ཀ་གྲོང་ཚོའི་ས་གཡང་སེར་འཁོར་གཏོང་སྲོལ།
སྤེལ་དུས།2015-06-03   ཡོང་ཁུངས་།བོད་ལྗོངས་རིག་གནས་དྲ་བ།   རྩོམ་པ་པོ། རིན་ཆེན་གྱིས་བསྒྲིགས།

དང་པོ།  ཁ་བྱང་གསལ་འགྲེལ་བྱེད་པ།
      
ཨར་ཀ་གྲོང་ཚོ་ནི་བསིལ་ལྡན་ཁ་བའི་ལྗོངས་ཀྱི་ལྷོ་རྒྱུད་སྣམ་བུ་སྤུ་ཕྲུག་ཤད་མའི་འབྱུང་ཁུངས་གྲ་ནང་རྫོང་གི་ནང་ངོས་ཐག་མི་རིང་བའི་སར་གླང་ཆེན་ཉལ་འདྲའི་རི་བོ་ཆུ་མིག་རིའི་ཞབས་འོག་ཏུ་ཆགས་ཤིང་གྲོང་ཚོ་འདིར་ཨར་ཀ་དང་འབོང་སྟོང་། དཀར་ཆུང་ཞེས་གྲོང་ཆུང་གསུམ་ལས་གྲུབ་ཡོད་ལ་དེ་དག་ཙུའུ་བདུན་དུ་དབྱེ་ནས་ཡོད།
      
ས་གཡང་ནི་དཔལ་དང་ཕུན་ཚོགས་འཐོབ་རྒྱུའི་གཡང་འགུགས་ཆོ་ག་རྣམ་པ་མི་འདྲ་བའི་ནང་ནས་བསོད་ནམས་ཅན་གྱི་ནོར་གཡང་འགུགས་པ་ལ་འདོད་དེ་ས་ཞིང་ངམ་ལོ་ཏོག་ལ་ཕྱ་གཡང་འགུགས་ནས་ཁུག་པར་བྱེད་པར་ཟེར་བ་དང་སེར་འཁོར་ནི་མདོག་གི་སྒོ་ནས་བཏགས་པར་གྲགས་ཏེ་སྐབས་དེར་སྟོན་མ་བསྡུ་བའི་སྔོན་ཙམ་དུ་ཡིན་པས་ལོ་ཏོག་ཚང་མ་སྨིན་ཏེ་སེར་པོར་འགྱུར་བས་ན་དེ་ལྟར་བརྗོད་པ་ཡིན། ཡོངས་གྲགས་སུ་བོད་ཀྱི་སོ་ནམ་གྱི་གྲོང་ཕལ་ཆེར་དུ་ལོ་ལྟར་གཏོང་སྲོལ་ཡོད་པའི་འོང་བསྐོར་དང་འདྲ་བ་ཡིན་ཞིང་ཨར་ཀ་གྲོང་ཚོས་ས་གཡང་ཞེས་པ་ལོ་དྲུག་དང་སེར་འཁོར་ལོ་བཅུ་གཉིས་རེར་ཐེངས་རེ་གཏོང་གི་ཡོད་པ་ལས་ལོ་ལྟར་གཏོང་བ་ནི་མ་ཡིན།
གཉིས་པ། གཏོང་དུས་དང་གཏོང་ཚུལ་གླེང་བ།
      
ས་གཡང་དང་སེར་འཁོར་གཉིས་པོ་ལོ་བཅུ་གཉིས་ནང་ཐེངས་རེ་ལས་མེད་དུས་གྲོང་མི་ཚང་མས་དེ་ནི་གྲ་རྒྱས་པོ་ཞིག་གཏོང་རྒྱུའི་རེ་བ་བྱེད་ལ་གཏོང་གི་ཡང་ཡོད་དེ་ལོ་དེའི་བོད་ཟླ་དྲུག་པ་བདུན་པ་ཙམ་གྱི་(གཙོ་བོ་ལོ་དེའི་སྟོན་བསྡུའི་དུས་ཚོད་ལ་བལྟ་བ་ཡིན་ཏེ་སྟོན་མ་བསྡུའི་སྔོན་དུ་གཏོང་བ་ཡིན)ཚེས་ཆ་བཟང་བའི་ཉིན་ཞིག་ནས་འགོ་བཙུགས་ཏེ་ཉིན་གསུམ་རིང་གཏོང་གི་ཡོད་ཅིང་ཉིན་དང་པོའི་ཞོགས་པ་སྔ་པོ་ནས་གྲོང་མི་ཕོ་མོ་རྒན་གཞོན་རྣམས་བོད་ལུགས་ཀྱི་རྒྱན་གོས་གང་ལེགས་སྤྲད་དེ་འདུ་ཁང་ཞེས་པ་ཨར་ཀ་གྲོང་དབུས་སུ་དུས་རྒྱུན་དུ་ཆོས་ལུགས་ཀྱི་ཆོ་ག་སྤེལ་སའི་ས་ཆར་འཛོམས་ནས་འོང་བསྐོར་དངོས་སུ་འགོ་འཛུགས་པ་ཡིན།  དེ་ཡང་ཕ་མ་གཉིས་འཛོམས་ཀྱི་ཕོ་མོ་ཁྱད་མེད་ལོ་བཟང་ཞིག་གིས་སྲིད་པ་ཧོ་འཁྱེར་ཞིང་རུ་སྣེ་འཁྲིད་དེ་རིམ་བཞིན་ལྷ་སྐུ་རྩ་ཆེན་འཁྱེར་མི། བསང་དུད་སྔོ་ལྷོག་ཏུ་འཕྱུར་བའི་མེ་ཁོག་འཁུར་མི། དམར་པོའི་གཟན་གྱིས་གཡོགས་པའི་གྲྭ་པ། རྟ་ཧྲག་ཐོག་ཏུ་འཛེགས་པའི་རྟ་པ།  མདའ་གྲི་མདུང་གསུམ་ཐོགས་པའི་གོ་པ་སོགས་དང་། ལག་ཏུ་མདའ་དར་འཁྱེར་ཞིང་རྒྱབ་ཏུ་འབུམ་ཆོས་ཀྱི་པོད་རེ་འཁུར་བའི་མི་རྣམས་བཀོད་སྒྲིག་ཡོད་པའི་ཐོག་ནས་རུ་བསྟར་ལེགས་པར་བསྒྲིགས་ཏེ་རང་ཁོངས་སུ་གཏོགས་པའི་ཞིང་ཁར་བསྐོར་བ་བྱེད་པར་འགྲོ་བ་ཡིན། ཉིན་གུང་མཚམས་སུ་བསང་གླིང་ཞེས་པའི་ཞིང་འགྲམ་གྱི་རི་གཤམ་དུ་ངལ་གསོ་བྱེད་པ་དང་ཉིན་ཕྱེད་ཀྱི་བཟའ་བཏུང་ལ་རོལ་རྗེས་མུ་མཐུད་ཞིང་ཁ་བསྐོར་འཕྲོ་རྣམས་སྐོར་ནས་གྲོང་ཚོའི་ཐོད་ཀྱི་བསང་གསོལ་བྱེད་སའི་བསང་ཁུང་རྡོ་ལྕོག་གི་འགྲམ་དུ་བསང་གཏོང་བ་དང་།ལྷ་གསོལ་ལོ། ལྷ་གསོལ་ལོ། སྟེང་ལྷའི་ཡུལ་ལ་བསང་བཞེས། འོག་ཀླུའི་ཡུལ་ལ་བསང་བཞེས། བར་གཙང་ཁའི་ཡུལ་ལ་བསང་བཞེས། བསང་བཞེས། བསང་བཞེས། ཀི་ཀི་བསོ་བསོ་ལྷ་གསོལ་ལོ། ཞེས་ལྷ་གསོལ་ལེགས་པར་བྱེད། དེ་ནས་ཇ་ཆང་ཡུན་ཙམ་བཏུངས་ཏེ་ཉིན་དེའི་འོང་བསྐོར་རམ་ཆོས་བསྐོར་གྱི་བྱེད་སྒོ་ཡོངས་སུ་མཇུག་སྒྲིལ་བར་བྱེད་དོ།།
                             
བཟང་བཟང་ཚེས་ཆ་བཟང་བའི་བཀྲ་ཤིས་ཀྱི་ཉིན་མོར།།
                             
ཟབ་ཟབ་དམ་ཆོས་པུ་ཏི་སྒལ་སྟེང་དུ་འཁུར་ནས།།
                             
ཡངས་ཡངས་འབྲས་བུས་ལྕི་བའི་ཞིང་ས་རྣམས་བསྐོར་གྱིན།།
                             
འགུགས་འགུགས་ནོར་དཔལ་ཕྱ་གཡང་ཁུག་པ་ཞིག་བྱས་སོང་།།
      
དེའི་དགོང་དྲོར་འདུ་ཁང་འགྲམ་གྱི་གཡུལ་ཁ་དངུལ་གྱི་གཞོང་པ་འདྲ་བ་ཞིག་ཏུ་འཛོམས་ཏེ་ཇ་ཆང་གི་དཔལ་ལ་རོལ་ཞིང་འབག་ཕྲུག་ཚོས་གར་འཆམ་འཁྲབ་པ་དང་གཞས་པ་གཞས་མ་ཚོས་གཞས་ཆེན་དང་ཞབས་བྲོ་འཁྲབ་པ། རྟ་པ་དང་སྒ་གཡོགགོ་པ་སོགས་ཁག་ཚང་མས་རང་རང་གི་གཞས་དང་ཞབས་བྲོ་སྣ་ཚོགས་པ་འཁྲབ་སྟེ་སྙན་པའི་དབྱངས་དང་སྐྱིད་པའི་ཞབས་བྲོས་ལོ་ལེགས་ཐོབ་པར་རྟེན་འབྲེལ་ཞུ་ཞིང་གྲོང་ཚོ་ཁྱོན་ལ་བདེ་སྐྱིད་སྤྲོ་སྣང་གིས་ཁེངས་དུས་ལྷ་ཆེན་ཚངས་པ་དང་བཅས་པའི་ལྷ་ཚོགས་ཀྱི་སྐོར་ཞིག་ཀྱང་ལྟད་མོར་བྱོན་ནས་མི་ཡུལ་གྱི་བདེ་བར་ཡིད་སྨོན་བྱེད་བཞིན་གནས་སོ།།
                             
གནའ་དེང་སྲོལ་ཟུང་གླུ་སྒྲ་སྒྲ་འཛིན་གྱི་ཉིང་བཅུད།།
                             
འཁྲུག་ཆེ་ཞབས་བྲོའི་སྟངས་སྟབས་མིག་ཟུང་གི་རྒྱགས་ཕྱེ།།
                             
ཇ་ཆང་བདུད་རྩིའི་སྙིང་པོ་བཀྲ་ཤིས་པའི་རྟགས་ལ།།
                             
ཕྱོགས་ཁག་ལྟད་མོ་བ་ཚོའི་བསྔགས་བརྗོད་ཀྱི་མཐེ་བོང་།།
      
ཕྱི་ཉིན་གྱི་ཞོགས་པར་ཤར་ཕྱོགས་ལྷུན་པོའི་སྤོ་ནས་རྟ་བདུན་དབང་པོའི་འཛུམ་ཞལ་ལྷུག་པོར་གྲོལ་ཏེ་འདོམ་གང་ཙམ་འཕགས་མཚམས་སུ་ཚང་མ་མ་གྲོས་གཅིག་མཐུན་ངང་གྲོང་ཚོའི་བྱང་ཕྱོགས་ཆང་ཐོད་ཟེར་བའི་ས་སྟོང་གཡུ་ཡི་སྡེར་མ་ཆེན་པོ་ཞིག་ལྟར་སྣང་བ་རུ་འཛོམས་ཏེ་གཞས་ཆེན་ཞབས་བྲོ་དང་གོ་གཞས། རྟ་པ་དང་སྒ་གཡོག་གི་གཞས་སོགས་ཀྱི་གཙོ་བོར་བྱས་པའི་གཞས་ཞབས་ཀྱི་སྟོན་མོ་འགའ་བཤམས་རྗེས་སྐྱེ་བོ་ཀུན་གྱིས་རེ་སྒུག་དང་དགའ་བ་ཆེས་ཆེར་བྱེད་པའི་རྟ་རྒྱུགས་མདའ་འཕེན་འགྲན་བསྡུར་ལ་གྲ་སྒྲིག་དང་དངོས་སུ་འགྲན་འགོ་འཛུགས་པ་ཡིན། སྐབས་དེར་ཡུལ་གྲོང་གཞན་གྱི་ལྟད་མོ་བ་བརྒྱ་ཕྲག་མང་པོའང་ཡུལ་འདིའི་ཕྱོགས་སུ་མ་བོས་མགྲོན་དུ་བྱོན་ནས་རྟ་རྒྱུགས་ཐང་གི་གཡས་གཡོན་དུ་རུབ་སྟེ་རྟ་པ་ཚོའི་རྟ་རྩལ་འགྲན་པར་སྒུག་ནས་འདུག་གོ།
      
སྔོན་ལ་རྟ་དཀར་མི་དཀར་གྱིས་རྟ་སྣེ་འཁྲིད་དེ་རྟ་ཁ་ཤོར་བ་དང་མདའ་འཕེན་སྐབས་སོགས་ཀྱི་བདེ་འཇགས་ལ་དོ་སྣང་བྱེད་དགོས་པའི་སྐུལ་མ་བྱེད་པ་དང་ཡར་རྒྱུགས་མར་རྒྱུགས་ཐེངས་འགའ་བྱས་རྗེས་གཞི་ནས་དེ་མིན་གྱི་རྟ་རྣམས་གཏོང་དགོས་པ་ཡིན། ཡུལ་ལུང་རེ་འགར་རྟ་རྒྱུགས་གཏོང་སྐབས་ཐང་ཡངས་ངོས་སུ་ཚང་མ་མཉམ་དུ་གློད་ནས་མགྱོགས་ཚད་དང་རྟ་ཐོག་གི་རྩལ་རྩེད་འགྲན་པར་བྱེད་ཀྱང་ཨར་ཀ་གྲོང་ཚོར་ནི་དེ་འདྲ་མིན་ཏེ་ས་ཤུར་རིང་ཚད་སྨིད་བརྒྱ་ལྷག་དང་ཞེང་ཚད་སྨིད་གསུམ་ཙམ་ཆེད་མངགས་རྟ་རྒྱུགས་ཁུལ་བཟོས་ཡོད་པ་དེའི་ནང་རྟ་རེ་རེ་བཞིན་སྔ་རྗེས་སུ་འགྲན་པར་བྱེད། རྟ་པ་ཚོའི་བྱ་འཕུར་བ་བཞིན་གྱི་མྱུར་ཚད་ཀྱིས་སྐབས་རེ་གཡོན་ངོས་སུ་བཙུགས་པའི་འབེན་གཉིས་པོའི་སྙིང་རྩ་བཟུང་ནས་མདའ་རྒྱག་ལ་མཚམས་རེ་ས་ཐོག་ཏུ་བཀྲམས་པའི་ཁ་བཏགས་བསྒྲུག་ཅིང་ལན་རེར་རྟ་ཐོག་ནས་རྩལ་སྣ་མང་པོས་རང་ཉིད་ཀྱི་དཔའ་རྩལ་ངོམས་དུས་ངོ་མ་ཆེད་ལས་རྟ་རྩལ་པ་ཞིག་དང་གཉིས་སུ་མ་མཆིས། འདིར་གསལ་བཤད་ཞུ་དགོས་པ་ཞིག་ནི་ས་ཁུལ་འགའ་རེར་རྟ་ཐོག་ནས་མེ་མདའ་རྒྱག་པ་དང་འབེ་ཤུ་འཕེན་པར་བྱེད་རུང་འདི་གར་ནི་སྨྱུག་མའམ་ཤིང་རིགས་ལས་བཟོས་པའི་མདའ་འཕེན་པ་ཡིན་ནོ།།
                             
ཅང་ཤེས་རྟ་ཕོས་དགུང་སྔོན་ལྕགས་བྱར་འགྲན།།
                             
རྟ་པ་གཞོན་ནུས་སྤྲེལ་རྒན་རྫུ་འཕྲུལ་འཁུ།།
                             
སྣ་ཚོགས་རྩལ་ལག་གཅིག་འགྲན་གཉིས་འགྲན་དག།
                             
ཕ་ཡུལ་མཛེས་པའི་རྒྱན་གྱི་རྒྱུར་འགྱུར་ཅིག།
      
དེ་ནས་ཉིན་ཕྱེད་ཟ་མ་བཟས་རྗེས་ཀྱི་ཕྱི་དྲོར་སླར་ཡང་འདུ་ཁང་མདུན་གྱི་གཡུལ་ཁའི་ནང་འཛོམས་ནས་གླུ་གར་བང་མཛོད་ཀྱི་སྒོ་མོ་ཕྱེ་སྟེ་སྲོལ་རྒྱུན་གནའ་ཉམས་ཀྱིས་ཕྱུག་པའི་གཞས་ཆེན་དང་ཞབས་བྲོ དཔའ་བོ་གེ་སར་གྱི་རྟུལ་ཞུགས་འཛིན་པའི་གོ་པའི་གྱེར་གཞས་དང་ཟངས་དུང་གི་སྒྲ དེ་བཞིན་རྟ་པ་སྒ་གཡོག་གིས་གཙོས་པའི་གླུ་གར་གྱི་སྙན་དབྱངས་ནི་ཁ་ཉིན་ལས་འཁྲུག་ཆ་དོད་ལ་ཁ་ཉིན་ལས་བཅུད་སྣ་འཛོམས། དེ་བས་དེང་རབས་གསར་དུ་དར་བའི་གླུ་གཞས་ཀྱི་འགྱུར་ཁུག་ཞིག་ལས་མི་སྒེར་དང་མི་སྒེར། ཙུའུ་ཆུང་དང་ཙུའུ་ཆུང་སོགས་ལ་འགྲན་སློང་གི་ཚ་རླབས་སྐུད་མེད་ཀྱི་རྒྱང་བསྒྲགས་གླེང་སྤྱད་དེ་ལས་འཕྱུར་ཞིང་མཐའ་འཁོར་ནས་སྒྲགས་པའི་ཐལ་མོའི་སྡེབ་སྒྲ་ནི་སྐབས་དེའི་འཁྲབ་སྟོན་པ་དང་གཞས་པ་གཞས་མ་ཆུང་ཆུང་ཚོར་བསྔགས་བརྗོད་དང་ངར་ཤ་སློང་བའི་རྒྱུ་གཙོ་བོར་འགྱུར་འདུག  ད་དུང་མུ་མཐུད་ནས་འགྲན་བྱ་ནི་རྡོ་འགྱོག་དང་ཐག་འཐེན་གཉིས་རེད། འདི་གཉིས་ནི་ཕོ་རྒོད་པོའི་ཤེད་ཤུགས་འགྲན་ས་རེད་ལ་དམན་བུ་མོའི་ཁ་འགྲས་མཚར་ས་ཡང་རེད། ཕྱོགས་བཞི་མཚམས་བརྒྱད་ནས་རུབ་པའི་ལྟད་མོ་བའི་ཀློང་ན་རང་ཉིད་ཀྱི་རྒྱུད་ལ་འཇགས་པའི་དཔའ་རྩལ་ངོམས་དུས་ཅི་འདྲའི་ཉམས་བཟོ་དོད་ཅིང་ཡིད་དུ་འོང་བ་ཞིག་རེད་ཨང་།
      
བལྟ་འདོད་ལ་ཉན་སྤྲོ་བའི་ལེ་ཚན་དག་རེ་རེ་བཞིན་མཇུག་སྒྲིལ་བ་དང་ནུབ་རིའི་ཕྱོགས་ཀྱི་ཁྲི་གདུགས་ཉི་མས་ཀྱང་སྒོར་འཁྱིལ་ལེར་ཡོད་པའི་ལྟད་མོ་བ་ཚོའི་འདུན་པ་དང་འདྲ་བར་རི་རྩེ་ནས་ཡིབ་པར་སྐྱོ་བ་སྐྱེས་འདུག འདི་དག་ནི་ངའི་མཐོང་སྣང་དང་དྲན་ཤེས་ཀྱི་ཡོལ་བར་གསལ་བའི་དུས་ནས་བསྒྲིགས་པ་ལས་སྔོན་གྱི་དུས་སུ་དེང་རབས་གསར་དུ་དར་བའི་ནང་ཚན་དག་མེད་པར་བཤད་དོ།།
                             
ཡུན་གཅིག་ས་གཡང་སེར་འཁོར་བཀྲ་ཤིས་དང་བདེ་ལེགས།།
                             
ངོ་མཚར་བྱེད་སྒོ་སྣ་ཚོགས་ཕུན་སུམ་ནི་ཚོགས་སོ།།
                             
སྒོ་གསུམ་ཀུན་ལ་བདེ་བ་སྐྱིད་སྣང་ཞིག་ཚོར་དུས།།
                             
ཕྱི་ནང་སྐྱེ་འགྲོའི་བརྟན་པ་དབང་མེད་དུ་འཕྲོག་སོང་།།
      
དེ་རིང་ནི་ཉིན་གསུམ་པ་སྟེ་མཇུག་མཐའ་མའི་ཉིན་ཞིག་རེད། དེ་རིང་སྔ་དྲོར་མི་རྣམས་གྲོང་བྱང་ཆང་ཐོད་ཀྱི་ས་ཆར༼སྔོན་དུས་འདུ་ཁང་ནང་ཡིན༽འཛོམས་ཏེ་གྲྭ་པ་ཚོས་ཆོས་ལུགས་ཀྱི་ཆོ་ག་འགའ་སྤེལ་རྗེས་ཡུལ་གྱི་ཆོས་སྐྱོང་སྲུང་མ་དང་བུ་རྒྱལ་ཡིད་བཞིན་ནོར་བུའི་ནས་འབྲུ་བྱིན་ཅན་ཡང་སྟེར་བར་བྱེད།༼རིགས་པ་འདིའི་ཐད་གུས་པར་མཐོང་ཆོས་སུ་འགྱུར་བ་ཙམ་ལས་བྱང་ཆ་མི་ལྡན་པས་རེ་ཞིག་རྒྱས་པར་མ་བཤད༽གནའ་དུས་ནི་འདི་ཙམ་གྱིས་འཐུས་པར་བཤད་ཀྱང་དེང་དུས་གྲོང་མིའི་སྐུལ་མ་དང་ལྟད་མོ་བའི་རེ་འབོད་ལས་ཡང་བསྐྱར་རྟ་རྒྱུགས་ཐེངས་གསུམ་འགྲན་པར་བྱས་ཏེ་ཉིན་ཕྱེད་ཀྱི་ལྟོ་ཟར་འགྲོ་བ་ཡིན་ནོ།།
      
ཕྱི་ཆའི་དུས་ལ་མུ་མཐུད་ནས་གཞས་དང་ཞབས་བྲོའི་སྟོན་མོ་ཕྲན་ཙམ་བཤམས་རྗེས་ཁ་བཏགས་གཡོགས་པ་ཞེས་གཞས་པ་གཞས་མ་དང་རྟ་པ་སྒ་གཡོག གོ་པ་འབག་ཕྲུག་སོགས་ས་གཡང་སེར་འཁོར་ནང་ཚུད་པའི་མི་ཚང་མར་སྔོན་ལ་གྲོང་ཚོ་ནས་སེམས་མཚོན་ཁ་བཏགས་རེ་གཡོགས་པ་དང་དེ་རྗེས་ཕྱི་ཕྱོགས་ན་ཡོད་པའི་རང་གི་སྤུན་མཆེད་ཤ་ཉེ གྲོགས་པོ་གྲོགས་མོ་སོགས་ཚང་མས་ཆེད་དུ་ཁ་བཏགས་གཡོགས་པར་ཡོང་བ་བཞིན་རང་གི་བློ་དཀར་གཉེན་ཚན་རྣམས་ཀྱི་མགུལ་ལ་གངས་ལྟར་དཀར་བའི་དར་དཀར་བསྒྲོན་ནས་རྟེན་འབྲེལ་མཚོན་པར་བྱེད་དོ།།
      
ད་ནི་དུས་ཡུན་ཉིན་གསུམ་གྱི་དགའ་སྟོན་ལ་ཡོངས་སུ་བཞི་ཤད་འགོད་པའི་དུས་ལ་སླེབས་ཤིང་མི་རྣམས་ཀྱང་འདས་པའི་ལོ་ཟླའི་ནང་ལོ་ལེགས་བྱུང་བ་དང་མ་འོངས་པར་ལོ་ལེགས་ཡོང་བར་འབད་ཆེད་ས་དཀར་གྱིས་འཐེན་པའི་ལོ་ལེགས་ཞེས་པའི་ཡིག་འབྲུ་ཆེན་པོ་གཉིས་ཀྱི་སྟེང་འདུས་ཏེ་ཆེས་མཐའ་མའི་མཇུག་སྒྲིལ་ཞབས་བྲོར་རོལ་བ་ནི་ཇི་འདྲའི་དྲན་གསོར་འོས་ཤིང་དོན་སྙིང་ལྡན་པ་ཞིག་རེད་ལ་མི་ལོ་བཅུ་གཉིས་རྗེས་ཀྱི་དེ་རིང་སླར་ཡང་འདི་རུ་འཛོམས་པའི་བཀྲ་ཤིས་དང་བཅས་སྐྱེ་བོ་ཀུན་ནད་མེད་ཚེ་རིང་དང་བྱ་བ་ལམ་ལྷོངས་ཡོང་བའི་སྨོན་པ་རྩེ་གཅིག་ནས་ཞུས་ཏེ་མཇུག་བསྡོམས་བཀོད་པར་བྱས་སོ།།
                             
དཀར་གཙང་མཇལ་དར་མི་ཚོགས་ཀློང་ན་བཀྲ།།
                             
བཀྲ་ཤིས་སེར་འཁོར་གྲོང་གི་ཕང་བར་འཁྲུག།
                             
འཁྲུག་ཆེའི་རྟ་རྩལ་གླུ་གར་སྣ་ཚོགས་འདི།།
                             
འདི་ཙམ་གྱིས་ནས་རྔ་མ་བསྡུ་བར་བྱས།།
གསུམ་པ། མཇུག་གི་གཏམ་དུ་ཞུ་བར།
      
གོང་དུ་གླེང་ཟིན་པ་ནི་ཨར་ཀ་གྲོང་ཚོའི་ས་གཡང་སེར་འཁོར་གཏོང་ཚུལ་རགས་བསྡུས་རེད། འདིའི་ཐད་ཕལ་ཆེར་ཡུལ་གཞན་གྱི་འོང་བསྐོར་དུས་ཆེན་དང་ཆ་འདྲ་བས་ཡོངས་སུ་གཅིག་གཅིག་གཉིས་གཉིས་ཀྱིས་རྒྱས་པར་མ་གླེང་། གཙོ་ཆེ་བ་ནི་གཤམ་དུ་བཀོད་རྒྱུའི་དོན་ཚན་བཞི་པ་གཞས་དང་ཞབས་བྲོའི་ཚིག་རྐང་ཕྱོགས་བསྡུས་དེ་ཡིན། ཅིའི་ཕྱིར་ཞེ་ན། རིགས་པ་དེར་དད་པ་དང་བྱང་ཆ་ལྡན་པའི་སྐྱེ་བོ་ཕལ་ཆེ་བ་ནི་ད་ཆ་ནམ་ལངས་སྐར་མ་བཞིན་གཅིག་ཟུམ་གཉིས་ཟུམ་དུ་འགྱུར་དུས་དེ་དང་ལྷན་དུ་རིག་གནས་འདི་ཡང་ཟུམ་པར་བྱས་ན་མི་འགྲིག་པའི་ཕྱིར། དེའི་དབང་གིས་གུས་པས་དེ་སྔོན་སྲོལ་ལུགས་འདིར་དགའ་བ་དང་དྲན་ཤེས་ཡོད་པའི་རྒན་རབས་མང་པོར་སྐད་ཆ་དྲིས་པ་རྣམས་ཟིན་བྲིས་སུ་བཏབ་སྟེ་སྤེལ་བ་ནི་དོན་སྙིང་ལྡན་པ་ཞིག་ཡིན་པ་རང་ཉིད་ལ་གདེང་ཚོད་ཡོད་ལ་ང་ཚོ་རྗེས་རབས་པ་ཚོའི་ཕྲག་ཐོག་ཏུ་འབབ་པའི་འགན་འཁྲི་ཞིག་ཀྱང་ཡིན་པ་སྨོས་མེད་རེད། འོན་ཏེ་ཕངས་པའི་མདའ་མོ་སླར་ཡང་མི་ལོག་པ་ལྟར་གཞས་ཚིག་འགའ་ཞིག་ནི་མེས་པོ་འདས་པོ་དེ་དག་དང་མཉམ་དུ་གཤིན་རྗེའི་མངའ་འོག་ཏུ་བསྡུས་ཚར་འདུག་པ་ནི་ངས་འདི་གར་ཕྱོགས་བསྡུས་བྱས་པ་རྣམས་ཀྱང་མི་སྣ་མང་པོར་སྐད་ཆ་དྲིས་ནས་བྲིས་པ་ཞིག་ཡིན་ཡང་ཡོངས་སུ་ཆ་ཚང་བ་ནི་མ་ཡིན་པ་རྒན་རབས་མང་པོས་བཤད། དེ་འཕྲོས་གང་ཞིག་ཡིན་པ་ནི་ཁོ་ཚོའི་དྲན་ཤེས་སུའང་མི་གསལ་བས་གོང་གི་གཙོ་ཆེར་འཛིན་པའི་རྒྱུ་མཚན་དེ་ལའང་རྦད་དེ་བདེན་བསྒྲུབས་བྱས་པ་ཞིག་མ་ཡིན་ནམ།
      
མཇུག་ཏུ་གཞས་ཚིག་དེ་དག་བསྡུ་བའི་བརྒྱུད་རིམ་ནང་ཁོ་ཚོའི་ངག་བཤད་ཚང་མར་ཡུལ་སྐད་ཤན་ཞུགས་ཆེ་བར་འདུག་པས་ཐ་སྙད་རེ་འགའ་རང་ལ་ཡོད་པའི་འབྲེལ་ཡོད་དཔྱད་གཞི་དང་ཚིག་མཛོད་དུ་མི་གསལ་བ་ན་རང་བློས་གང་དཔོག་གིས་བཟོ་བསྒྲིགས་བྱས་པར་ནོར་འཛོལ་ཡོད་ཚེ་རྒྱ་ཆེའི་ཀློག་པ་པོས་དག་ཐེར་གནང་རོགས་ཞུ།
བཞི་པ།  གཞས་དང་ཞབས་བྲོའི་ཚིག་རྐང་ཕྱོགས་བསྡུས།
  གཞས་ཆེན་གྱི་གྱེར་གཞས་དང་པོ།
                             
དུས་ད་ལོའི་དགའ་ལ་དེ་ཞག་སྐྱིད་པ།
                             
གནངས་རོས་གསེར་གྱི་ཟམ་པ་བཙུགས་སུ་ཆོག་ག་ཡོད།
                             
ཉི་མ་ཤར་གྱི་ཕྱོགས་ནས་སྒོ་མོར་ཕྱེ།
                             
ཤར་རྡོ་རྗེ་སེམས་དཔའི་སྒོ་མོར་ཕྱེ།
                             
ཉི་མ་ལྷོ་ཡི་ཕྱོགས་ནས་སྒོ་མོར་ཕྱེ།
                             
ལྷོ་རིན་ཆེན་འབྱུང་ལྡན་སྒོ་མོར་ཕྱེ།
                             
ཉི་མ་ནུབ་ཀྱི་ཕྱོགས་ནས་སྒོ་མོར་ཕྱེ།
                             
ནུབ་སྣང་བ་མཐའ་ཡས་སྒོ་མོར་ཕྱེ།
                             
ཉི་མ་བྱང་གི་ཕྱོགས་ནས་སྒོ་མོར་ཕྱེ།
                             
བྱང་དོན་ཡོད་གྲུབ་པའི་སྒོ་མོར་ཕྱེ།

                              ཉི་མ་དབུས་ཀྱི་ཕྱོགས་ནས་སྒོ་མོར་ཕྱེ།
                             
དབུས་རྣམ་པར་སྣང་མཛད་སྒོ་མོར་ཕྱེ།ཞེས་པ་དང་།
                             
ཉི་མ་ཤར་གྱི་ཕྱོགས་ནས་ཕྱྭ་བཀུག་ཤོག  གཡང་བཀུག་ཤོག
                             
ཉི་མ་ལྷོ་ཡི་ཕྱོགས་ནས་ཕྱྭ་བཀུག་ཤོག  གཡང་བཀུག་ཤོག
                             
ཉི་མ་ནུབ་ཀྱི་ཕྱོགས་ནས་ཕྱྭ་བཀུག་ཤོག  གཡང་བཀུག་ཤོག
                             
ཉི་མ་དབུས་ཀྱི་ཕྱོགས་ནས་ཕྱྭ་བཀུག་ཤོག  གཡང་བཀུག་ཤོག
   གཞས་ཆེན་གྱི་གྱེར་གཞས་གཉིས་པ།
                             
འཛམ་བུ་གླིང་གི་བདེ་བ།  དཔལ་གྱི་ཆོས་འཁོར་ལྷ་ས།
                             
ས་ལ་པད་མ་འདབ་བརྒྱད།  གནམ་ལ་ཆོས་རྫས་འཁོར་ལོ།
                             
བར་ལ་བཀྲ་ཤིས་རྟགས་བརྒྱད།  འོག་ལ་ཆོས་རྫས་ཀྱི་དར།
ཞེས་པའི་རྗེས་ལ།
                             
དཔྱིད་གསུམ་དཔྱིད་ཀྱི་དཔྱིད་ཟླ་ཤར་བ་འདྲ།
                             
དཔྱིད་ཡུར་རའི་ནང་ལ་ཆུ་སྣ་འཛོམས།
                             
ཆུ་སྣ་མི་གཅིག་བརྒྱ་དང་བརྒྱད་ཅུ་འཛོམས།
                             
ཡིན་དྭངས་བཟང་འོང་ག་གསེར་ལས་ལྷག
                             
དབྱར་གསུམ་དབྱར་གྱི་དབྱར་ཟླ་ཤར་བ་འདྲ།
                             
དབྱར་འོང་གའི་དཀྱིལ་དུ་མེ་ཏོག་འཁྲུངས།
                             
མེ་ཏོག་མི་གཅིག་བརྒྱ་དང་བརྒྱད་ཅུ་འཛོམས།
                             
ཡིན་གུར་གུམ་མེ་ཏོག་གསེར་བཟང་ལས་ལྷག
                             
སྟོན་གསུམ་སྟོན་གྱི་སྟོན་ཟླ་ཤར་བ་འདྲ།
                             
སྟོན་གཡུལ་ཁའི་ནང་དུ་འབྲུ་སྣ་འཛོམས།
                             
འབྲུ་སྣ་མི་གཅིག་བརྒྱ་དང་བརྒྱད་ཅུ་འཛོམས།
                             
ཡིན་དཀར་མོའི་བརྒྱ་སྣ་གསེར་བཟང་ལས་ལྷག
                             
དགུན་གསུམ་དགུན་གྱི་དགུན་ཟླ་ཤར་བ་འདྲ།
                             
དགུན་སྣ་མིན་སྣ་ཚོགས་མི་སྣ་འཛོམས།
                             
མི་སྣ་མི་གཅིག་བརྒྱ་དང་བརྒྱད་ཅུ་འཛོམས།
                             
ཡིན་གེ་སར་རྒྱལ་པོ་གསེར་བཟང་ལས་ལྷག
                             
ནོར་བུ་འདི་དག་བཀྲ་ཤིས་རྩ་བ་འདྲ།
                             
ཕུ་ནས་གཡག་རུ་འཛོམས་པའི་བཀྲ་ཤིས་ཤོག
                             
མདའ་ནས་འབྲུ་སྣ་འཛོམས་པའི་བཀྲ་ཤིས་ཤོག
  གཞས་ཆེན་གྱི་ཞབས་བྲོ་ཁག
                             
༼ ༡ ༽  འགོ་འཛུགས་ཞབས་བྲོ།༼ གཞས་མགོ ༽
                             
གཅིག་ལ་ཞུས་པའི་དི་རི།༼དི་རི་་་་་་རྐང་པ་བརྡབས་པའི་སྒྲ༽
                             
གཉིས་ལ་ཞུས་པའི་དི་རི།
                             
གསུམ་ལ་ཞུས་པའི་དི་རི།
                             
བཞི་ལ་ཞུས་པའི་དི་རི།
                             
ལྔ་ལ་ཞུས་པའི་དི་རི།
                             
དྲུག་ལ་ཞུས་པའི་དི་རི།
                             
བདུན་ལ་ཞུས་པའི་དི་རི།
                             
བརྒྱད་ལ་ཞུས་པའི་དི་རི།
                             
དགུ་ལ་ཞུས་པའི་དི་རི།
                             
ཞེས་དགུ་ཚིག་རེ་བརྒྱབ་རྗེས།
                             
རྐང་པའི་འོག་ལ་ཚེར་མ་ཡོག་རེད།
                             
ཚེར་མ་ཡར་ལ་ཟུག་གི་མ་རེད།
                             
ཡང་བསྐྱར་བགྲོད་པ་དི་རི།  དི་རི།
                             
གསུམ་འཇགས་ལད་མོ་དི་རི།
                             
ཐེམས་པོ་མཐོ་ལ་དི་རི། དི་རི།ཞེས་དང་།
                             
གཅིག་ལ་ཞུས་པའི་དི་རི།
                             
གཉིས་ལ་ཞུས་པའི་དི་རི།
                             
གསུམ་ལ་ཞུས་པའི་དི་རི།
                             
བཞི་ལ་ཞུས་པའི་དི་རི།
                             
ལྔ་ལ་ཞུས་པའི་དི་རི།
                             
དྲུག་ལ་ཞུས་པའི་དི་རི།
                             
བདུན་ལ་ཞུས་པའི་དི་རི།
                             
བརྒྱད་ལ་ཞུས་པའི་དི་རི།
                             
དགུ་ལ་ཞུས་པའི་དི་རི།
                             
སྐེད་པའི་བར་ལ་གྲི་མགོ་ཡོག་རེད།
                             
གྲི་མགོ་སྐེད་པར་ཟུག་གི་མ་རེད།
                              ཡང་བསྐྱར་བགྲོད་པ་དི་རི།  དི་རི།
                              གསུམ་འཇགས་ལད་མོ་དི་རི།
                              ཐེམས་པོ་མཐོ་ལ་དི་རི།  དི་རི།
                              མུ་མཐུད་ནས།
                              གཅིག་ལ་ཞུས་པའི་དི་རི།
                              གཉིས་ལ་ཞུས་པའི་དི་རི།
                              གསུམ་ལ་ཞུས་པའི་དི་རི།
                              བཞི་ལ་ཞུས་པའི་དི་རི།
                              ལྔ་ལ་ཞུས་པའི་དི་རི།
                              དྲུག་ལ་ཞུས་པའི་དི་རི།
                              བདུན་ལ་ཞུས་པའི་དི་རི།
                              བརྒྱད་ལ་ཞུས་པའི་དི་རི།
                              དགུ་ལ་ཞུས་པའི་དི་རི།
                              ལག་སྲང༼མཆན་ཁུང༽འོག་ལ་གྲུ་གུ་ཡོག་རེད།
                              གྲུ་གུ་ས་ལ་ཟགས་ཀྱི་མ་རེད།
                              ཡང་བསྐྱར་བགྲོད་པ་དི་རི།  དི་རི།
                              གསུམ་འཇགས་ལད་མོ་དི་རི།
                              ཐེམས་པོ་མཐོ་ལ་དི་རི།  དི་རི།
                              ཡང་བསྐྱར།
                              གཅིག་ལ་ཞུས་པའི་དི་རི།
                              གཉིས་ལ་ཞུས་པའི་དི་རི།
                              གསུམ་ལ་ཞུས་པའི་དི་རི།
                              བཞི་ལ་ཞུས་པའི་དི་རི།
                              ལྔ་ལ་ཞུས་པའི་དི་རི།
                              དྲུག་ལ་ཞུས་པའི་དི་རི།
                              བདུན་ལ་ཞུས་པའི་དི་རི།
                              བརྒྱད་ལ་ཞུས་པའི་དི་རི།
                              དགུ་ལ་ཞུས་པའི་དི་རི།
                              ལྕེ་ཡི་སྟེང་ལ་གཡུ་ཆུང་ཡོག་རེད།
                              གཡུ་ཆུང་ས་ལ་ཟགས་ཀྱི་མ་རེད།
                              ཡང་བསྐྱར་བགྲོད་པ་དི་རི།  དི་རི།
                              གསུམ་འཇགས་ལད་མོ་དི་རི།
                              ཐེམས་པོ་མཐོ་ལ་དི་རི།  དི་རི།
                              མུ་མཐུད་དུ།
                              གཅིག་ལ་ཞུས་པའི་དི་རི།
                              གཉིས་ལ་ཞུས་པའི་དི་རི།
                              གསུམ་ལ་ཞུས་པའི་དི་རི།
                              བཞི་ལ་ཞུས་པའི་དི་རི།
                              ལྔ་ལ་ཞུས་པའི་དི་རི།
                              དྲུག་ལ་ཞུས་པའི་དི་རི།
                              བདུན་ལ་ཞུས་པའི་དི་རི།
                              བརྒྱད་ལ་ཞུས་པའི་དི་རི།
                              དགུ་ལ་ཞུས་པའི་དི་རི།
                              མགོ་ཡི་སྟེང་ལ་གཡམ་པ་ཡོག་རེད།
                              གཡམ་པ་ས་ལ་ཟགས་ཀྱི་མ་རེད།
                              ཡང་བསྐྱར་བགྲོད་པ་དི་རི།  དི་རི།
                              གསུམ་འཇགས་ལད་མོ་དི་རི།

༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005