| ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། སྤྱི་ལོ་༡༤༤༧ ལོར་བསྐྲུན་འགོ་ཚུགས་པའི་བཀྲས་ལྷུན་དགོན་གྱི་དུས་ཐེངས་དང་པོའི་ཉམས་གསོའི་ལས་གྲྭའི་རྣམ་གྲངས་ཁག་གཅིག་ལས་མཇུག་སྒྲིལ་ཉེར་ཡོད་ཅིང་། དེ་ནི་བོད་བརྒྱུད་ནང་བསྟན་ཆོས་ལུགས་དགེ་ལུགས་པའི་དགོན་སྡེ་ཆེ་གྲས་དྲུག་གྲས་ཀྱི་གནའ་བོའི་དགོན་པ་ཞིག་ཡིན་པ་དང་ཀྲུང་གོ་གསར་པ་དབུ་བརྙེས་རྗེས་བྱས་པའི་གཞི་ཁྱོན་ཅུང་ཆེ་བའི་ཉམས་གསོའི་ནང་གི་ཆ་ཤས་ཤིག་ཡིན།
བཀྲས་ལྷུན་དགོན་པའི་དུས་ཐེངས་དང་པོའི་ཉམས་གསོའི་ལས་གྲྭར་མ་དངུལ་སྒོར་ཁྲི་༣༠༠༠ལྷག་ཙམ་བཏང་ཡོད་ཅིང་། མིག་སྔར་དེའི་ཚོགས་ཆེན་འདུ་ཁང་དང་བཀའ་འགྱུར་ལྷ་ཁང་གི་ཉམས་གསོའི་ལས་དོན་མཇུག་སྒྲིལ་ཉེར་ཡོད་པ་དང་སྤྱིའི་མ་འཇོག་སྒོར་དུང་ཕྱུར་༡ལས་བརྒལ་བའི་གཞི་ཁྱོན་དེ་བས་ཆེ་བའི་ཉམས་གསོའི་རྣམ་གྲངས་ནི་རྣམ་གྲངས་དེ་དག་ལས་མཇུག་སྒྲིལ་རྗེས་གཅིག་རྗེས་གཉིས་མཐུད་དུ་སྤེལ་རྒྱུ་རེད།
སྤྱིའི་མ་འཇོག་སྒོར་དུང་ཕྱུར་༣ལས་བརྒལ་བའི་ཕོ་བྲང་པོ་ཏ་ལ་དང་། ནོར་བུ་གླིང་ཁ། ས་སྐྱ་དགོན་བཅས་རིག་དངོས་ཆེན་པོ་གསུམ་གྱི་ཉམས་གསོ་ནས་སྤྱིའི་མ་འཇོག་སྒོར་དུང་ཕྱུར་༥.༧ཟིན་པའི་བོད་ཀྱི་གནའ་བོའི་རིག་དངོས་བཟོ་སྐྲུན་ཁག་༢༢ལ་ཉམས་གསོ་བྱེད་པའི་བར་བོད་ཀྱི་གནའ་བོའི་རིག་དངོས་བཟོ་སྐྲུན་ལ་ཀྲུང་གོ་གསར་པ་དབུ་བརྙེས་ཚུན་གྱི་གཞི་ཁྱོན་ཆེ་ཤོས་ཀྱི་གཅིག་སྡུད་ཉམས་གསོ་ཞིག་བྱས་ཡོད།
འདི་ལོའི་ཟླ་༥ཚེས་༡༣ཉིན་བོད་རྒྱ་མི་རིགས་གཉིས་ཀྱི་བཟོ་སྐྲུན་ཉམས་འགྱུར་ལྡན་པའི་བོད་ཀྱི་ཞ་ལུ་དགོན་པའི་ཉམས་གསོའི་ལས་གྲྭ་དངོས་སུ་འགོ་ཚུགས་པ་དང་མ་དངུལ་སྒོར་ཁྲི་༡༦༡༢བཏང་བའི་ཉམས་གསོའི་ལས་གྲྭ་དེ་ནི་༢༠༠༨ལོར་བོད་ཀྱིས་དངོས་སུ་སྤེལ་འགོ་ཚུགས་པའི“ལོ་ལྔ་ཚན་བཅུ་གཅིག་པའི”གཙོ་གནད་རིག་དངོས་སྲུང་སྐྱོང་ལས་གྲྭའི་ཁྲོད་ཀྱི་རྣམ་གྲངས་ཤིག་ཡིན། |
