ཀྲུང་གོ་བོད་ཀྱི་དྲ་བའི་འཕྲིན། ཟླ3པའི་ཚེས4ཉིན་མཚོ་སྔོན་ཞིང་ཆེན་ཐའེ་ཝན་ལས་དོན་གཞུང་སྒྲུབ་ཁང་ནས་བསྒྲགས་པའི་གནས་ཚུལ་ལྟར་ན། མཚོ་སྔོན་ཞིང་ཆེན་སྲིད་གཞུང་གིས་ཟླ3པའི་ཟླ་དཀྱིལ་དུ་ཐའེ་པེ་གྲོང་ཁྱེར་དུ“མཛེས་སྡུག་གི་མཚོ་སྔོན”ཐའེ་ཝན་དུ་བསྐྱོད་པའི་བྱ་འགུལ་སྤེལ་རྒྱུ་རེད།

ཐེངས་འདིར་སྤེལ་བའི“ལྟ་ན་སྡུག་པའི་མཚོ་སྔོན”ཐའེ་ཝན་དུ་བསྐྱོད་པའི་བྱ་འགུལ་གྱི་དམིགས་ཡུལ་ནི་ཐའེ་ཝན་གྱི་སྤུན་ཟླ་མི་རིགས་ལ་མཚོ་སྔོན་གྱི་ལོ་རྒྱུས་དང་མི་རིགས་རིག་གནས། ཁྱད་ལྡན་ཐོན་ཁུངས། ཕུལ་བྱུང་གནས་སྐོར་བཅས་འགྲེམ་སྟོན་བྱས་ཏེ། ཕྱོགས་ཡོངས་ནས་མཚོ་སྔོན་དྲིལ་སྒྲོག་དང་མཚོ་སྔོན་གྱི་ཕྱི་ཕྱོགས་སྒོ་དབྱེ་རྒྱ་བསྐྱེད་དེ་མཚོ་སྔོན་དང་ཐའེ་ཝན་བར་གྱི་དཔལ་འབྱོར་རིག་གནས་བརྗེ་རེས་དང་མཉམ་ལས་ལ་སྐུལ་འདེད་བྱེད་པ། མཚོ་སྔོན་དེ་ཐའེ་ཝན་ནས་མིང་གྲགས་དང་མཚན་སྙན་རྒྱས་ཚད་ཇེ་མཐོར་བཏང་ནས་སྔར་ལས་མང་བའི་ཐའེ་ཝན་གྱི་སྤུན་ཟླ་མི་རིགས་མཚོ་སྔོན་ལ་རྟོག་ཞིབ་དང་དངུལ་གཏོང་ཁེ་ལས་འཛུགས་པ། གནས་སྐོར་ལྗོངས་རྒྱུ་བྱེད་པར་ཚུར་འགུག་བྱེད་རྒྱུ་དེ་རེད། བྱ་འགུལ་སྐབས་སུ་མཛེས་སྡུག་གི་མཚོ་སྔོན་གྱི་དྲིལ་སྒྲོག་བརྙན་རིས་འགྲེམ་སྟོན་དང་། པར་རིས་འགྲེམ་སྟོན། མི་རིགས་གླུ་གར་དང་གྱོན་ཆས་འགྲེམ་སྟོན་སོགས་དཔལ་འབྱོར་དང་རིག་གནས། གནས་སྐོར་འོས་སྦྱོར་བྱ་འགུལ་སྤེལ་རྒྱུ་ཡིན་པ་དང་། ཐའེ་ཝན་གྱི་མཐོ་རིམ་མི་སྣ་དང་མིང་གྲགས་ཆེ་བའི་ཁེ་ལས་འགན་ཁུར་མི་གནས་བཅས་འབྲེལ་ཡོད་བྱ་འགུལ་གདན་ཞུ་ཞུས་ཡོད། །