| སྔར་ལས་ལྷག་པའི་སྒོ་ནས་ཚན་རིག་གི་འཕེལ་རྒྱས་ལྟ་བ་སློབ་སྦྱོང་ལག་ལེན་དང་། དཀའ་ངལ་ཆེ་བའི་མང་ཚོགས་ཀྱིས་ནད་ལ་ལྟ་དཀའ་བའི་དོན་དངོས་གནད་དོན་ཐག་གཅོད་བྱེད་ཆེད། མཚོ་ལྷོ་བོད་རིགས་རང་སྐྱོང་ཁུལ་བོད་སྨན་ཁང་གིས་ལུགས་རྙིང་དང་ལུགས་གསར་ལོ་སར་གྱི་སྔ་གཞུག་ཏུ་སྨན་བཅོས་རུ་ཁག་རྩ་འཛུགས་བྱས་ཏེ། གུང་ཧོ་རྫོང་གི་ཞང་གྲོང་བཅུ་གཅིག་ནས་དུས་ཡུན་ཉིན་དགུའི་རིང་གི་སྐོར་སྐྱོད་སྨན་བཅོས་བྱ་འགུལ་སྤེལ། ལག་རྩལ་མི་སྣ་བཅོ་བརྒྱད་ཀྱིས་གྲུབ་པའི་སྐོར་སྐྱོད་སྨན་བཅོས་རུ་ཁག་སྔ་གཞུག་ཏུ་གུང་ཧོ་རྫོང་གི་སྤྲེལ་ནག་དང་། རྟ་ནག་མ། ཅང་ཤེས་ཁུག ཐང་དཀར་མ། ཆོས་རྗེ། ཐེབ་རྒྱ། ཚ་རྔ་འགག ཨར་རྟི། ཆབ་ཆ་སོགས་ཞང་དང་གྲོང་བརྡལ་དང་དགོན་པ་སོགས་སུ་སོང་ནས། ས་དེའི་ལྔ་སྐྱོང་ཁྱིམ་ཚང་དང་། མ་མཐའི་འཚོ་བའི་འགན་སྲུང་ཁྱིམ་ཚང་། དཀའ་ཁག་ཆེ་བའི་ཁྱིམ་ཚང་། དབང་པོ་སྐྱོན་ཅན། བདག་མེད་ལོ་ལོན་ལ་སྐོར་སྐྱོད་སྨན་བཅོས་བྱས། སྨན་བཅོས་བྱེད་པའི་སྐབས་སུ། ཁོ་ཚོས་སྡོམ་པས་ནད་པ་སྟོང་དྲུག་དང་སུམ་བརྒྱ་གྱ་བཞི་ལྷག་ལ་སྨན་བཅོས་བྱས་པ་དང་། རིན་མི་དགོས་པར་སྨན་རྫས་སྣ་ཁ་ཉིས་བརྒྱ་དང་དྲུག་ཅུ་ལྷག་བྱིན་ལ། སྨན་རྫས་ཀྱི་རིན་གོང་སྒོར་མོ་ས་ཡ་གཉིས་ལྷག་ལ་སླེབས་པ་དང་། ས་དེའི་མང་ཚོགས་དང་སྤྱི་ཚོགས་ཀྱི་ལས་རིགས་སོ་སོའི་མི་སྣས་བསྟོད་བསྔགས་ཐོབ། |
