གནས་ཡུལ། མདུན་ངོས། གླུ་གཞས།
 
 
༄༅།། ཨ་མདོའི་དམངས་གླུ་གཅེས་བཏུས།
སྤེལ་དུས།2014-11-13   ཡོང་ཁུངས་།   རྩོམ་པ་པོ། རིན་ཆེན་གྱིས་བསྒྲིགས།

                              མཐོ་ལ་དགུང་སྔོན་གནམ་འདི་མཐོ།།
                             
མཐོ་ལ་དགུང་སྔོན་གནམ་འདི་མཐོ།།
                             
བྱིང་ལ་ཐང་དཀར་རྒོད་འདི་བྱིང༌།།
                             
མཐོ་བྱིང་འཛོམས་པའི་སྐུ་རེ་བསྟོད།།

                              བདེ་ལ་དཀར་ཡག་ཐང་འདི་བདེ།།
                             
མགྱོགས་ལ་ཁ་དཀར་རྐྱང་འདི་མགྱོགས།།
                             
བདེ་མགྱོགས་འཛོམས་པའི་སྐུ་རེ་བསྟོད།།

                              དཔའ་ལ་དམར་ཡག་སྟག་འདི་དཔའ།།
                             
ཕྱུག་ལ་ཙན་དན་ནགས་འདི་ཕྱུག།
                             
དཔའ་ཕྱུག་འཛོམས་པའི་སྐུ་རེ་བསྟོད།།

                              མི་རྒྱུད་དེད་དེ་ཡོང་ནི་ཡིན།།
                             
རྒྱ་རྫོང་ནགས་ཀྱི་བྱ་བརྒྱ་ཚོ།།
                             
སིལ་ཏོག་ལོ་མའི་བར་ནས་འཁོར།།
                             
ངས་སིལ་ཏོག་དེད་དེ་ཡོང་ནི་མིན།།
                             
བྱ་བརྒྱ་དེད་དེ་ཡོང་ནི་ཡིན།།

                              སྐྱེད་མོའི་ཚལ་གྱི་བུང་བ་ཚོ།།
                             
མེ་ཏོག་བཀྲ་བའི་བར་ནས་འཁོར།།
                             
ངས་མེ་ཏོག་དེད་དེ་ཡོང་བ་མིན།། 
                             
བུང་བ་དེད་དེ་ཡོང་བ་ཡིན།།

                              ཁྲོམ་པའི་གྲལ་གྱི་ན་ཟླ་ཚོ།།
                             
ཟས་ཆང་བཤམས་པའི་བར་ནས་འཁོར།།
                             
ངས་ཟས་ཆང་དེད་དེ་ཡོང་ནི་མིན།།
                             
མི་རྒྱུད་དེད་དེ་ཡོང་བ་ཡིན།།

                              སྙིང་སྟོབས་མེད་ན་དཀའ་མོ་རེད།།
                             
སྟག་དར་མ་མཚལ་གྱི་ཐིག་ལེ་ཅན།།
                             
གོས་གོང་བའི་ཁ་ལ་སྤྲོད་རྐྱང་རེད།།
                             
མིན་ཨ་ལ་ན་ཟླ་ཀུ་རེ་ཡིན།།
                             
དཔའ་སྙིང་སྟོབས་མེད་ན་དཀའ་མོ་རེད།།

                              ཕ་ཕྱུག་པོའི་བུ་མོ་འཛུམ་ཡག་མ།།
                             
རྒྱན་བཏགས་ནས་གནས་ལ་འགྲོ་རྐྱང་རེད།།
                             
མིན་ཨ་ལ་ན་ཟླ་ཀུ་རེ་ཡིན།།
                             
མ་ཁོག་ཤེས་མེད་ན་དཀའ་མོ་རེད།།

                              སྐད་སྙན་པའི་གླུ་བ་ལས་ཅན་པོ།།
                             
མགོ་ཝ་མོ་གོན་ནས་རྩེ་རྐྱང་རེད།།
                             
མིན་ཨ་ལ་གླུ་བ་ཀུ་རེ་ཡིན།།
                             
གླུ་མེད་ན་དེ་ཡང་དཀའ་མོ་རེད།།

                              མ་བུ་མོ་ཞིག་ལ་འཛོམ་རྒྱུ་ན།།
                             
བྱ་ངང་བ་སེར་པོའི་ཡག་བཞིན་འདི།།
                             
བན་སེར་མོ་ཞིག་ལ་འཛོམ་རྒྱུ་ན།།
                             
རྒྱབ་ཆོས་གོས་མི་དགོས་རང་གྲུབ་རེད།།

                              གླག་ཁྲ་མོ་འཕུར་བའི་བདེ་མྱུར་འདི།།
                             
སྟག་ཤ་ར་ཞིག་ལ་འཛོམ་རྒྱུ་ན།།
                             
སྐེད་གྲི་ཆུང་མི་དགོས་རང་གྲུབ་རེད།།

                              བྱ་རྨ་བྱའི་རྒྱབ་ཀྱི་ཐིག་ལེ་འདི།།
                             
མ་བུ་མོ་ཞིག་ལ་འཛོམ་རྒྱུ་ན།།
                             
རྒྱན་གཡུ་བྱུར་མི་དགོས་རང་གྲུབ་རེད།།
                             
སོས་དལ་དུས་ན་ཟླ་འགྲིག་མཐུན་གྱིས།།

                              བུ་བུ་མོས་ཉོན་དང་གླུ་རེ་ལེན།།
                             
ཡུལ་ཕ་མ་གཉིས་ལ་བརྩི་བཀུར་གྱིས།།
                             
ཡུལ་ཕ་མ་དགུང་གི་ཉི་ཟླ་འདྲ།།
                             
ཕྱིར་འཁོར་རེ་འཆར་ཁ་དཀའ་མོ་རེད།།

                              སྤུན་ན་ཟླས་ཉོན་དང་གླུ་རེ་ལེན།།
                             
སོས་དལ་དུས་ན་ཟླ་འགྲིག་མཐུན་གྱིས།།
                             
སྤུན་ན་ཟླ་ལ་ཁའི་དགོ་བ་འདྲ།།
                             
ཕྱིར་འཁོར་རེ་འདུ་ཁ་དཀའ་མོ་རེད།།

                              གླུ་དཀའ་རབ་བཤད་ན་དེ་འདྲ་རེད།།
                             
རྗེ་ལྷ་སྐུ་བཞེངས་པའི་ལྷ་བཟོ་ཚོ།།
                             
གསེར་གྱོང་ལ་མ་གཏོང་ཏན་ཏན་གྱིས།།
                             
གསེར་ས་རྡོའི་བར་ནས་རྙེད་ནོ་རེད།།
                             
ཆུ་བྱེ་མའི་ནང་ནས་བཙགས་ནི་རེད།།
                             
གསེར་དཀའ་རབ་བཤད་ན་དེ་འདྲ་རེད།།

                              ཁྲོམ་ཆེན་པོའི་གྲལ་གྱི་ན་ཟླ་ཚོ།།
                             
ཆང་གྱོང་ལ་མ་གཏོང་ཏན་ཏན་གྱིས།།
                             
ནས་རི་ཞོལ་ཁུག་ལ་བཏབ་ནོ་རེད།།
                             
རྫ་མའི་རྔུལ་ཆུ་བསོགས་ནི་རེད།།
                             
ཆང་དཀའ་རབ་བཤད་ན་དེ་འདྲ་རེད།།

                              ཕྱི་ཁྲོམ་པའི་གྲལ་གྱི་ཨ་ཁུ་ཚོ།།
                             
འུར་མ་རྒྱག་གླུ་ལ་ཉན་ཡག་གྱིས།།
                             
གླུ་རིག་པའི་སྟེང་ནས་བསྒྲིགས་ནོ་རེད།།
                             
སྐད་མིད་ཐག་ནང་ནས་བཀུག་ནི་རེད།།
                             
གླུ་དཀའ་རབ་བཤད་ན་དེ་འདྲ་རེད།།

                              ཕྱུག་པོའི་རྒྱུ་ལ་མ་སྨོན་དང༌།། 
                             
ཕྱུག་པོའི་རྒྱུ་ལ་མ་སྨོན་དང༌།།
                             
ཕྱུག་རྒྱུ་ནོར་རྩྭ་མགོའི་ཟིལ་བ་འདྲ།།
                             
རྟག་མི་རྟག་གཉི་ག་ཡོད་ནི་རེད།།

                              མེད་པོའི་བུ་ལ་མ་འཕྱ་དང༌།།
                             
མེད་ཟེར་བ་འཛམ་གླིང་ཉི་མ་འདྲ།།
                             
ཤར་མི་ཤར་གཉི་ག་ཡོད་ནི་རེད།།

                              རྒྱུ་འབྲས་མེད་པ།
                             
བླ་མ་དཔོན་པོ་གྲྭ་བ་གསུམ།།
                             
ཆོས་ཀུན་རིག་གསུང་ནོ་བླ་མ་རེད།།
                             
ཤ་ཚོན་པོ་ཟ་ནོ་དཔོན་པོ་རེད།།
                             
ཁུར་ལྕི་མོ་འཁུར་ནོ་གྲྭ་བ་རེད།།
                             
ལས་རྒྱུ་འབྲས་མེད་ཚུལ་དེ་འདྲ་རེད།།

                              ཨ་ནེ་མནའ་མ་བུ་མོ་གསུམ།།
                             
ཇ་ཁོལ་མགོ་འཐུང་ནོ་ཨ་ནེ་རེད།།
                             
གཡུ་བྱུ་རུ་འདོགས་ནོ་བུ་མོ་རེད།།
                             
ཁྱིམ་ལས་ཀ་ལས་ནོ་མནའ་མ་རེད།།
                             
ལས་རྒྱུ་འབྲས་མེད་ཚུལ་དེ་འདྲ་རེད།།

                              མ་བུ་མོ་སློང་ན་ངོ་ལ་ལྟོས།།
                             
རྟ་འདོ་བ་ཉོ་ན་དྲུག་ལ་ལྟོས།།
                             
ཤ་དང་ཤེད་མོ་དྲུག་ན་ཡོད།།
                             
འགྲོས་དང་གོམ་པ་ཞོར་ན་ཡོད།།

༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005