བླ་མ་དམ་པ་རྣམས་ལ་མགོས་ཕྱག་འཚལ།།ཡོན་ཏན་མཆོག་མངའ་གཞན་ལ་ཕན་པའི་ཐུགས་རྗེ་ཅན།།ཏིང་འཛིན་མཆོག་བརྙེས་ཉིད་ཀྱི་དོན་ཡང་མཐར་ཕྱིན་པ། །དམ་པ་མཆོག་ཆོས་དོན་གཉིས་གྲུབ་པས་མངོན་ཤེས་དང་། །རྫུ་འཕྲུལ་མཆོག་འབར་སྦས་པའི་བརྟུལ་ཞུགས་ཅན་ལ་འདུད།།རབ་མཆོག་གྱུར་པ་མཐུ་སྟོབས་དབང་ཕྱུག་མན་ངག་གིས།།གྲུབ་པའི་དབང་ཕྱུག་དམ་པར་གྱུར་པའི་བླ་མ་མཆོག །ཟབ་ལམ་ཆོས་ཀྱིས་སྐལ་ལྡན་མཆོག་ཏུ་ཚིམ་མཛད་པ། །འབར་བའི་མཚན་ཅན་ཡིད་ཀྱི་མུན་སེལ་ཁྱེད་ལ་འདུད།།སྤངས་རྟོགས་མཐར་ཕྱིན་མཛད་པ་མཐའ་ཡས་ལོངས་སྤྱོད་རྫོགས།།རྡོ་རྗེའི་ཚིག་རྣམས་རྒྱ་ཆེར་འགྲེལ་མཛད་སྡུད་པ་པོར།།ངེས་པར་མཆིས་ཀྱང་མི་ཡི་གཟུགས་འཛིན་བླ་མ་མཆོག །སྙན་བརྒྱུད་བཞི་སྟོན་ཡིད་ཀྱི་དཔལ་གྱུར་ཁྱོད་ལ་བསྟོད། །རང་གིས་སྤྱད་པའི་ལས་ལས་གྱུར་པ་གཡོ་བ་ཡི།།ནད་ཀྱིས་བཏབ་པ་ཁྱོད་ཀྱི་ཐུགས་རྗེས་ཟིལ་མནན་ནས།།རྨོངས་པར་གྱུར་པ་ཡེ་ཤེས་ཆེན་པོའི་རོས་གང་བ། །རྣལ་འབྱོར་དབང་ཕྱུག་ཁྱེད་ཀྱི་མཐུ་ཡིས་རྗེས་སུ་སྐྱོངས། །དག་པ་རང་བཞིན་དག་པའི་མཐུ་ཡིས་བླ་མ་ལ།།རྣམ་གྲོལ་འཐོབ་ཕྱིར་རྣམ་པར་མི་རྟོག་པ་ཉིད་དུ།།དད་པ་ཆེན་པོས་དད་པའི་ཤུགས་ཀྱིས་གསོལ་འདེབས་ན། ཐུགས་རྗེ་ཆོན་པོས་ཐུགས་རྗེའི་ལྕགས་ཀྱུས་གཟུང་དུ་གསོལ། །རྗེ་བཅུན་བླ་མ་དམ་པ་ལ་གསོལ་བ་འདེབས་པའི་ཚིག། ས་མཱ་པྟ་མི་ཐི། །རྗེ་དགོན་པ་བས་དོན་གྱི་བྱིན་རླབས་སྩལ་བའི་ཚེ།།བླ་མ་ས་ཆེན་གྱིས་བསྟོད་པའོ།།