གནས་ཡུལ། མདུན་ངོས། དེང་རབས་ཀྱི་རྩོམ་ཡིག
 
 
༄༅།། གངས་ཅན་བྱུང་འཕེལ་གྱི་སྲད་བུར་བརྒྱུས་པའི་སྙན་རྩོམ་མུ་ཏིག་སུམ་བརྒྱ་བ།༼༡༽
སྤེལ་དུས།2015-02-06   ཡོང་ཁུངས་།བོད་ལྗོངས་རིག་གནས་དྲ་བ།   རྩོམ་པ་པོ། ལྡོང་ཡོན་ཏན་རྒྱ་མཚོ།

ཁུགས་པ་དང་བོ། སྟོད་ལྷ་རབས་ཀྱི་སྐབས།

                                    
                                    
གཡའ་དག་མཁྱེན་རབ་མེ་ལོང་གཙང་མའི་ངོར། །
                                    
བདེན་གཉིས་ཤེས་བྱའི་སྣང་བརྙན་གསལ་ལེར་བཀྲ། །
                                    
རིག་བྱེད་ལྷ་མོ་འདར་ལྡན་ལང་ཚོ་དར། །
                                    
བློ་གྲོས་གཏེར་འཆང་སྨྲ་བའི་དབང་ཕྱུག་མཆོད། །

                                    
                                    
སྒྲིབ་བྲལ་ཆོས་དབྱིངས་སྟོང་སངས་དག་པའི་མཁར། །
                                    
མཁྱེན་བརྩེ་ཉི་ཟླ་གཞོན་ནུའི་རྩེད་དགའ་རྒོད། །
                                    
ཐུབ་རྣམས་བརྟན་པ་འཕྲོག་མཁས་སྒྱུ་འཕྲུལ་མ། །
                                    
བདག་མགྲིན་ལོངས་སྤྱོད་འཁོར་ལོའི་འོ་མཚོར་རྩེན། །

                                    
                                    
ཟབ་རྒྱས་གཙུག་ལག་ལི་ཤིའི་མེ་ཏོག་འབུམ། །
                                    
མཁྱེན་ཀློང་དགའ་ཚལ་སྣུམ་པོར་སྨིན་དྲགས་པས། །
                                    
བློ་གསལ་བུང་བ་འགུགས་པའི་ལྕགས་ཀྱུ་ཅན། །
                                    
ཐེག་མཆོག་དགེ་བའི་བཤེས་རྣམས་གཏན་གྱི་སྐྱབས། །

                                    
                                    
མ་བྲིས་རི་མོར་བབས་པའི་སཱ་ལའི་ལྗོངས། །
                                    
ལུགས་གཉིས་མུ་ཁྱུད་ར་བས་བརྟན་པོར་བསྐོར། །
                                    
སྟོབས་དཔུང་རབ་འབར་བཙན་སྐར་ཞེ་གཉིས་སོགས། །
                                    
ས་སྐྱོང་ཚངས་པའི་ཚོགས་རྣམས་མཁྱེན་རྒྱ་ཡངས། །

                                    
                                    
མགོན་པོའི་ཕུག་པ་བརྡོལ་བའི་རྟེན་འབྱུང་ལས། །
                                    
དགའ་སྐྱོ་ཆགས་སྡང་སྒྱུ་མའི་བྲོ་ར་འཁྲུངས། །
                                    
མ་ངེས་རྒྱལ་ཕམ་སྟོང་གི་འཁྱུག་འགྲོས་ལ། །
                                    
བྱང་འཕགས་བརྩེ་བ་ལྷུང་བའི་སྤྱན་ཆབ་ཉིལ། །

                                    
                                    
འཇིག་རྟེན་དབང་ཕྱུག་ཐུགས་བསྐྱེད་ལྷོད་མིན་ཞིང་། །
                                    
ཁྲོ་གཉེར་ཅན་མས་བརྩེ་འཛུམ་མ་སྤངས་མོད། །
                                    
བཟློག་མེད་ལས་ཀྱིས་དེད་པའི་གདོང་དམར་བ། །
                                    
ཟོ་ཆུན་འཁོར་ལོའི་གུད་ན་ཉམ་རེ་ང་། །

                                    
                                    
སུས་ཀྱང་མ་བྱས་སུ་ལའང་དབང་ཆོག་པ། །
                                    
རང་བྱུང་རི་ཆུ་ནེའུ་གསིང་སྣུམ་པོའི་བཅུད། །
                                    
ནགས་མའི་གཡུ་ལོ་གསོལ་བའི་སྤྲེལ་སྲིན་པས། །
                                    
གངས་རིའི་ཟོམ་དུ་འབབ་པའི་རྨུ་སྐས་རྙེད། །

                                    
                                    
ལས་སྨོན་བསོད་ནམས་ག་འུ་ཁ་སྦྱོར་ལས། །
                                    
ཚེ་གཅིག་ལུས་རྟེན་གངས་རིའི་གཤོང་དུ་འཕངས། །
                                    
མ་བཅོས་བརྩེ་བ་ཟུག་པའི་འཐབ་ར་འདིར། །
                                    
མ་ནོན་ཆགས་སྡང་འཕྱུར་བ་མི་ཡི་གཤིས། །

                                    
                                    
ཚོགས་དྲུག་སྣང་བ་སྒྱུ་མའི་འཕྲུལ་འདེགས་ཀྱིས། །
                                    
གངས་ལྗོངས་དར་རྒུད་མཚན་མ་འབུམ་བསྡུས་པ། །
                                    
སང་ཞོགས་ཕྱི་མའི་ལམ་བྲོ་མི་ཉན་པས། །
                                    
རིཊ་མཐུན་བློ་གསལ་དགྱེས་པའི་གཟིཊ་མོར་འགྲེམ། །

                                    ༡༠
                                    
མེ་ཤུགས་འཕུར་མདའི་རྩལ་གྱིས་མི་ཟིན་པའི། །
                                    
རྐང་གཉིས་མི་ཡི་རྒྱལ་ཁམས་དཔལ་བེའུའི་རིས། །
                                    
ཐོས་སྒྲོག་དཔའ་བོའི་ཐུགས་ཀྱིས་གཅུན་མིན་ན། །
                                    
ཕྲ་ཞིབ་བརྗོད་འདོད་སོ་སྐྱེས་སྙིང་ཁམས་ཆེ། །

                                    ༡༡
                                    
རྣམ་དཔྱོད་བདེ་འཐུང་རྩེན་པའི་སྟངས་སྟབས་ལ། །
                                    
མཚོ་ལྡན་བྱིན་རླབས་ཆར་གྱིས་རམ་བཏེགས་པས། །
                                    
གཟུར་གནས་དྲན་འཛིན་བརྐུ་བའི་ངག་རིག་འཇའ། །
                                    
ལི་ཁྲིའི་ཚོན་མདངས་འཁྱིལ་བའི་ཀློང་ནས་ཤར། །

                                    ༡༢
                                    
འདི་ལྟར་ཐོས་སོ་གཙུག་ལག་རིན་ཆེན་དང་། །
                                    
ཤེས་བྱ་ཀུན་གཟིགས་བཤེས་མཆོག་ཞལ་བུམ་ལས། །
                                    
སྤྱི་མཐུན་ལས་བསོད་འབྱུང་བཞིའི་དཀྱིལ་འཁོར་དུ། །
                                    
ལྷོ་གླིང་འཛམ་བུ་ཆུ་གསེར་ཁད་ཀྱིས་ཆགས། །

                                    ༡༣
                                    
གནམ་སྔོན་ཞུན་མའི་ཐིག་ལེ་ཆུ་བོའི་གཏེར། །
                                    
ཤར་ལྷོའི་གཤོང་བུར་བབས་པའི་རྗེས་སྟེགས་སུ། །
                                    
གླིང་བདུན་རྒྱ་ཕིབས་མཐོན་པོའི་རླུང་རྟ་ཅན། །
                                    
ཐོག་མར་འཁྲུངས་ལ་སྒང་བ་བོད་དུ་གྲགས། །

                                    ༡༤
                                    
སྟོད་ན་གཡའ་བྲག་གངས་རིའི་བསྟར་ཕྲེང་བརྗིད། །
                                    
བར་ན་ནེའུ་གསིང་སྔོན་མོ་ཡངས་ཤིང་ནེམ། །
                                    
སྨད་ན་རྩི་ཤིང་ནགས་མའི་གཡུ་ལོ་འཛིངས། །
                                    
ཚངས་ཆེན་བློ་ལས་མ་འཁྲུངས་ཕྱི་སྣོད་མཛེས། །

                                    ༡༥
                                    
ཁ་འབབ་རྣམ་བཞིའི་འཁྱུག་འགྲོས་ལྷོ་ལ་འཐེན། །
                                    
བརྒྱད་ལྡན་རྨ་འབྲུའི་དབྱངས་སྙན་ཤར་དུ་ངོམ། །
                                    
མཚོ་དང་མཚེའུ་ཁྲི་མ་འབུམ་གྱི་གཟིས། །
                                    
ལྷ་ལམ་སྒེག་མོར་ལན་བརྒྱར་སྐྱེངས་པ་སྟེར། །

                                    ༡༦
                                    
གསེར་དངུལ་ཟངས་ལྕཊ་གཏེར་སྣ་འབུམ་གྱིས་བརྗིད། །
                                    
བཞི་བརྒྱའི་ནད་དཔུང་གཞིལ་བའི་སྨན་སྣ་འཛོམས། །
                                    
བསུང་ཞིམ་དཀར་དམར་མེ་ཏོག་ཐགས་སུ་བཀྲ། །
                                    
ཏིང་འཛིན་པིར་གྱིས་བཞེངས་སམ་རང་བྱུང་ཉིད། །

                                    ༡༧
                                    
དབང་སྔོན་མདངས་ཆཊ་འཆི་མེད་ལམ་ཡངས་མར། །
                                    
ཆུ་འཛིན་ལྷོད་ལྡེམ་ས་སྲུང་གཞོན་ནུས་འཁྱུད། །
                                    
སར་བ་སར་བའི་མཁའ་དབུགས་སྨན་གྱི་རྩི། །
                                    
སྐྱེ་དགུའི་ཚེ་སྲོག་གསོ་བའི་དཔྱིད་དུ་འཇོ། །

                                    ༡༨
                                    
གནམ་གྱི་ཀ་བར་བཞེངས་པའི་དཀན་གཟར་རིར། །
                                    
སྣང་བྱེད་ཉི་ཟླའི་རྣ་ཆའི་འཕྱང་འཕྲུལ་ངོམ། །
                                    
མི་སེམས་བསླུ་བའི་སྨིག་རྒྱུའི་གྲོང་ཁྱེར་ལས། །
                                    
སྐབས་གསུམ་མཛེས་སྡུག་འཕྲོག་པའི་འཇིག་རྟེན་མཐོང་། །

                                    ༡༩
                                    
ཟམ་ཟིམ་སྦྲང་ཆར་སིལ་མའི་རྩེ་དགའ་དང་། །
                                    
ལྷན་ཅིག་གཡུ་འབྲུག་བཞད་པའི་དབྱངས་སྙན་ཐོས། །
                                    
སོ་ནམ་དུས་སྟོན་དར་བའི་ངོ་མཚར་དང་། །
                                    
ལྷན་ཅིག་འབྲས་ལེགས་སྙེ་མའི་གར་སྟབས་འཁྱུག །

                                    ༢༠
                                    
འདབ་དྲུག་ཁ་བའི་ནེམ་ལོས་ས་ཆེན་འཛིན། །
                                    
འཐོར་རླུང་དྲག་པོ་གཤེད་མའི་ཟོལ་གྱིས་རྒྱུ། །
                                    
སླར་ཡང་སྣོད་བཅུད་གཉིད་ལས་སློང་བ་སོགས། །
                                    
དུས་བཞིའི་འགྱུར་བ་མི་རྟག་སློབ་དཔོན་ཉིད། །

                                    ༢༡
                                    
གྲ་ཡག་སྤུ་རིས་མ་འཛིངས་གཡས་སུ་འཁྱིལ། །
                                    
གཏུམ་དྲག་གད་རྒྱངས་གཅིག་གིས་རི་བོ་ཉིལ། །
                                    
མཆེ་བའི་རྣོ་རྒྱུན་མཚལ་གྱི་ཐིག་ལེ་ཅན། །
                                    
འཇིགས་རུང་སྟག་གཟིག་དོམ་དྲེད་བག་མེད་འཕྱོ། །

                                    ༢༢
                                    
དྭངས་གཙང་ཆུ་རྫིང་ཚང་ཚིང་ནགས་ཀློང་ན། །
                                    
ལྷོད་ལྡེམ་ངང་བའི་འགྲོས་འཆང་གཉིས་འཐུང་ཁྱུ། །
                                    
ཕྲེང་བར་བསྟར་བའི་རེ་ཁཱ་གསར་བའི་མདངས། །
                                    
འདྲེན་བྱེད་དམ་ལ་འདོགས་པའི་ལྕགས་ཀྱུར་བརྫུས། །

                                    ༢༣
                                    
སྤྲ་སྤྲེལ་འཕར་སྤྱང་གླ་དགོ་ཤ་བ་སོགས། །
                                    
གཅན་གཟན་རི་སྐྱེས་རྫོང་དུ་གྲུབ་མོད་ཀྱང་། །
                                    སྡེར་ཆགས་གདོང་ལྔའི་དབང་བོའི་འཇིགས་ཟིལ་གྱིས། །
                                    
ལྗོངས་འདི་གངས་སེང་དཀར་མོའི་ཕ་སར་བསྒྱུར། །

                                    ༢༤
                                    
ཐང་དཀར་རྒོད་པོའི་གཤོག་འགྱུར་མཐོངས་ན་ངོམ།
                                    
ཁྲུང་ཁྲུང་བསྟར་ཕྲེང་བླ་བྲེའི་མཆོད་པར་འཐེན། །
                                    
དཔྱིད་ཀྱི་ཕོ་ཉས་མགྲིན་པའི་རྫ་རྔ་འཁྲོལ། །
                                    
སྤུ་སྡུག་འདབ་ཆགས་བྱེ་བས་ས་འདི་བརྒྱན། །

                                    ༢༥
                                    
དཀར་སེར་ངང་ངུར་མགྲིན་པ་འཁྱོག་འཁྱོག་གིས། །
                                    
ཝུ་དཀར་མེ་ཏོག་འཐོར་བཞིན་འཐོར་བཞིན་རྩེད། །
                                    
རྔ་གསང་སྒྲ་བརྒྱས་བཟི་བའི་མདོངས་མཐའི་ཚོགས། །
                                    
ཚོན་ལྔ་བསྡེབས་པའི་སྒྲོ་གུར་གསར་བར་བྲེལ། །

                                    ༢༦
                                    
རྨུག་བཞིའི་རྩལ་ཤུགས་རྫོགས་པ་འདོ་རིག་རྟའི། །
                                    
འཚེར་སྐད་ཕྲ་མོ་རི་ཐང་ཀླུང་ལ་འཁོར། །
                                    
བསེར་མ་རླུང་གི་རྒྱུ་ལམ་གཅོད་བྱེད་པའི། །
                                    
ཁྱུང་ཆེན་གཤོག་པ་སྲིད་པ་རྒན་པོས་བསྩལ། །

                                    ༢༧
                                    
འབྲོང་རྒོད་དར་མ་མཐོན་པོའི་རྫ་ལ་གཤར། །
                                    
གཡག་རོག་ཞོལ་ཆེན་མུ་མེད་སྤང་ལ་བཀྲམ། །
                                    
འབྲུ་དང་མཛོ་མོའི་ངུར་དབྱངས་བྲག་ཅར་འཁོར། །
                                    
བེའུ་ཆུང་སྐྱིད་པའི་མཆོང་ལྡིང་ཨ་མར་ངོམ། །

                                    ༢༨
                                    
དགུ་ཚིགས་ཞགས་པས་མ་ཟིན་སྐར་ཚོགས་རྡུལ། །
                                    
མཐོ་སྒང་རྒྱན་དུ་ཆགས་པ་གཡང་དཀར་ལུག  
                                    
མཁའ་མཐའི་སྤྲིན་པར་འདྲེས་པའི་ཟློས་གར་ལ། །
                                    
གངས་ལྷ་མེ་ཏོག་དབུ་ལྕོག་ལྡེམ་མེར་གཡེང་། །

                                    ༢༩
                                    
དགེ་ལེགས་རང་བྱུང་ཕུག་པའི་གཞལ་ཡས་སུ། །
                                    
ཤིན་སྦྱངས་ཏིང་འཛིན་བརྟན་པོ་ངང་གིས་འཛུམ། །
                                    
ཧ་རིའི་ངད་པ་ཁོལ་བའི་ནགས་ཀྱི་ལྗོངས། །
                                    
བསམ་བཞིན་དྲང་སྲོང་བསྟི་གནས་དམ་པར་འཕོས། །

                                    ༣༠
                                    
མེ་ཏོག་ཟིལ་བ་འཐུང་བའི་སྒྲེགས་ངད་ཀྱིས། །
                                    
རི་སྐྱེས་དྲི་འཛིན་བསུ་བའི་དངོས་གྲུབ་ཅན། །
                                    
རྐང་དྲུག་བུང་བ་བྱེ་ལེབ་སྒེག་མོའི་ཁྱུ། །
                                    
སྲིད་ཞིའི་མཛེས་སྡུག་སྤུངས་པའི་ཁུར་གྱིས་ངལ། །

                                    ༣༡
                                    
སྔོ་བསངས་མེ་ལོང་རྒྱུ་སྐར་ཚོམ་བུས་སྤུད། །
                                    
ཆུ་ཁུར་སྟོད་གཡོག་གུར་ཀུམ་ཚོས་ཀྱིས་བྱུག །
                                    
སྣོད་བཅུད་མཛའ་མཐུན་སྲིད་པའི་གཏམ་རྒྱུད་ལ། །
                                    
བསྐལ་བ་ཡ་ཐོག་རིང་མོའི་ལོ་ཟླ་བརྩེགས། །

                                    ༣༢
                                    
མི་ཤིགས་རྡོ་རྗེ་གདན་པའི་བྱང་གི་ཆར། །
                                    
རི་མཐོ་ས་གཙང་བསིལ་མཛེས་མཁའ་དབུགས་དྭངས། །
                                    
འཇིག་རྟེན་རྩེ་མོ་ངོ་མཚར་དག་པའི་ཞིང་། །
                                    
གངས་ཅན་ཟད་མེད་བསོད་ནམས་དཔལ་དུ་ཆགས། །

                                    ༣༣
                                    
སྟེང་མ་འོད་གསལ་ལྷ་ལས་གློག་བཞིན་ཆད། །
                                    
མང་བཀུར་རྒྱལ་རབས་སྲིད་པའི་མཐའ་ལ་བསྐྱངས། །
                                    
ཁྲི་འབུམ་གྲངས་ཀྱིས་བཅད་པའི་ལྕམ་སྲིང་སོགས། །
                                    
འཕགས་ཡུལ་གཏམ་བརྗོད་རིང་མོ་ཟུར་དུ་འཇོག །

                                    ༣༤
                                    
ལྟེམ་མེར་འཁྱིལ་བའི་ཆུ་གཏེར་ལུད་པའི་ཤུལ། །
                                    
རྩི་ཤིང་ནགས་ཚལ་ལོ་ཏོག་ཕྱུར་བུར་དཀྲིགས། །
                                    
གཅན་གཟན་རི་སྐྱེས་འཆམ་མཐུན་ལོ་ཟླའི་གྲངས། །
                                    
དྲང་སྲོང་སྐར་མའི་རྒྱལ་བོ་ཡིན་ཡང་ངལ། །

                                    ༣༥
                                    
ནམ་ཞིག་ལྷོ་ཁ་སྣེ་གདོང་བྲག་རིའི་སྤོར། །
                                    
སྤྲེལ་སྲིན་མཛའ་བ་འཁྱུད་པའི་བདེ་ཆེན་ལས། །
                                    
ལས་བསོད་མི་གཅིག་སྤྲེལ་ཕྲུག་ཕར་ཕྱིན་གྲངས། །
                                    
ལྟད་མོར་བྱོན་པས་བོད་མིའི་བྱུང་བ་བརྡོལ། །

                                    ༣༦
                                    
ལ་ལ་འཆར་སྒོ་མྱུར་ཞིང་སྙིང་རྗེས་ཕྱུག །
                                    
ཁ་ཅིག་སྡིག་ལ་རྔམ་ཞིང་གཤིས་རྒྱུད་གྱོང་། །
                                    
རང་རང་ལས་ཀྱི་བསྐོས་ཐང་མི་འདྲ་ཞིང་། །
                                    
འཁོར་བའི་ཡ་མཐའ་བྲལ་བའི་བདེན་པ་བརྡར། །

                                    ༣༧
                                    
ལྡེམ་ལྕུག་འཁྲི་ཤིང་གསར་བའི་རྩེ་མོར་འཁྱུད། །
                                    
འཕུར་མ་ལྡིང་གིས་དམའ་མོའི་གཤོང་ལ་བབས། །
                                    
ཟིན་མེད་རྨི་ལམ་རིང་མོའི་ཁུགས་སོ་ནས། །
                                    
རྩེད་ཐང་གོར་མོར་མག་མོག་རྐང་རྗེས་དཔར། །

                                    ༣༨
                                    
འབྲུ་དྲུག་སྔོན་མོ་གྲོ་སྲན་བྲ་བོ་སོགས། །
                                    
མ་རྨོས་ལོ་ཏོག་སྙེ་ཞགས་དཔལ་ལ་སྤྱོད། །
                                    
སེམས་གཤིས་འགྱུར་ཞིང་སྟོབས་རྒྱས་མི་སྐད་ཐོན། །
                                    
ཟོ་དང་ཞིང་གི་དབུ་ཁྱུད་དེ་ནས་བྲིས། །

                                    ༣༩
                                    
སྔ་ཚིགས་རིང་མོ་དམིགས་མེད་དབྱིངས་སུ་ཐིམ། །
                                    
འདབ་ལོ་ལྗང་གུའི་སྨད་གོས་ཆུ་ཡིས་བརླན། །
                                    
གད་སྐྱིབས་བྲག་སྐྱིབས་མང་བོའི་དྲོད་ཁོལ་བཙལ། །
                                    
གཟའ་སྐར་འབྱུང་བཞིའི་གསང་བར་ཧད་དེ་ལུས། །

                                    ༤༠
                                    
གཅན་གཟན་གཏུམ་པོ་གཡུང་མོའི་ཕྱུགས་སུ་བཀོལ། །
                                    
སྤྱིལ་བུ་ཆུང་ཆུང་དྲོལ་ཁོལ་མེ་ཡིས་གསོས། །
                                    
ང་ཁྱོད་རིས་སུ་གཅོད་པའི་རྣམ་རིག་དེས། །
                                    
ཡར་ལུང་སོག་ཁར་མི་ཡི་གཏམ་རྒྱུད་བསྐྲུན། །

                                    ༤༡
                                    
སྒ་འབྲུ་སྦྲ་ལྡོང་ཏི་སེའི་མངལ་གུར་ལས། །
                                    
མི་འུ་གདུང་དྲུག་ཆུ་ཕྲན་ཕྱོགས་སུ་གྱེས། །
                                    
ལྷོ་རོང་སྐྱ་སེང་བུ་ལྔས་གཡུལ་སྤྲད་པའི། །
                                    
རུ་པ་ཏིའི་ཚོགས་བོད་མིའི་གསོས་སུ་ཐོན། །

                                    ༤༢
                                    
གཉུག་མའི་མི་འུ་གདུང་དྲུག་དཀྱིལ་འཁོར་དུ། །
                                    
དཀར་ནག་རྒྱ་སོག་འཕེལ་བ་ཡོད་སྲིད་མོད། །
                                    
སྤྲེའུའི་སྔ་མ་ཆད་པའི་གདོང་དམར་བོད། །
                                    
ཤར་ནུབ་ཚན་རིག་མཁས་དགུའི་ཞལ་ནའང་འཚེར། །

                                    ༤༣
                                    
བོད་ཅེས་བྱ་བའི་བརྡ་ཆད་མཚར་མཚར་བོ། །
                                    
ཕོན་བོན་བྷོ་ཊ་འོད་དང་བྲོས་སོགས་ཀྱི། །
                                    
སྒྲ་ཟུར་ཆག་སྐད་མང་དུ་སྨྲ་བྱེད་མོད། །
                                    
དོམ་དམ་རང་ཞལ་མཇལ་ན་འདོད་རྒྱལ་ཙམ། །

                                    ༤༤
                                    
འདབ་དྲུག་ཁ་བའི་མེ་ཏོག་བཞད་པའི་ཡུལ། །
                                    
གངས་དཀར་རི་ཚོམ་བསྟར་ལ་སྒྲིག་པའི་ལྗོངས། །
                                    
ཉི་མའི་གྲོང་དང་གྲང་རེག་བསིལ་བ་ལྡན། །
                                    
ཕྱི་སྣོད་ཁྱད་ཆོས་མིང་བརྡ་འགྲན་བཞིན་བརྡོལ། །

                                    ༤༥
                                    
གླིང་བདུན་མཁའ་མཐར་ཆས་པའི་ཋུ་བྷའེ་ཋི། །
                                    
ཐུ་བྷོད་གདངས་ལས་འཁྲུངས་པ་བདེན་མོད་ཀྱི། །
                                    
སྟོབས་ལྡན་ཆེན་པོ་བོད་ཀྱི་དོན་ཉིད་ལས། །
                                    
བོད་ཀྱི་བརྡ་ཆད་རྒྱ་ཡིས་བཏགས་འདོད་འཁྲུལ། །

                                    ༤༦
                                    
བོད་འདི་མི་ཡི་སྔོན་འགྲོར་བརྗོད་ཆོག་པས། །
                                    
གདོད་མའི་ལོ་རྒྱུས་གཙང་བོའི་རྒྱུན་ལས་རིང་། །
                                    
མ་ཧཱ་ཙི་ནའི་རིགས་ལས་གྱེས་སོ་སྐད། །
                                    
རང་བློ་ནད་དང་སྒྲོག་གིས་བཅིངས་པའི་རྟགས། །

                                    ༤༧
                                    
སྲིད་པ་ཆགས་གླུ་ཨ་མཚར་མཚར་དགུའི་ཁེད། །
                                    
མ་སངས་སྤུན་དགུ་ལ་སོགས་ངག་རྩོམ་འབུམ། །
                                    གདོད་མའི་ལོ་རྒྱུས་གསལ་བའི་མེ་ལོང་སྟེ། །
                                    
ལྷ་སྒྲུང་མེད་པའི་མི་རིགས་དབུལ་བོ་ཡིན། །

                                    ༤༨
                                    
གནོད་སྦྱིན་རྩེན་ཞིང་བདུད་སྲིན་འདྲེ་གཉན་འཁྲུག །
                                    
ཀླུ་བཙན་ཆོ་འཕྲུལ་འགྲན་པའི་སྟངས་སྟབས་སོགས། །
                                    
གདོད་མའི་ལོ་རྒྱུས་བཙན་པོའི་རྒྱབ་ལྗོངས་ཏེ། །
                                    
ཚུལ་འདི་འཛམ་གླིང་བྱུང་བ་སྤྱི་ཡི་སྲོལ། །

                                    ༤༩
                                    
དཔྱོད་པའི་བློ་མིག་རྩལ་སྣ་མ་རྫོགས་པས། །
                                    
གཟའ་སྐར་ཉི་ཟླའི་གསང་བར་བློས་བཏགས་མང་། །
                                    
འདོད་སྲེད་ཞུགས་ལྕེ་དམར་བོའི་རླབས་ཤུགས་ཀྱིས། །
                                    
རྡོ་ཆས་དུས་རབས་དམག་འཁྲུག་ངོ་བོར་ཟད། །

                                    ༥༠
                                    
གཅིག་གི་ཟླ་ལ་ཅིག་ཤོས་མ་སླེབས་པས། །
                                    
སིལ་མའི་སྡེ་ཕྲན་གང་མང་དབྱིངས་སུ་བསྟིམས། །
                                    
མ་སངས་སྤུན་དགུ་རྒྱལ་ཕྲན་ཉེར་ལྔ་དང་། །
                                    
སིལ་མ་བཅུ་བཞི་སོགས་ལ་རླུང་རྟ་རྒྱུགས། །

                                    ༥༡
                                    
འདབ་བཟང་དབང་བོའི་རྩལ་གྱིས་མི་ཟིན་པའི། །
                                    
མུ་མེད་ས་འཛིན་སྣུམ་པོའི་བྲང་གཞུང་དུ། །
                                    
གཡང་ཕྱུགས་ལྷོད་ཀྱིས་བཀྲམ་པའི་འཚོ་སྟངས་དེས། །
                                    
ཟླ་ཤེལ་བརྩེགས་པའི་མུ་ཁྱུད་བརྒལ་བ་མེད། །

                                    ༥༢
                                    
འབྲུ་དྲུག་སྔོན་མོའི་སྐྱེ་འཕེལ་ལ་ཆགས་ཏེ། །
                                    
སྣ་ཚོགས་དོན་མཐུན་ལས་ལ་མིག་ཞགས་ལྷོད། །
                                    
གོ་ལའི་སྣེ་མོ་ཞི་བདེའི་རྒྱ་མཚོས་ཟད། །
                                    
སེམས་ཁམས་འཚོ་བ་གཉིས་ཀ་སྟབས་བདེ་ཡིན། །

                                    ༥༣
                                    
དུས་བཞིའི་འགྱུར་བར་འགྲོག་གིན་འགྲོག་གིན་འོང་། །
                                    
འཁྱར་འཁྱོར་གོམ་པ་སྤོ་བཞིན་སྤོ་བཞིན་འོང་། །
                                    
མངར་སྐྱུར་འཚོ་བ་མྱོང་གིན་མྱོང་གིན་འོང་། །
                                    
ཉམས་མྱོང་ཕྲན་བུ་གསོག་གིན་གསོག་གིན་འོང་། །

       ཞེས་གངས་ཅན་བྱུང་འཕེལ་གྱི་སྲད་བུར་བརྒྱུས་པའི་སྙན་རྩོམ་མུ་ཏིག་སུམ་བརྒྱ་བ་ལས་སྟོད་ལྷ་རབས་ཀྱི་ཚུལ་བསྟན་པའི་ཁུགས་པ་སྟེ་དང་བོའོ། །

༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005