ཀྱེ་ཧོ་ཉོན་ཅིག་རིག་པའི་ཁྱེའུ་ཁྱོད།།
ངས་ནི་ཁྱོད་ལ་ཕན་པའི་གྲོས་ཤིག་འདེབས།།
སྐྱོ་ངལ་མ་བྱེད་སྙིང་ལ་རུས་པ་སྐྱེད།།
དགོས་པའི་གནད་འདི་ཁྱེད་ཀྱི་སྙིང་ལ་ཆོངས།།
ཡི་ཆད་ངམ་ཐང་སྐྱ་མོ་བརྒལ་བ་ལ།།
བརྩོན་འགྲུས་ཐང་ལྷོད་མེད་པའི་རྟ་ཕོ་དགོས།།
རྣམ་གཡེང་དགྲ་བོ་གདོང་ནག་ངོ་ལེན་ལ།།
དྲན་ཤེས་རྣོན་ངར་འཛོམ་པའི་རལ་གྲི་དགོས།།
ལེ་ལོ་བདུད་ཀྱི་བུ་མོའི་སླུ་བྲིད་ལ།།
བག་ཡོད་རང་ཚུགས་ཐུབ་པའི་འཁར་བ་དགོས།།
ང་རྒྱལ་བྲག་རི་མཐོན་པོའི་མགོ་གནོན་ལ།།
ཁེངས་སྐྱུང་དམན་ས་འཛིན་པའི་ལྷམ་ཆུང་དགོས།།
ཕྲག་དོག་རླུང་དམར་འཚུབ་པའི་གདོང་ལེན་ལ།།
ཕྱོགས་ལྷུང་ཉེ་རིང་མེད་པའི་ཡོལ་བ་དགོས།།
བཅུ་ཕྲག་རིག་པའི་མཚོ་འཇིངས་འཇུག་པ་ལ།།
ཡི་གེའི་སྦྱོར་བ་འཕྲུལ་གྱི་གྲུ་གཟིངས་དགོས།།
མིང་ཚིག་བརྡ་ལ་འཁྲུལ་པ་སེལ་བ་ལ།།
ཐོན་མིའི་ལེགས་བཤད་ལུང་གི་བདུད་རྩི་དགོས།།
མ་རྟོགས་འཁྱོག་བཤད་རྙོག་མ་བགྲུང་བ་ལ།།
དཔྱད་པ་གསུམ་གྱི་ཆུ་དྭངས་ནོར་བུ་དགོས།།
འཆད་རྩོད་རྩོམ་པའི་ཁུར་ཆེན་འཛིན་པ་ལ།།
ཚད་མ་གསུམ་གྱི་བདེན་པའི་རྒྱབ་སྐྱོར་དགོས།།
རང་འདོད་ཞེན་པའི་ལམ་འཕྲང་བསལ་བ་ལ།།
དམངས་ལ་ཞབས་འདེགས་ཞུ་བའི་ལྷག་བསམ་དགོས།།
ཤེས་རིག་གུས་པ་སྤེལ་བའི་སྒུལ་ཤུགས་ལ།།
བསམ་པའི་དཔལ་ཡོན་དར་བའི་ཀུན་སྤྱོད་དགོས།།
མ་ནོར་ལམ་སྟོན་ཏང་གི་དབུ་ཁྲིད་ལ།།
ནམ་ཡང་འདུ་འབྲལ་མེད་པའི་དད་གུས་དགོས།།
མདུན་སྐྱོད་ཁ་ཕྱོགས་སྟོན་པའི་སྒྲིན་མེ་ལ།།
མར་ལེ་མའོ་ཙེ་ཏུང་གི་དགོངས་པ་དགོས།།
གུང་ཁྲན་རིང་ལུགས་བགྲོད་པའི་ལམ་སྟེགས་ལ།།
སྤྱི་ཚོགས་རིང་ལུགས་གསེར་གྱི་ཐེམ་སྐས་དགོས།།
མཐར་ཐུག་བསླབས་འབྲས་སྙིང་པོ་མཆིས་སོ་ཅོག།
ཅན་བཞིའི་དོན་དུ་འབུལ་བའི་ཆོད་སེམས་དགོས།།
འདི་ནི་རང་གིས་རང་ལ་གསལ་འདེབས་ལས།།
གཞན་ལ་སྐུལ་ལྕག་འདེབས་པའི་དབྱུག་པ་མིན།།
འོན་ཀྱང་སྐལ་མཉམ་གཞན་ལའང་ཕན་སྲིད་ཕྱིར།།
སོར་མོའི་འཕྲུལ་གྱིས་ཡི་གེའི་རིས་སུ་སྤེལ།།
དབང་འདུས་ཀྱིས་ཞུས།
