གནས་ཡུལ། མདུན་ངོས། སྐད་ཡིག་གི་དཔྱད་རྩོམ།
 
 
༄༅།། བོད་ཀྱི་སྤྱི་སྐད་ཀྱི་བླ་སྲོག་གླེང་བ་ཧང་ཆུའི་བཞུར་རྒྱུན།
སྤེལ་དུས།2015-07-06   ཡོང་ཁུངས་།བོད་ལྗོངས་རིག་གནས་དྲ་བ།   རྩོམ་པ་པོ། ལྷ་སྡེ་སྲིན་སྲས།

དང་པོ། བོད་དང་བོད་སྐད་ཀྱི་དབྱེ་བ་བཤད་པ།

        བོད་ཀྱི་ལོ་རྒྱུས་ལས་སྟོད་ཀྱི་མངའ་རིས་སྐོར་གསུམ་རྫིང་གི་ཚུལ། བར་གྱི་དབུས་གཙང་རིས་བཞི་ཡུར་བ་དང་འདྲ། སྨད་ཀྱི་ཁམས་སྒང་དྲུག་ཞིང་དང་འདྲ་ཞེས་བོད་སྟོད་སྨད་བར་གསུམ་དུ་ཕྱེ་བའི་སྟོད་མངའ་རིས་དང་བར་དབུས་གཙང་སྨད་མདོ་ཁམས་བཅས་ཀྱི་ཕྱི་རང་བྱུང་གི་བཀོད་པའམ་ས་དབྱིབས་ཆགས་ཚུལ་གྱི་རྣམ་པ་བསྡུས་ཏེ་བསྟན་ཡོད་ལ་དེ་ཡང་རྫིང་བུ་དང་འདྲ་བའི་སྟོད་མངའ་རིས་ཀྱི་ཕྱིའི་རང་བྱུང་གི་རྣམ་པ་ནི་སྤང་ཐང་གི་མཐའ་ལ་བྲག་རི་དང་གཡའ་རི་ཡིས་རྒྱན་ཞིང་ཡུར་བ་དང་འདྲ་བའི་བར་དབུས་གཙང་གི་ཕྱིའི་རང་བྱུང་གི་བཀོད་པ་ནི་ལུང་བ་ཆེན་པོ་དག་གིས་གཡས་གཡོན་དུ་རི་རྒྱུད་ཀྱིས་རྒྱན་པ་དང་ཞིང་དང་མཚུངས་བའི་སྨད་མདོ་ཁམས་ཀྱི་ཕྱིའི་རང་བྱུང་གི་རྣམ་པ་ནི་རྩྭ་ཐང་ཆེན་པོ་དག་གི་མཐའ་འམ་གཡས་གཡོན་རྒྱབ་ཕྱོགས་སུ་རྫ་རི་སྤང་རི་སོགས་མང་བོ་ཡོད་པ་དེ་དག་གི་དཔེ་ལ་རྫིང་བུ་དང་ཡུར་བ། ཞིང་གསུམ་དུ་བཞག་ནས་ཕྱིའི་རང་བྱུང་གི་ཆགས་ཚུལ་གྱི་རྣམ་པ་དོ་མཉམ་མིན་པའི་ཤུགས་ལ་དེའི་ཡུལ་མིའི་སྐད་གདངས་དང་ཡུལ་སྲོལ་གོམས་གཤིས་སོགས་ཀྱང་གཅིག་མཚུངས་མིན་པ་བསྟན་འདུག། དེ་ལྟར་སྟོད་སྨད་བར་གསུམ་དུ་ཕྱེ་བའི་བོད་རིགས་འདི་ཉིད་ལ་སྐད་གདངས་ཀྱི་ཆ་ནས་ཀྱང་སྟོད་ལ་མངའ་རིས་ཀྱི་སྐད་དང་བར་ལ་དབུས་གཙང་གི་སྐད། སྨད་ལ་མདོ་ཁམས་ཀྱི་སྐད་དེ་གཉིས་སུ་དབྱེ་བའི་བཞི་དང་མ་དབྱེ་བའི་གསུམ་དུ་གསུངས། གཞན་ཡང་ཆོས་ལུགས་ཀྱི་ཆོལ་ག་བྱེད་སྲོལ་མི་འདྲ་བའི་དབང་གིས་དབུས་གཙང་ཆོས་ཀྱི་ཆོལ་ག་དང་མདོ་སྟོད་མིའི་ཆོལ་ག། མདོ་སྨད་རྟའི་ཆོལ་ག་སྟེ་གསུམ་དུ་དབྱེ་བ་ལ་སོགས་པའི་ནང་གསེས་ཀྱི་དབྱེ་བ་དབྱེ་སྟངས་མི་འདྲ་བ་དུ་མ་ཡོད་ཀྱང་སྟོད་མངའ་རིས་དང་བར་དབུས་གཙང་གཉིས་ཀྱི་སྐད་ལ་བར་ཁྱད་ཆེན་པོ་མེད་པས་སྟོད་མངའ་རིས་དང་བར་དབུས་གཙང་གཉིས་དབུས་ཀྱི་ཁོངས་སུ་བཞག་ནས་བོད་མདོ་དབུས་ཁམས་གསུམ་དུ་བཤད་ལ་དེ་ལྟ་བུའི་བོད་སྟོད་སྨད་བར་གསུམ་མམ་མདོ་དབུས་ཁམས་གསུམ་དུ་ཕྱེ་བའི་ས་ཆ་སོ་སོ་ལ་འཚོ་སྡོད་བྱེད་བཞིན་པའི་མིའི་སྤྱི་ཡི་མིང་ལ་བོད་དང་དེའི་ཡུལ་མི་རྣམས་ཀྱིས་བཤད་བཞིན་པའི་སྐད་ཆ་ལ་བོད་སྐད་ཅེས་ཟེར་ཞིང་ཨ་མདོ་དང་ཁམས་པ། དབུས་གཙང་གསུམ་ནི་རང་རེའི་བོད་རིགས་ཀྱི་ཐུན་མོང་མ་ཡིན་པའི་དབྱེ་བ་ཆེན་པོ་གསུམ་ཡིན་ལ། སྨོན་ལམ་ཚིག་མཛོད་དུ་ཨ་མདོ་ཞེས་པ་ནི་བ་ཡན་ཧ་རིའི་ཤར་ངོས་ཨ་ཆེན་གངས་རྒྱབ་དང་མདོ་ལ་གཉིས་ཀྱི་མིང་གཅིག་ཏུ་བསྡོམས་པའི་མན་ཆད་ལ་ཟེར་ཞིང་ད་ལྟའི་མཚོ་སྔོན་ཞིང་ཆེན་གྱི་ཡུལ་ཤུལ་ཕུད་པའི་ས་ཆ་གཞན་དག་དང་ཀན་སུའུ་ཞིང་ཆེན་གྱི་ཀན་ལྷོ་དང་སུ་ཁྲོན་ཞིང་ཆེན་གྱི་རྔ་བ་ལ་སོགས་པའི་བོད་རིགས་ས་ཁུལ་རྣམས་ཡིན་པ་དང་དེའི་ཡུལ་མིའི་སྐད་ཆ་ལ་ཨམ་སྐད་ཅེས་བརྗོད་པ་དང་ད་ལྟའི་མཚོ་སྔོན་གྱི་ཡུལ་ཤུལ་དང་ཡོན་ནན་གྱི་བདེ་ཆེན་དང་སུ་ཁྲོན་གྱི་དཀར་མཛེས་དང་བོད་ལྗོངས་ཀྱི་ནག་ཆུ་དང་ཆབ་མདོ་སོགས་ཀྱི་བོད་རིགས་ས་ཆ་རྣམས་ལ་ཁམས་དང་དེའི་ཡུལ་མིའི་སྐད་ཆ་ལ་ཁམས་སྐད་ཅེས་བརྗོད་པ་དང་ད་ལྟའི་མངའ་རིས་དང་གཞིས་རྩེ་དང་ལྷོ་ཁ་ལྷ་ས་ཉིང་ཁྲི་ལ་སོགས་པའི་བོད་རིགས་ས་ཆ་རྣམས་ལ་དབུས་གཙང་དང་དེའི་ཡུལ་མིའི་སྐད་ཆ་ལ་དབུས་གཙང་སྐད་ཅེས་ཟེར་བ་ཡིན་ལ་དེ་དག་གི་རང་རང་གི་སྐད་གདངས་མི་གཅིག་པའི་དབང་གིས་ཨ་མདོ་པ་དང་ཁམས་པ། དབུས་གཙང་པ་བཅས་ཁག་མི་འདྲ་བ་གསུམ་དུ་དབྱེ་བ་དང་ཨམ་སྐད་དང་ཁམས་སྐད་དབུས་གཙང་སྐད་ལ་སོགས་པ་ནི་རང་རེའི་བོད་ཀྱི་ཐུན་མོང་མ་ཡིན་པའི་སྐད་ཆ་རིགས་གསུམ་ཡིན་པ་དང་དེ་ལས་དབུས་སྐད་ནི་གདངས་ཞེན་པ་དང་ཁམས་སྐད་ནི་གདངས་རན་པ། ཨམ་སྐད་ནི་གདངས་དྲག་པ་ཡིན་ལ་དག་ཡིག་དང་ཚིག་མཛོད་སོགས་སུ་བཀོད་པ་ལྟར་ན་དབུས་ནི་དཀྱིལ་སྙིང་དང་ཁམས་ནི་མཐའ་མཚམས་དང་མདོ་ནི་སྨད་ཀྱི་དོན་ཡིན་ལ་ཨ་མདོ་དང་ཁམས་པ་གཉིས་ནི་དབུས་པ་ལས་ཟུར་དུ་ཕུད་པའི་མཐའ་མཚམས་ཀྱི་དོན་ཡིན་ལ་བཤད་རྒྱུན་ལ་ལར་སྔོན་བཙན་པོའི་དུས་སྐབས་ཀྱི་མཐའ་མཚམས་སྲུང་མཁན་གྱི་དམག་དཔོན་གྱི་རྒྱུད་ལས་མཆེད་འཕེལ་འོངས་བའི་དམག་དཔུང་གི་རིགས་ཤིག་ཡིན་ལ་དུས་ད་ལྟའང་རྐང་སྣམ་མ་ཕུད་བར་ཉལ་སྲོལ་ཡོད་པ་ནི་དམག་འཁྲུག་རྒྱག་པར་སྟབས་བདེ་བའམ་ཡང་ན་སྟ་གོན་ལ་ཉེ་བར་ཕྱོགས་པའི་རྟགས་མཚན་རེད་ཟེར་མཁན་ཡང་ཡོད། དེ་མིན་འབྲུག་ཡུལ་དང་བལ་ཡུལ་ལ་རྒྱ་གར་ལ་སོགས་པའི་རྒྱལ་ཁབ་མང་པོ་ཞིག་ན་བོད་རིགས་ཡོད་རུང་དེ་དག་ཀྱང་ཨ་མདོ་པ་དང་ཁམས་པ། དབུས་གཙང་པ་གང་རུང་གི་ཁོངས་ནས་ཐོན་པའི་བོད་ཀྱི་བྱེ་བྲག་པ་ཡིན་པས་དེ་དག་གི་སྐད་ཆའང་མདོ་དབུས་ཁམས་གསུམ་གང་རུང་གི་སྐད་ལ་མ་གཏོགས་པ་ཞིག་མེད་ལ་དེ་དག་གིས་ཀྱང་ཨ་མདོ་བས་ཨམ་སྐད་དང་ཁམས་པས་ཁམས་སྐད། དབུས་གཙང་པས་དབུས་སྐད་རྒྱག་པ་ལས་བོད་སྤྱི་ཡི་གོ་བའི་སྐད་ཆ་ཞིག་རྒྱག་ཤེས་ཀྱི་མེད་པ་རེད། ཡིན་ནའང་ཕྱི་ཡུལ་ན་ཁོ་ཚོའི་རིགས་གྲངས་ཧ་ཅང་ཉུང་བ་དང་ཁོ་ཚོས་ཕན་ཚུན་འབྲེལ་གཏུགས་མང་བའི་དབང་གིས་ཨ་མདོ་པ་ཡིན་ཡང་དབུས་སྐད་བཤད་ཤེས་ལ་ཁམས་སྐད་ཀྱང་གོ་བཞིན་ཡོད་པ་རེད། དེ་བཞིན་དུ་ཁམས་པ་ཡིན་ཡང་ཨམ་སྐད་རྒྱག་ཤེས་ལ་དབུས་གཙང་སྐད་ཀྱང་གོ་ཐུབ་པ་ཞིག་ཏུ་སྣང་བ་དང་ཁོ་ཚོ་ནི་བོད་མདོ་དབུས་ཁམས་གསུམ་རང་རང་གི་ཡུལ་དུ་འཚོ་སྡོད་བྱས་པའི་བོད་པ་ཞིག་དང་བསྡུར་ན་ཡོན་ཏན་མང་བ་དང་སྐད་གསུམ་ཤེས་པས་ཅུང་དགོས་མཚན་ཆེ་བ་དང་སྐད་ཆའང་བོད་སྤྱི་སྐད་ཕྱོགས་ལ་ཉེ་བར་ཕྱོགས་པ་ཞིག་ཡིན་ན་ཡང་བོད་ཀྱི་སྤྱི་ཡོངས་ཀྱི་གོ་བའི་སྐད་ཆ་ཞིག་བཤད་ཤེས་ཀྱི་མེད། དེའི་རྒྱུ་མཚན་ནི་ཁོ་ཚོའི་བོད་ཡིག་ཀློག་སྟངས་གཅིག་གྱུར་གྱི་མིན་ལ། ཨ་མདོ་བས་ཨ་མདོ་བའི་ཀློག་སྟངས་ལྟར་ཀློག་པ་དང་། ཁམས་པས་ཁམས་པའི་ཀློག་སྟངས་ལྟར་ཀློག་པ། དབུས་གཙང་པ་རྣམས་ཀྱིས་དབུས་གཙང་པའི་ཀློག་སྟངས་ལྟར་ཀློག་བཞིན་ཡོད་པ་རེད། དེ་བཞིན་དུ་ཁམས་ཕྱོགས་སུ་ཡོད་པའི་ཨ་མདོ་བ་དང་དབུས་ཕྱོགས་ཕྱོགས་སུ་ཡོད་པའི་ཨ་མདོ་བ་དང་དབུས་ཕྱོགས་སུ་ཡོད་པའི་ཁམས་པ་དང་ཨ་མདོ་ཕྱོགས་ན་ཡོད་པའི་ཁམས་པ་ལ་སོགས་ཀྱིའང་ཕན་ཚུན་གྱི་སྐད་བཤད་ཤེས་ལ་གོ་འང་ཐུབ་ཀྱི་ཡོད་མོད། འོན་ཀྱང་ཁོ་ཚོ་ལའང་ཡི་གེ་ཀློག་སྟངས་གཅིག་གྱུར་ཞིག་མེད་པས་རང་རང་གི་སྐད་དང་རང་རང་གི་ཞིག་ཡི་གེ་ཀློག་སྟངས་ལྟར་ཀློག་པ་ལས་བོད་སྤྱི་ཡོངས་ཀྱི་གོ་ཐུབ་པའི་སྐད་ཆ་ཞིག་བཤད་ཤེས་ཀྱི་མེད་པ་རེད། དེ་བས་ཀྱང་བོད་མདོ་དབུས་ཁམས་གསུམ་རང་རང་གི་ཡུལ་དུ་འཚོ་སྡོད་བྱེད་པའི་བོད་པ་ཞིག་ལ་མཚོན་ན་རང་རང་སོ་སོའི་སྡོད་སའི་ཡུལ་གྲུ་དེའི་སྐད་མ་གཏོགས་ཨ་མདོ་བས་དབུས་སྐད་དང་ཁམས་སྐད་མི་གོ་པ་དང་དབུས་གཙང་པས་ཨམ་སྐད་དང་ཁམས་སྐད་མི་གོ་བ། ཁམས་པས་ཨམ་སྐད་དང་དབུས་སྐད་མི་གོ་བས་རང་རང་གི་སྐད་ཀྱི་དགོས་མཚན་དང་ཆེ་བ་བརྗོད་པ་ཙམ་ལས་ཕན་ཚུན་གྱི་སྐད་ལ་འབྲེལ་འདྲིས་དང་ཕན་ཚུན་རྒྱུས་ལོན་མེད་པའི་གནས་ཚུལ་འོག་ནས་ཡུལ་གྲུའི་གང་གི་སྐད་གདངས་ཡག་པ་དང་གང་ལ་དགོས་མཚན་ཡོད་པ་དང་ཡུལ་གྲུ་གང་གིས་ཡི་གེ་ཀློག་སྟངས་ཡག་པོ་ཡོད་པ་སོགས་གཏན་ཤེས་ཀྱི་ཡོད་པ་མ་རེད། གནས་ཚུལ་འདི་འདྲ་འོག་ནས་ཨ་མདོ་བས་ཨམ་སྐད་ཀྱི་དགོས་མཚན་དང་ཆེ་བ་བརྗོད་པ་དང་། ཁམས་པས་ཁམས་སྐད་ཀྱི་དགོས་མཚན་དང་ཆེ་བ་བརྗོད་པ། དབུས་གཙང་པས་དབུས་གཙང་སྐད་ཀྱི་དགོས་མཚན་བརྗོད་བཞིན་ཡོད་པ་རེད། ང་ཚོ་བོད་ལ་བོད་མདོ་དབུས་ཁམས་གསུམ་གྱི་སྐད་ཤེས་མཁན་གྱི་མི་སྣ་ཉུང་བ་དང་དེ་གསུམ་ལ་ཞིབ་འཇུག་དང་དབྱེ་ཞིབ་གནང་མཁན་མ་བྱུང་བ། བོད་སྟོད་སྨད་བར་གསུམ་པོའི་ཕན་ཚུན་འབྲེལ་འདྲིས་དང་རྒྱུས་ལོན་མེད་པ་བཅས་ཀྱི་རྐྱེན་གྱིས་དུས་ད་ལྟའང་ད་དུང་བོད་སྐད་ལ་གཅིག་གྱུར་མེད་པ་དང་། མ་འོངས་པ་ལ་ང་ཚོ་བོད་ཀྱི་བོད་སྐད་གཅིག་གྱུར་ཡོང་བ་བྱེད་དགོས་ན་ངེས་བར་དུ་མདོ་དབུས་ཁམས་གསུམ་གྱི་སྐད་གསུམ་ཤེས་པའི་མི་སྣ་ཕན་ཚུན་གསོ་སྐྱོང་དང་ཕན་ཚུན་ཟབ་སྦྱོང་མང་པོ་གནང་ནས་བོད་སྐད་གསུམ་ལ་ཞིབ་འཇུག་དང་དབྱེ་ཞིབ་བྱེད་དགོས་པ་མ་ཟད། བོད་མདོ་དབུས་ཁམས་གསུམ་པོའི་ཕན་ཚུན་འབྲེལ་འདྲིས་དང་ཕན་ཚུན་རྒྱུས་ལོན་བྱ་རྒྱུ་དེའང་ཧ་ཅང་གལ་ཆེ་བ་ཞིག་རེད།

གཉིས་པ།  བོད་མདོ་དབུས་ཁམས་གསུམ་གྱིས་བོད་ཡིག་ཡི་གེ་ཀློག་སྟངས་གཅིག་གྱུར་བྱ་དགོས་པའི་སྐོར་བཤད་པ།

        དེ་ཡང་དབུས་སྐད་མི་ཤེས་པའི་ཨ་མདོ་པ་ཞིག་གི་ཐོག་མར་ལྷ་སའི་སྐད་དེ་རང་ཉིད་ཀྱི་རྣ་བར་ཐོས་དུས་རྒྱ་གར་གྱི་སྐད་ལྟར་སྐད་གདངས་ཧ་ཅང་དམའ་བ་དང་ལྷ་ས་བ་ཞིག་གི་ཨ་མདོ་བའི་སྐད་དེ་ཐོག་དང་པོ་རང་ཉིད་ཀྱི་རྣ་བས་གོ་དུས་ཁོང་ཁྲོ་ལངས་པ་ལྟ་བུའི་སྐད་ཀྱི་གདངས་མཐོ་བ་དང་ཡི་གེ་ཀློག་དུས་ཀྱང་སྔོན་རྗེས་མིང་གསུམ་གྱི་སྒྲ་གསལ་བོར་ཐོན་པ་དང་གྱི་དང་འགྱོ།  མྱི་ལ་སོགས་པའི་བརྡ་རྙིང་གི་སྐོར་མང་བ་དང་དེ་བཞིན་དུ་དབུས་པ་ཞིག་གིས་རྗེས་འཇུག་གི་ཡི་གེ་རྣམས་བཀླག་པའི་ཚེ་ན་སྒྲ་ཧ་ཅང་ཞེན་པས་མེད་པ་ལྟ་བུར་སྣང་བ་དང་ཁ་ག་དང་ཆ་ཇ། ཕ་བ་སོགས་སྒྲ་གདངས་གཅིག་ལྟ་བུར་ཀློག་པ་དང་འབྱེད་སྡུད་ཀྱི་གམ་སོགས་ཀྱི་ཚབས་ཏུ་པས་འཇོག་པ། ཕེབས་དང་གསོལ། བཞེས། མི་འདུག་དང་བཞེངས། བཞུགས་ལ་སོགས་པའི་ཞེ་ཚིག་གིས་སྦྱར་བའི་ཐ་སྙད་མང་བ་དང་རེད་མི་འདུག་དང་ཡོད་མི་འདུག་དང་། མ་རེད་བཞག། རེད་མི་གདའ། བྱས་ཙང་ལ་སོགས་པའི་ཐོན་མིའི་བརྡ་སྤྲོད་ཀྱི་གཞུང་དུ་མ་བསྟན་པའི་མིང་ཕྲད་ཚིག་གསུམ་མང་པ་དང་དེ་བཞིན་དུ་གཙང་པ་ཞིག་གི་རང་ཉིད་ཀྱི་བུ་དང་བ་མོར་ཁྱིམ་གཞི་སྒྲིག་ནས་ཕྲུ་གུ་སྐྱེས་པ་ཡིན་ན་ཁྱིམ་ཚང་དེ་བུ་དང་བུ་མོ་ཡང་ཕ་མ་ཆགས་ནས་ཕ་མ་དང་བུ་ཕྲུག་བཟའ་ཟླ་སོགས་ཀྱི་མིང་ནས་མི་འབོད་པར་བུའི་ཕས་ཀྱང་རང་ཉིད་ལ་བུ་ཕྲུག་ལ་ཕ་ལགས་པ་དང་བུ་མོའི་མ་ཡིས་ཀྱང་རང་ཉིད་ཀྱི་བུ་མོ་ལ་མ་ལགས་ཞེས་འབོད་ལ་རང་ཉིད་ཀྱི་བཟའ་ཟླའམ་ཐ་ན་རང་ཉིད་ཀྱི་རང་ཉིད་ལའང་ཕ་འམ་མ་འབོད་པ་དང་ཁྱད་པར་དུ་རང་གི་ཤ་ཉེ་སྤུན་མཆེད་ལ་སོགས་པའི་ཁྱིམ་མི་མང་པོ་ལྷན་དུ་འཛོམས་ཚེ་ཕ་མའི་ཐ་སྙད་མང་པོ་བྱུང་ནས་རང་མིས་མ་གཏོགས་ཕ་ངོ་མ་སུ་ཡིན་དང་མ་ངོ་མ་སུ་ཡིན་དབྱེ་འབྱེད་དཀའ་བའི་སྣང་ཚུལ་དགོད་བྲོ་བ་མང་པོ་ཡོད་པ་འདི་དག་ཀྱང་མདོར་བསྡུས་ནས་བཤད་ན་མིང་ཚིག་དང་ཕྲད། སྐད་གདངས། ཡི་གེ་ཀློག་ཚུལ་ལ་སོགས་པ་གཅིག་གྱུར་མེད་པ་མཚོན་ཡོད་པ་མ་ཟད། མདོ་དབུས་ཁམས་གསུམ་པོ་ལ་རང་རང་སོ་སོའི་སྐད་གདངས་རེ་རེ་དང་ཀློག་སྟངས་རེ་རེ་ཡོད་པའང་གསལ་སྟོན་བྱས་ཡོད་པ་རེད། ཡི་གེ་གཅིག་ལ་ཀློག་སྟངས་མི་འདྲ་བའི་སྒྲ་གདངས་དུ་མ་ཡོད་པ་འདིས་བོད་སྐད་ཆ་གཅིག་གྱུར་ཡོང་བ་ལ་བཀག་འགོག་བྱེད་བཞིན་ཡོད་པས་ང་ཚོས་རྗེས་ཕྱོགས་ནས་མིང་ཚིག་སྤྱོད་སྟངས་དང་ཚིག་ཕྲད་སྦྱོར་ཚུལ། སྐད་ཆ་ལབ་སྟངས་སོགས་ལ་དོ་སྣང་དང་ཡིད་གཟབ་གནང་ནས་བོད་ཁམས་ཡོངས་ཀྱི་བོད་ཡིག་གི་ཀློག་སྟངས་གཅིག་གི་སྔོན་འགྲོའི་རྨང་གཞི་འོག་བོད་མདོ་དབུས་ཁམས་གསུམ་གྱི་སྐད་ཆ་ཡོད་ཚད་གདངས་གཅིག་རང་བཞིན་ལ་གཅིག་གྱུར་བྱེད་རྒྱུ་དེ་ཧ་ཅང་གལ་ཆེན་ཞིག་རེད། ཡིན་ནའང་ང་ཚོ་མདོ་དབུས་ཁམས་གསུམ་ལས་གང་ཞིག་གི་སྐད་གདངས་ཡག་པ་དང་གང་ཞིག་སུམ་རྟགས་གྱི་གཞུང་དང་མཐུན་མིན་དེ་ཧ་ཅང་བཤད་དཀའ་བ་དང་ཁྱད་པར་དུ་མདོ་དབུས་ཁམས་གསུམ་པོ་ལ་རང་རང་གི་སྐད་ཀྱི་ཁྱད་ཆོས་རེ་ཡོད་པའི་ཕྱིར་ན་གང་གིས་ཡི་གེ་ཀློག་སྟངས་ཡག་མིན་དེ་བས་ཀྱང་བཤད་དཀའ་བ་རེད། དེ་བས་ཨ་མདོ་བས་ཨམ་སྐད་ཁོ་ན་ཙམ་བཤད་ནས་མི་འདུག་པར་དབུས་སྐད་དང་ཁམས་སྐད་སློབ་པ་དང་ཁམས་པས་ཀྱང་ཁམས་སྐད་ཁོ་ན་མི་བཤད་པར་ཨམ་སྐད་དང་དབུས་སྐད་སྦྱང་བ། དབུས་བས་ཀྱང་དབུས་སྐད་ཁོ་ན་ཙམ་མི་འཆད་པར་ཨམ་སྐད་དང་ཁམས་སྐད་སློབ་ནས་བོད་སྐད་གསུམ་གྱི་རྩ་བའི་རྨང་གཞི་དང་རྩ་བའི་རྣམ་བཞག་གསལ་བོར་ཤེས་དགོས་པ་མ་ཟད། དེ་དག་གི་དགོས་སྐྱོན་སོགས་ཀྱང་ཡང་དག་པར་ཤེས་དགོས། དེ་དག་གི་རང་རང་སོ་སོའི་སྐད་ཀྱི་སྒྲ་གདངས་དང་དགོས་སྐྱོན། ཀློག་སྟངས་སོགས་ཤེས་ན་གཞི་ནས་མདོ་དབུས་ཁམས་གསུམ་གྱི་རང་རང་སོ་སོའི་སྐད་ཀྱི་རིན་ཐང་དང་དགོས་སྐྱོན་སོགས་རྟོགས་ཐུབ་པ་དང་སྐད་གདངས་མི་གཅིག་པའི་ཨམ་སྐད་ལ་སྐྱོན་དང་དགོས་པ་གང་ཞིག་ཡོད་པ་དང་དེ་ཡི་ཡིག་ཀློག་གི་སྒྲ་གདངས་ག་འདྲ་ཡིན་པ་དང་། ཁམས་སྐད་ལ་སྐྱོན་དང་དགོས་པ་གང་ཞིག་ཡོད་པ། དེའི་ཡིག་ཀློག་གི་སྒྲ་གདངས་ག་འདྲ་ཡིན་པ། དབུས་སྐད་ལ་སྐྱོན་དང་དགོས་པ་གང་ཞིག་ཡོད་པ། དེའི་ཡིག་ཀློག་གི་སྒྲ་གདངས་ག་འདྲ་ཡིན་པ་སོགས་གསལ་བོར་རྟོགས་ནུས། དེ་གསུམ་གྱི་རང་རང་སོ་སོའི་དགོས་སྐྱོན་དང་ཀློག་གདངས་ལ་སོགས་པ་གསལ་བོར་རྟོགས་ན་ད་བཟོད་དེ་གསུམ་ལས་གང་ཞིག་ལ་དགོས་མཚན་མང་བ་དང་གང་ཞིག་འཆད་བདེ་བ། གང་ཞིག་སྐད་གདངས་གསལ་བ། གང་ཞིག་གི་ཀློག་ཚུལ་ཡག་པ་སོགས་རང་བཞིན་གྱིས་གསལ་བོར་ཤེས་ཡོང་། དེ་གསུམ་གྱི་རང་རང་སོ་སོའི་སྐད་གདངས་ཀྱི་དྲག་ཞེན་དང་སྐད་ཆ་ཡི་རིན་ཐང་སོགས་གསལ་བོར་ཤེས་ན་དེ་གསུམ་ལས་གང་ཞིག་བོད་སྤྱི་སྐད་ལ་འོས་མིན་དེ་ཡང་རང་བཞིན་གྱིས་རྟོགས་ཐུབ་ལ། དེ་གསུམ་ལས་དགོས་མཚན་ཆེས་མང་བ་དང་སྐད་གདངས་ཆེས་གསལ་བ། ཀློག་ཚུལ་ཆེས་ཡག་པ་ཞིག་བོད་སྤྱིའི་སྐད་ལ་གཏན་འཁེལ་ཐོག་བརྙན་འཕྲིན་དང་རྒྱང་སྒྲོགས་སོགས་ནས་སྐད་དེ་ཉིད་གཙོ་བོར་བཞག་ཏེ་ཐད་གཏོང་བྱས་ན་ད་བཟོད་བོད་ཡིག་གི་ཡི་གེ་ཀློག་སྟངས་གཅིག་གྱུར་བྱེད་ཐུབ་ལ། བོད་ཡིག་གི་ཡི་གེའི་ཀློག་སྟངས་གཅིག་གྱུར་བྱ་རྒྱུ་ནི་བོད་སྤྱི་སྐད་ཀྱི་བླ་སྲོག་ལྟ་བུར་ཡིན་ནོ། །

གསུམ་པ།  བོད་ཕལ་སྐད་ཀྱི་མིང་ཕྲད་ཚིག་གསུམ་གཞུང་ལྟར་གཅིག་གྱུར་བྱ་དགོས་སྐོར་བཤད་པ།

        ཨམ་སྐད་དང་ཁམས་སྐད་དབུས་སྐད་སོགས་རང་རང་གི་ཡུལ་སྲོལ་གོམས་སྲོལ་དང་མཐུན་པའི་ཁྱད་ཆོས་ཞིག་ཡོད་པ་ནི་སྨྲོས་མེད་ཅིག་ཡིན་མོད། འོན་ཀྱང་གནའ་ནས་ད་བར་དུ་དེ་དག་ལ་ཞིབ་འཇུག་བྱེད་པའི་མཁས་པ་མ་བྱུང་བའི་དབང་གིས་དེ་དག་ལས་གང་ཞིག་སྐད་ཡག་པ་དང་གང་ཞིག་སྐད་ཐོན་མིའི་བརྡ་སྤྲོད་པའི་གཞུང་དང་མཐུན་མིན། གང་ཞིག་བརྗོད་བདེ་བ། གང་གི་སྒྲ་གདངས་གསལ་བ་དང་གང་ལ་དགོས་མཚན་མང་བ་སོགས་ཧ་ཅང་བརྗོད་དཀའ་བའི་གནད་ཅིག་ཡིན་ལ། ཁྱད་པར་དུ་རང་རེའི་བོད་པ་རྣམས་ནི་ཡུལ་ལུང་ཐ་ཐོར་དུ་གནས་པ་དང་དང་སྐད་གདངས་འདྲ་མིན་ཡོད་པ། གོམས་སྲོལ་ཐ་དད། ཡིག་ཀློག་ཁ་ཁ་ཡིན་པའི་དབང་གིས་མདོ་དབུས་ཁམས་གསུམ་ལས་གང་ཞིག་གི་སྐད་སྤྱི་སྐད་ལ་རུང་མིན་དང་གང་ཞིག་གི་སྤྱི་སྐད་ལ་འོས་མིན་ནི་དེ་བས་ཀྱང་ཤིན་ཏུ་རྟོགས་དཀའ་བའི་ལྐོག་གྱུར་གྱི་གནད་ཅིག་རེད། ཡིན་ཡང་ང་པ་ཚོ་བོད་ལ་གཅིག་གྱུར་ཡི་གེ་ཞིག་ཡོད་པ་འདི་ཡིས་སྐད་ཆ་གང་ཞིག་ཡག་པ་དང་གང་ཞིག་གཞུང་གི་བརྡ་སྤྲོད་དང་མཐུན་པ། གང་ཞིག་ལ་ལེགས་ཆ་མང་པོ་ཡོད་པ་སོགས་རྟོགས་ཐུབ་པ་རེད། དེ་བས་བོད་ཡིག་གི་རིག་པའི་གཞུང་རྩ་བ་ལ་བཞག་ཐོག་མིང་ཕྲད་ཚིག་གསུམ་གྱིས་གྲུབ་པའི་སྐད་བརྡ་རིག་པ་གཅིག་གྱུར་བྱེད་དགོས། མིང་ཕྲད་ཚིག་གསུམ་གྱི་བཀོལ་སྟངས་གཅིག་གྱུརབྱ་རྒྱུ་ནི་བོད་སྤྱི་སྐད་ཀྱི་སྔོན་འགྲོའི་རྨང་གཞི་ཡིན་ལ། དེ་ལྟ་བུའི་བོད་སྤྱི་སྐད་ཀྱི་སྐད་བརྡ་རིག་པ་ཞིག་མངོན་འགྱུར་བྱེད་དགོས་ན་ཐོག་མར་བོད་མདོ་དབུས་ཁམས་གསུམ་ལས་ཡུལ་གྲུ་གང་ཞིག་གི་མིང་ཕྲད་ཚིག་གསུམ་གཞུང་ལུགས་དང་མཐུན་པ་དང་ཡུལ་གྲུ་གང་ཞིག་གི་མིང་ཕྲད་ཚིག་གསུམ་གཞུང་དང་མི་མཐུན་པ་ལྟ་རྒྱུ་ནི་ཤིན་ཏུ་གལ་ཆེ་བ་སྟེ་དཔེར་ན་ཨ་མདོ་ཡུལ་གྱི་ཞིང་འབྲོག་དཀྱིལ་མ་ཞིག་གི་ཁ་བརྡ་ལས་སུམ་རྟགས་དག་གསུམ་གྱི་གཞུང་དང་མཐུན་པའི་མིང་ཚིག་ག་ཚོད་ཡོད་མིན་དང་ཕྲད་ག་ཚོད་ཡོད་མིན་དང་ཁམས་ཕྱོགས་ཀྱི་ཞིང་འབྲོག་མང་ཚོགས་དཀྱིལ་མ་ཞིག་གི་ཁ་བརྡ་ལས་སུམ་རྟགས་དག་གསུམ་གྱི་གཞུང་མཐུན་པའི་མིང་ཚིག་ག་ཚོད་ཡོད་མིན་དང་ཕྲད་ག་ཚོད་ཡོད་མིན་དང་དབུས་པའི་མང་ཚོགས་དཀྱིལ་མ་ཞིག་གི་ཁ་བརྡ་ལས་སུམ་རྟགས་དག་གསུམ་གྱི་གཞུང་མཐུན་པའི་མིང་ཚིག་ག་ཚོད་མིན་དང་ཕྲད་ག་ཚོད་ཡོད་མིན་སོགས་ལ་ཞིབ་འཇུག་གིས་བརྡར་ཤ་བཅད་མཐར་དེ་གསུམ་ལས་སུམ་རྟག་དག་གསུམ་གཞུང་དང་མཐུན་པ་མང་པའི་སྐད་གདངས་ཞིག་གདམས་ཐོག་འབྱེད་སྡུད(ལྷ་སའི་སྐད་རང་ཡིན་པས)་པས་སྒྲ་ཅན་དང(ཨམ་སྐད་ནམ་ཡོང་ནས)་ནས་སྒྲ་ཅན། ཨ་མདོ་སྐད་ཀྱི་བརྡ་རྙིང་མྱི་གྱི་འགྱོ་སོགས་དོར་ནས་བརྡ་གསར་དང་མཐུན་པའི་བོད་ཀྱི་ཡིག་འབྲུ་གཅིག་ལ་སྒྲ་གདངས་གཅིག་དང་ཀློག་སྟངས་གཅིག་གི་རྨང་གཞི་འོག་བོད་མི་སྤྱི་ཡོངས་ཀྱི་གོ་ཐུབ་པའི་བོད་སྤྱི་སྐད་ཞིག་གཏན་ལ་ཕབ་ནས་བརྙན་འཕྲིན་ནས་སྟོན་པ་དང་རྒྱང་བསྒྲགས་ནས་སྒྲོག་པ། སློབ་གྲྭ་ནས་སློབ་པ་སོགས་གཙོ་བོར་བཟུང་ནས་བོད་ཡིག་གི་ཡིག་ཀློག་གི་སྒྲ་གདངས་གཅིག་གྱུར་ཅན་དང་མིང་ཕྲད་ཚིག་གསུམ་གྱི་བཀོལ་སྤྱོད་བྱེད་སྟངས་གཅིག་གྱུར་ཅན་དུ་འགྱུར་བར་ཀུན་གྱིས་ཕྱོགས་ཡོངས་ནས་འབད་བརྩོན་བྱ་དགོས་སོ། །

བཞི་བ།  བོད་ཀྱི་སྤྱི་སྐད་ལ་ཚང་དགོས་པའི་ཆ་རྐྱེན་བཤད་པ།

        དེ་ལྟར་བོད་ཁམས་ཡོངས་ཀྱི་བོད་མི་ཡོངས་ཀྱིས་མིང་བརྡ་ཡི་བཀོལ་ལུགས་གཅིག་དང་ཚིག་ཕྲད་ཀྱི་སྦྱོར་ཚུལ་གཅིག། ཡིག་ཀློག་གི་སྐད་གདངས་གཅིག་བཅས་ཀྱི་སྔོན་འགྲོའི་རྨང་གཞིའི་ཆ་རྐྱེན་འོག་ནས་བོད་ཡིག་བཀློག་ཚུལ་གྱི་སྒྲ་གདངས་གཅིག་གྱུར་བྱས་ནས་སློབ་དཔོན་ཐོན་མིའི་བརྡ་སྤྲོད་པའི་གཞུང་དང་མི་མཐུན་པ་རྣམས་དོར་མཐུན་པ་རྣམས་བླངས་ནས་བོད་མི་སྤྱི་ཡོངས་ཀྱི་གོ་ཐུབ་པའི་བོད་སྤྱི་སྐད་ཅིག་གཏན་འབེབས་བྱ་རྒྱུ་ནི་ཤིན་ཏུ་གལ་ཆེ་བར་བསམ་མོ། །

རིན་ཆེན་གྱིས་བསྒྲིགས།

༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005